លើកទី២៤ និងវិញ្ញាបនបត្រកម្រឹតអន្តរជាតិ ( IGE ) មកពីប្រទេសម៉ាឡេស៊ី សម្រាប់សិស្ស យូស៊ីម៉ាស ( UCMAS ) សាខាខេត្តសៀមរាប នាព្រឹកថ្ងៃទី២៩ ខែធ្នូ ឆ្នាំ២០១៩ លោក នាក់ ណេរ៉ុន អភិបាលរងខេត្តសៀមរាប មានលើកឡើងថា បច្ចុប្បន្ននេះរាជរដ្ឋាភិបាលកម្ពុជា បាននឹងកំពុងយកចិត្តទុកដាក់យ៉ាងខ្លាំងទៅលើការអនុវត្តគោលនយោបាយឧស្សាហកម្មឆ្នាំ២០១៥-២០២៥ ដូច្នេះហើយបានជាក្រសួងអប់រំ យុវជន និងកីឡា ដែលទទួលបន្ទុកអភិវឌ្ឍធនធានមនុស្សនៅកម្ពុជា បាននិងកំពុងលើកកម្ពស់គុណភាពអប់រំ ចាប់ពីកម្រឹតថ្នាក់បឋមសិក្សា រហូតដល់ឧត្តមសិក្សា ។
លោក អភិបាលរងខេត្តសៀមរាប បញ្ជាក់យ៉ាងទៀតថា នៅក្នុងបរិបទនេះ ការអប់រំបំប៉នបន្ថែមក្រៅម៉ោងរបស់កម្មវិធីអភិវឌ្ឍខួរក្បាលកុមារតូច វាគឺជាការចូលរួមចំណែកមួយយ៉ាងសំខាន់ ក្នុងការលើកកម្ពស់គុណភាពអប់រំ ។ នៅពេលដែលកុមារត្រូវបានអភិវឌ្ឍសមត្ថភាពខួរក្បាលរបស់ខ្លួនបានល្អ ដូចជាការគណនាលេខបានរហ័ស នោះគឺជាមូលដ្ឋានគ្រឹះ សម្រាប់មុខវិជ្ជាគណិតវិទ្យា ។ មុខវិជ្ជាគណិតវិទ្យានេះហើយ ដែលជាមូលដ្ឋានគ្រឹះរបស់វិទ្យាសាស្រ្តពិត ហើយតាមរយៈនៃមុខវិជ្ជានេះ គឺអាចធ្វើឲ្យពួកគេមានសមត្ថភាពចាប់យកនូវការសិក្សាមុខវិជ្ជាផ្សេងៗទៀត បានយ៉ាងងាយស្រួល ។ ក្នុងនោះការសិក្សាមុខវិជ្ជាគណនាលេខរហ័ស គឺជាការសិក្សាមូលដ្ឋានគ្រឹះ នៃការធ្វើឲ្យសម្រេចបានគោលនយោបាយអភិវឌ្ឍឧស្សាហកម្មរបស់រាជរដ្ឋាភិបាល ។
បើតាម កញ្ញា ហេង រចនា នាយិកាគ្រប់គ្រង UCMAS កម្ពុជា បានឲ្យដឹងថា ក្នុងព្រឹត្តិការណ៍ប្រឡងប្រកួតប្រជែងអន្តរជាតិ ផ្នែកគណនាលេខរហ័ស ប្រចាំឆ្នាំលើកទី២៤ កាលពីថ្ងៃទី០៧ និងថ្ងៃទី០៨ ខែធ្នូ ឆ្នាំ២០១៩ កន្លងទៅ នៅរាជធានីភ្នំពេញ ដែលកម្ពុជាធ្វើជាម្ចាស់ផ្ទះ មានបេក្ខជន បេក្ខនារី សរុប ប្រមាណជា ៤ ០០០នាក់ មកពី៤០ប្រទេសជុំវិញពិភពលោក ត្រូវបានគេរកឃើញថា សិស្ស UCMAS សាខាខេត្តសៀមរាបទទួលបាន ជ័យលាភីអន្តរជាតិច្រើនលើសលុប ក្នុងនោះមានការឈ្នះពានរង្វាន់ជ័យលាភីជើងឯកផុតលេខ ជើងឯកលេខ១ និងលេខ២ សរុប២០៥នាក់ ។
គួរឲ្យដឹងថា កម្មវិធី UCMAS គឺជាកម្មវិធីអភិវឌ្ឍខួរក្បាលលំដាប់ពិភពលោក ដែលជួយឲ្យកុមារមានភាពឈ្លាសវៃ ក្នុងការគណនាលេខបានរហ័ស និងត្រឹមត្រូវ ដែលបច្ចុប្បន្នកម្មវិធី UCMAS មានបើកបង្រៀនច្រើនជាង៨០ប្រទេស និង ៨ ០០០ សាខាទូទាំងពិភពលោក ក្នុងនេះនៅប្រទេសកម្ពុជា មានសិស្សកំពុងសិក្សាកម្មវិធីនេះ នៅ ៥៣សាខា ច្រើនជាង ១ម៉ឺននាក់ ដោយឡែកនៅខេត្តសៀមរាប មាន ៥សាខា ហើយសិស្សកំពុងបានទទួលការរៀនសូត្រប្រមាណជា ១ ៥០០នាក់ ។ ក្នុងនោះបើយោងតាមរបាយការណ៍លទ្ធផលប្រឡងដោយឡែក២ដងផ្សេងទៀត សម័យប្រឡងថ្ងៃទី២៣ ខែកុម្ភៈ និងថ្ងៃទី០៧ ខែកក្កដា ឆ្នាំ២០១៩កន្លងទៅ សិស្ស UCMAS សាខាខេត្តសៀមរាប ចំនួន ១០៤៩នាក់ បានប្រឡងជាប់ជាស្ថាពរ លើវិញ្ញាសារគិតលេខរហ័សតាមកម្រឹតរៀងៗខ្លួន និងវិញ្ញាបនបត្រកម្រឹតអន្តរជាតិ ( IGE ) មកពីប្រទេសម៉ាឡេស៊ីផងដែរ ៕
អត្ថបទ និង រូបភាព៖ ងិន គឹមឡេង
កែសម្រួល៖ អ៊ុន ណារាជ្យ
