នៅព្រឹកថ្ងៃទី២៧ ខែធ្នូ ឆ្នាំ២០១៩នេះ លោក ស៊ុ សំអន នាយកសាខាកាកបាទក្រហមកម្ពុជា ខេត្តសៀមរាប និងសហការី បានអញ្ជើញជួបសំណេះសំណាលសួរសុខទុក្ខ និងនាំយកអំណោយមនុស្សធម៌ជូនដល់លោក សន សុផល អាយុ៥០ឆ្នាំ ដែលជាសមាជិកភាពកាកបាទក្រហមកម្ពុជា និងជាគ្រូឧទ្ទេសសាលាគរុកោសល្យវិក្រឹតការខេត្តសៀមរាប ដែលទទួលរងគ្រោះថ្នាក់ចរាចរណ៍បាក់កជើងខាងស្តាំកាបពីពេលថ្មីៗកន្លងទៅនេះ នៅចំណុច ភូមិតាវៀង សង្កាត់សាលាកំរើក ខេត្តសៀមរាប។
នាឱកាសនោះដែរ លោក ស៊ុ សំអន ក៏បានពាំនាំនូវការផ្ដាំផ្ញើសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខា និងបានសំដែងនូវការសោកស្ដាយជាខ្លាំងជាមួយក្រុមគ្រួសាររងគ្រោះ ដែលនេះជាការរងគ្រោះនឹកស្មានមិនដល់ និងគ្មានអ្នកណាចង់ជួបប្រទះឡើយ ។
លោកបន្តថា អំណោយមនុស្សធម៌ដែលបាននាំយកមកជូនលោក សន សុផល នាពេលនេះ គឺជាការបង្ហាញ់ឲ្យឃើញពីការយកចិត្តទុកដាក់របស់កាកបាទក្រហមកម្ពុជាចំពោះមន្ត្រីរាជការក៏ដូចជាបងប្អូនប្រជាពលរដ្ឋយើង ហើយអំណោយដែលផ្ដល់ជូននាពេលនេះវាក៏អាចជួយសម្រាលទុក្ខលំបាកបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា” ។
គួរឲ្យដឹងដែរថា អំណោយមនុស្សធម៌ដែលបានផ្ដល់ជូនរួមមាន អង្ករ៣០គីឡូក្រាម មុង១ ភួយ១ សារុង១ ក្រមា១ ទឹកត្រី១យួរ មី១កេស ត្រីខ១យួរ និងថវិកា១លានរៀលផងដែរ ៕
អត្ថបទ និង រូបភាព៖ គឿនវេត
កែសម្រួល៖ អ៊ុន ណារាជ្យ
