ព័ត៌មានជាតិ ថ្មីៗ
មានប្រសាសន៍ក្នុងប្រគល់វិញ្ញាបនបត្របណ្តោះអាសន្នមធ្យមសិក្សាបឋមភូមិ និងមធ្យមសិក្សាទុតិយភូមិ ប័ណ្ណសរសើរ និងរង្វាន់លើកទឹកចិត្តសម្រាប់សិស្សពូកែ និងគ្រូបង្រៀនឆ្នើម នៅសាលាអន្តរជាតិភ្យូឆឺរប្រាយ រៀបចំពិធី កាលពីព្រឹកថ្ងៃទី២៧ ខែធ្នូ ឆ្នាំ២០១៩នេះ លោក ពៅ ពិសិដ្ឋ អភិបាលរង នៃគណៈអភិបាលខេត្តសៀមរាប មានបានប្រសាសន៍ថា មានកត្តា៥យ៉ាងដែលមិនត្រូវមើលរំលង គឺទី១. កត្តាមាតាបិតា អាណាព្យាបាល ដែលបានគាំទ្រទំនុកបំរុងសព្វបែបយ៉ាងនិងផ្តល់កម្លាំងចិត្តដល់ការសិក្សារបស់កូនៗ , ទី២. កត្តាសាលារៀនដែលមានការគ្រប់គ្រងនិងរៀបចំប្រព័ន្ឋអប់រំល្អនិងមានកម្មវិធីសិក្សាឆ្លើយតបទៅនឹងកម្មវិធីសិក្សាអប់រំជាតិនិងការធ្វើសមោហរណកម្មកម្មវិធីសិក្សារបស់ខ្លួនចូលទៅក្នុងសហគមន៍អាស៊ាន , ទី៣. កត្តាខ្លួនឯងដែលខិតខំយកចិត្តទុកដាក់ក្នុងការសិក្សារៀនសូត្រនិងបំពេញតួនាទីជាកូនល្អ សិស្សល្អ មិត្តល្អជាពលរដ្ឋល្អ ដែលជាកោសិការបស់សង្គមនាថ្ងៃអនាគត , ទី៤. គ្រូបង្រៀន ដែលបានសិក្សាស្រាវជ្រាវចងក្រងឯកសារក្នុងការបង្រៀននិងផ្ទេរចំណេះដឹងដល់សិស្សានុសិស្ស និង ទី៥. កត្តាប្រទេសជាតិ ដែលមានសុខសន្តិភាពពេញលេញ ក្រោមការដឹកនាំប្រកបដោយភាពប៉ិនប្រសព្វរបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ។
លោក ពៅ ពិសិដ្ឋ មានប្រសាសន៍ទៀតថា រាជរដ្ឋាភិបាលកម្ពុជានីតិកាលទី៦ នៃរដ្ឋសភា បានបន្តកំណត់យុទ្ធសាស្រ្តចតុកោណដំណាក់កាលទី៤ ជាគ្រឹះនៃកម្មវិធីនយោបាយជាតិ ដើម្បីកសាងសង្គមកម្ពុជាឆ្ពោះទៅរកគោលដៅចក្ខុវិស័យឆ្នាំ២០៣០ ជាប្រទេសដែលមានប្រាក់ចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសដែលមានប្រាក់ចំណូលខ្ពស់ ដូច្នេះដើម្បីសម្រេចបានគោលដៅចក្ខុវិស័យនៃយុទ្ធសាស្ត្រចតុកោណនេះ ក្រសួងអប់រំ យុវជន និងកីឡាក្នុងនាមរាជរដ្ឋាភិបាលកម្ពុជា បានដាក់ចេញនូវគោលនយោបាយ និងផែនការយុទ្ធសាស្ត្ររបស់ក្រសួង សំដៅធ្វើកំណែទម្រង់ស៊ីជម្រៅលើវិស័យអប់រំនៅគ្រប់ភូមិសិក្សា និងបណ្តុះបណ្តាលគ្រប់កម្រិតទាំងគ្រឹះស្ថានសាធារណៈ និងគ្រឹះស្ថានឯកជន ដើម្បីផ្តល់ចំណេះដឹង បំណិន ជំនាញ និងឥរិយាបថដល់សិស្សានុសិស្ស និងនិស្សិតឱ្យក្លាយជាពលរដ្ឋពេញលេញ ឆ្លើយតបទៅនឹងបរិបទអប់រំអាស៊ាន និងអន្តរជាតិ ដែលធានាឱ្យពួកគេអាចធ្វើការងារ និងរស់ នៅក្នុងយុគ្គសម័យ សាកលភាវូបនីយកម្ម និង សង្គមពុទ្ធិ ។
លោក ពៅ ពិសិដ្ឋ មានប្រសាសន៍បន្ថែមទៀតថា ដើម្បីសម្រេចបានគោលដៅនេះ សូមឲ្យសាលាអន្តរជាតិភ្យូឆឺរប្រាយ បន្តកិច្ចខិតខំប្រឹងប្រែងបន្ថែមទៀត លើការបណ្តុះបណ្តាលប្រកបដោយគុណភាពស្តង់ដាជាតិ និងអន្តរជាតិ ដូចជា អភិវឌ្ឍកម្មវិធីសិក្សាឱ្យឆ្លើយតបទៅ នឹងបរិបទអប់រំអាស៊ាន និងអន្តរជាតិ សំខាន់អភិវឌ្ឍធនធានបុគ្គលិកសិក្សាឱ្យមានគុណវុឌ្ឍ មានសមត្ថភាពពេញលេញស្របតាមតួនាទីភារកិច្ច ដែលជានាំឱ្យសិស្សមានលក្ខណៈសម្បត្តិពេញលេញ ប្រកបដោយភាពរីកចម្រើនគ្រប់ផ្នែក ដោយមានតុល្យភាពរវាងវិជ្ជាសម្បទាបំណិនសម្បទា ចរិយាសម្បទា កាយសម្បទាព្រមទាំងមានមនសិការស្នេហាជាតិនិងមនុស្សជាតិ ថែរក្សាវប្បធម៌ជាតិ និងបរិស្ថាន ជាពិសេស សូមឲ្យសិស្សានុសិស្សទាំងអស់ត្រូវខិតខំសិក្សាបន្តទៀត ដើម្បីទទួលបានចំណេះដឹង និងជំនាញទៅបំរើការងារនាពេលអនាគត ព្រមទាំងចូលរួមចំណែក អភិវឌ្ឍសហគមន៍និងសង្គមជាតិយើង ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
