នៅព្រឹកថ្ងៃទី ២៤ ខែធ្នូ ឆ្នាំ ២០១៩ នៅវត្តពញាព្រហ្ម ឃុំស្ពានត្នោត ស្រុកជីក្រែង ខេត្តសៀមរាប មានរៀបចំវេទិកាសាធារណៈថ្នាក់ជាតិ ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយយុទ្ធសាស្ត្រចតុកោណដំណាក់កាលទី ៤ របស់រាជរដ្ឋាភិបាលកម្ពុជា និងទទួលយកសំណួរ សំណូមពរទូទៅ របស់ប្រជាពលរដ្ឋក្នុងស្រុកជីក្រែង។
វេទិកាថ្នាក់ជាតិនាពេលនេះ ផ្ដោតទៅលើឃុំចំនួន ៤ គឺឃុំល្វែងឫស្សី ឃុំជីក្រែង ឃុំអន្លង់សំណរ និងឃុំស្ពានត្នោត លើប្រធានបទ ការផ្ដល់សេវាសាធារណៈ (សេវាតម្រូវការ និងសេវាសំណូមពរ)។
វេទិកានេះ ដំណើរការក្រោមអធិបតីភាព ឯកឧត្តម មាស សំអុល អនុប្រធានក្រុមការងារថ្នាក់ជាតិ និងតំណាង ឯកឧត្តម ព្រហ្ម សិទ្ធត្រា រដ្ឋលេខាធិការក្រសួងយុត្តិធម៌ និងជាប្រធានក្រុមការងារថ្នាក់ជាតិចុះជួយមូលដ្ឋានស្រុកជីក្រែង ខេត្តសៀមរាប មានការសម្របសម្រួលពីលោក ពៅ ប៊ុនធឿន អភិបាលស្រុកជីក្រែង ព្រមទាំងវត្តមានប្រធានមន្ទីរ មន្ត្រីតំណាងមន្ទីរ អង្គភាព ស្ថាប័នពាក់ព័ន្ធ កងកម្លាំង៣ប្រភេទ និងអ្នកចូលរួមសរុប ៣៨៥នាក់។
ព័ត៌មានជាតិ ថ្មីៗ
ក្នុងវេទិកានេះ អ្នកចូលរួមបានលើកជា សំណួរ សំណូមពរ ផ្ទាល់មាត់ និងសរសេរ ចំនួន២៤ ដែលពាក់ព័ន្ធទៅលើ បញ្ហាការធ្វើឯកសារអនុត្រានុកូលដ្ឋាន ការធ្វើបណ្ណកម្មសិទ្ធអចលនទ្រព្យ សំណើរសុំអគារសិក្សា និងទឹកស្អាតក្នុងសាលា សំណើសុំជួយកសាងព្រះវិហារ សំណើរសុំសាងសង់ស្ពានថ្មកាត់ស្ទឹងជីក្រែង បញ្ហាទ្វារទឹក បញ្ហាការធ្លាក់ចុះតម្លៃស្រូវ បញ្ហាការលួចកាប់ព្រៃលិចទឹក បញ្ហាគ្រឿងញៀន និងបញ្ហាអគ្គិសនី។
ពាក់ព័ន្ធសំណួរ សំណូមពរទាំងនេះ សមត្ថកិច្ច ប្រធានមន្ទីរ និងតំណាងមន្ទីរ អង្គភាព ស្ថាប័នជំនាញ បានធ្វើការបកស្រាយជូនប្រជាពលរដ្ឋយ៉ាងពិស្ដារ។ ចំពោះ សំណួរ សំណូមពរនៅសេសសល់ ប្រធានមន្ទីរ និងតំណាងមន្ទីរ អង្គភាព ស្ថាប័នជំនាញ សន្យានឹងយកទៅពិភាក្សា និងដាក់ជូនថ្នាក់ដឹកនាំរបស់ខ្លួន ធ្វើការដោះស្រាយផងដែរ។
មានមតិក្នុងវេទិកានោះ ឯកឧត្តម មាស សំអុល អនុប្រធានក្រុមការងារថ្នាក់ជាតិ បានថ្លែងអំណរគុណដល់ប្រជាពលរដ្ឋ សិស្សានុសិស្ស ជាម្ចាស់សំណួរ សំណូមពរ ដែលបានលើកនូវទុក្ខកង្វល់ ដាក់ជូនអាជ្ញាធរដោះស្រាយ ដែលបញ្ហាទាំងអស់នេះ និងចូលរួមបង្កើននូវប្រសិទ្ធភាព ក្នុងការអនុវត្តកម្មវិធីនយោបាយយុទ្ធសាស្ត្រចតុកោណដំណាក់កាលទី ៤ របស់រាជរដ្ឋាភិបាលកម្ពុជា ដើម្បីធ្វើយ៉ាងលើកកម្ពស់ជីវភាពប្រជាពលរដ្ឋឲ្យកាន់តែប្រសើរឡើង និងអភិបាលកិច្ចល្អនៅថ្នាក់ក្រោមជាតិ។
វេទិកាសាធារណៈថ្នាក់ជាតិ ត្រួតពិនិត្យ និងគាំទ្រនយោបាយយុទ្ធសាស្ត្រចតុកោណ
វេទិកាសាធារណៈថ្នាក់ជាតិ ត្រួតពិនិត្យ និងគាំទ្រនយោបាយយុទ្ធសាស្ត្រចតុកោណដំណាក់កាលទី ៤ ស្រុកជីក្រែង#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Tuesday, December 24, 2019
អត្ថបទនិង រូបភាព៖ ខេង ឧត្តម និងសេង ផល្លី
