កាលពីរសៀលថ្ងៃទី២៣ ខែធ្នូ ឆ្នាំ២០១៩ម្សិលមិញនេះ រដ្ឋបាលខេត្តសៀមរាប បានរៀបចំបើកកិច្ចប្រជុំមួយ ស្ដីពីការត្រៀមរៀបចំពិធីបុណ្យឆ្លងឆ្នាំសកលឆ្នាំ២០២០ និងពិធីអបអរសាទរខួបអនុស្សាវរីយ៍លើកទី ៤១ នៃថ្ងៃជ័យជំនះ៧មករា ក្រោមអធិបតីភាព លោក ពិន ប្រាកដ និង លោក នាក់ ណេរ៉ុន អភិបាលរងខេត្ត និងជាតំណាងឯកឧត្តម ទៀ សីហា អភិបាល នៃគណ:អភិបាលខេត្ត ដោយមានការចូលរួមពីសំណាក់លោក លោកស្រី ជាថ្នាក់ដឹកនាំមន្ទីរ អង្គភាពនានាក្នុងខេត្ត រដ្ឋបាលសាលាខេត្ត ទីចាត់ការសាលាខេត្ត រដ្ឋបាលក្រុងសៀមរាប និង អង្គភាពពាក់ព័ន្ធផ្សេងៗទៀត ។
កិច្ចប្រជុំនេះ បានធ្វើការពិនិត្យ និង ពិភាក្សា លើរបៀបវារ:សំខាន់ៗមួយចំនួន រួមមាន ៖ ១- ការងារសណ្តាប់ធ្នាប់សាធារណៈ , ២- ការរៀបចំប្រចាំការលើការងារសន្តិសុខ , ៣- បញ្ហាសំណង់ស្កាយបារនៅក្នុងតំបន់ផាប់ស្ទ្រីត , ៤- ការងារសន្តិសុខទូទៅ , ៥-សុវត្ថិភាពចំណីអាហារ និង ៦- ការងារតុបតែងលំអសោភ័ណភាពក្នុងក្រុងសៀមរាប និង ជាពិសេស អំពីសន្តិសុខសណ្តាប់ធ្នាប់សាធារណ: និងការរៀបចំកម្មវិធីកំសាន្តសប្បាយ សម្រាប់ថ្ងៃចូលឆ្នាំសកល២០២០ និងបុណ្យ ៧មករា ។
ពិធីឆ្លងឆ្នាំសកល ជាកម្មវិធីមានសារៈសំខាន់ សម្រាប់ខេត្តសៀមរាប ពីព្រោះជាតំបន់ទេសចរណ៍ មានសក្តានុពលទាំងភ្ញៀវទេសចរជាតិ និងអន្តរជាតិ ដូចនេះព្រឹត្តិការណ៍នេះ រដ្ឋបាលខេត្ត គ្រោងនឹងរៀបចំនៅសួនច្បារមុនព្រះរាជដំណាក់ និងសួនច្បារមាត់ស្ទឹង ដោយមានការប្រគុំតន្ត្រី ការតាំងពិព័ណ៌លក់ផលិតផល ការតុបតែងលំអភ្លើងចម្រុះព៌ណនៅតំបន់សំខាន់ៗក្នុងក្រុង និងទីតាំងតំបន់ផាប់ស្ទ្រីត ។
គួររំលឹកថា ពិធីបុណ្យឆ្លងឆ្នាំសកលនេះ រដ្ឋបាលខេត្តសៀមរាប ធ្លាប់ប្រារព្ធម្ដងរួចមកហើយ កាលពីឆ្នាំ២០១៩ ដោយមានការរៀបចំការរាំកម្សាន្តសប្បាយចម្រុះជាតិសាសន៍នៅតំបន់ផាប់ស្រ្ទីត , កម្មវិធីរាប់ក្រោយ និងកម្មវិធីរាំកម្សាន្ត រួមជាមួយការលក់ផលិតផលគ្រប់មុខនៅសួនកម្សាន្តមុខព្រះរាជដំណាក់ក្នុងក្រុងសៀមរាប ព្រមទាំងបានរៀបចំការបាញ់កាំជ្រួច អបអរសាទរការឆ្លងឆ្នាំសាកលនេះជាច្រើនកន្លែងផងដែរ ៕
រដ្ឋបាលខេត្តសៀមរាប បើកកិច្ចប្រជុំ ស្ដីពីការត្រៀមរៀបចំពិធីបុណ្យឆ្លងឆ្នាំសកល
រដ្ឋបាលខេត្តសៀមរាប បើកកិច្ចប្រជុំ ស្ដីពីការត្រៀមរៀបចំពិធីបុណ្យឆ្លងឆ្នាំសកលឆ្នាំ២០២០ និងពិធីអបអរសាទរខួបអនុស្សាវរីយ៍លើកទី ៤១ នៃថ្ងៃជ័យជំនះ៧មករា#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Tuesday, December 24, 2019
អត្ថបទ និង រូបថត ៖ លោក លីវ សុខុន
កែសម្រួលអត្ថបទ ៖ លោក លីវ សាន្ត
