រថយន្តតម្រង់ជួរនៅលើផ្លូវនានាក្នុងទីប្រជុំជន ម៉ារ៉ាតអាល់នូមែន នៃប្រទេសស៊ីរីមនុស្សរាប់ពាន់នាក់បានចាប់ផ្តើមភៀសខ្លួនពីទីប្រជុំជននេះនៅក្នុង ខេត្តអ៊ីដលីប (Idlib) ឆ្ពោះទៅព្រំដែនទួរគី។
ពួកគេបាននិយាយថា យើងបានភៀសខ្លួនចេញពីការទម្លាក់គ្រាប់បែក និងការបំផ្លិចបំផ្លាញហើយយើងមិនដឹងថាយើងនឹងទៅទីណាទេ យើងគ្មានជម្រក យើងគ្មានអ្វីទាំងអស់។
លោក Brahim ជាជនភៀសខ្លូនបាននិយាយលើកឡើងថា ស្រុកកំណើតខ្ញុំត្រូវបានបំផ្លាញ ដូច្នេះហើយខ្ញុំបានចាកចេញទៅក្រុងម៉ារ៉ាតអាល់នូមែន (Maarat al-Numan) តែឥលូវពាក់កណ្តាលនៃ ទីក្រុងម៉ារ៉ាតអាល់នូមែន (Maarat al-Numan )ត្រូវបានបំផ្លាញផងដែរ ដោយមានការទម្លាក់គ្រាប់បែក យន្តហោះចម្បាំង មីស៊ីល និងរ៉ុក្កែត យើងមិនអាចនៅទីនោះបានទេ។ មានមនុស្សជាច្រើននៅតែមិនអាចចាក់ចេញបាន ដោយអ្នកខ្លះមិនមានរថយន្តសំរាប់ដឹកឥវ៉ាន់របស់គេចេញទេ ហើយអ្នកខ្លះទៀតមិនមានកន្លែងដែលត្រូវទៅ។
កងកម្លាំងរបស់ប្រធានាធិបតី បាសា អាល់អាសាដ បានធ្វើសមយុទ្ធវាយ លុករបស់ពួកគេនៅក្នុងខេត្តភាគពាយព្យរបស់ប្រទេសស៊ីរី ជាមួយនឹងការបាញ់រះ និងការបាញ់ផ្លោង របស់ក្រុមយោធា មានគោលបំណងដើម្បី យកតំបន់ដែល កាន់កាប់ដោយ ក្រុមឧទ្ទាម។
គួរបញ្ជាប់ផងដែរ ៖ អង្គការសហប្រជាជាតិប៉ាន់ស្មាន ថាមានពលរដ្ឋប្រមាណ ៦០០០០នាក់បានភៀសខ្លួនពីអ៊ីដលីបចាប់តាំងពីការបំផ្ទុះគ្រាប់បែកបានកើតឡើងនៅចុងខែវិច្ឆិកា។
នេះជាអំពើហិង្សាឃោឃៅចុងក្រោយបង្អស់នៅក្នុងជម្លោះដ៏សាហាវបំផុតនៃសតវត្សរ៍ទី ២១ ។ សង្គ្រាមស៊ីវិលនៅស៊ីរីបានសម្លាប់មនុស្សជាង៣៧០០០០នាក់ និងផ្លាស់ទីលំនៅរាប់លាននាក់ចាប់តាំងពីឆ្នាំ ២០១១ មក។
ប្រភព youtube channel South China Moring Post
បកប្រែដោយ លោក ហាំ ម៉េងហួត
