វត្តអង្គរខាងជើង ឬវត្តឥន្ទបត្តបុរីអង្គរខាងជើង ស្ថិតនៅក្នុងបរិវេណខាងក្នុងប្រាសាទអង្គរវត្ត ទទួលបានបង្គន់អនាម័យសរុប ៣៣បន្ទប់ ក្នុងនោះ ជួសជុលចំនួន៨ បន្ទប់ និងសង់ថ្មីចំនួន ២៤បន្ទប់ ដោយមហាឧបាសិកាបណ្ឌិត ហ៊ុន សេងនី ជាពុទ្ឋសាសនូបត្ថម្ភ ដើម្បីទុកប្រើប្រាស់ជាសម្បត្តិសាធារណៈ។
បង្គន់អនាម័យ ជួសជុល និងសង់ថ្មីសរុប ៣៣បន្ទប់នេះ ចំណាយថវិកាសរុបអស់ចំនួន៣១,៨៥៣ដុល្លារអាមេរិក បូករួមទាំងថ្លៃជាងនិងសម្ភារៈផ្សេងៗ និងដាក់ឲ្យប្រើប្រាស់កាលពីថ្ងៃទី៣១ ខែធ្នូ ឆ្នាំ២០១៩ ។
ព្រះអង្គមានសង្ឃដីកាបញ្ជាក់ថា បង្គន់ជាទីបន្ទោរបង់របស់មនុស្ស ដែលរាប់ចូលទៅក្នុងសេនាសនបច្ច័យ ដូចជាកុដិសាលាផងដែរ។ ព្រោះវាជាទីជ្រកអាស្រ័យ ដើម្បីដោះទុក្ខសត្វ និងការពារត្រជាក់ក្តៅដូចគ្នា។ បើពោលដល់ផលានិសង្ឃ នៃការសាងបង្គន់ជាទាន ក៏ប្រហាក់ប្រហែលនឹងអានិសង្ឃខាងកុដិសាលានិងសេនាសនៈដែរ ។
ព្រះគ្រូចៅអធិការវត្ត បញ្ជាក់បន្ថែមថា បង្គន់អនាម័យនៅទីនេះ គឺមិនសម្រាប់តែព្រះសង្ឃទេ គឺជាប្រយោជន៍ដល់សាធារណៈជនទូទៅ ជាពិសេសភ្ញៀវទេសចរណ៍ជាតិ និងអន្តរជាតិ ដែលមកទស្សនាប្រាសាទអង្គរវត្ត និងទស្សនាទីអារាមនេះ។ ទន្ទឹមនោះ បង្គន់សម្រាប់សង្ឃត្រូវបានបែងចែកដោយឡែក ពីសាធារណៈជនគ្រហស្ថទូទៅ ដោយមិនឲ្យឡូកឡំគ្នាទេ។
អត្ថបទ និង រូបភាព៖ យូ វង្ស
កែសម្រួល៖ សេង ផល្លី
