នាព្រឹកថ្ងៃទី០៣ ខែ មករា ឆ្នាំ២០២០នេះ ឯកឧត្តម ទៀ សីហា អភិបាលខេត្តសៀមរាប បានបើកកិច្ចប្រជុំមួយ ស្តីពីទេសចរណ៍ប្រកបដោយនិរន្តរភាព ខេត្តសៀមរាប ដើមី្បស្វែងរកនូវដំណោះស្រាយ ក្នុងការទាក់ទាញភ្ញៀវទេសចរណ៍ ចូលមកទស្សនាកម្សាន្តនៅខេត្តសៀមរាប ប្រកបដោយនិរន្តរភាព។
កិច្ចប្រជុំនោះ មានការចូលរួមពី នាយកសហព័ន្ធពាណិជ្ជកម្មសិង្ហបុរី នៃទីចាត់ការពាណិជ្ជកម្មសកល (អាស៊ាន) វិនិយោគិនជាតិ-អន្តរជាតិ រួមនិងថ្នាក់ដឹកនាំមន្ទីរ-អង្គភាព ពាក់ព័ន្ធ។ អង្គប្រជុំ បានលើកឡើងអំពីបញ្ហាប្រឈមមួយចំនួន ដែលពាក់ព័ន្ធទៅនឹងការ ធ្លាក់ចុះនៃភ្ញៀវទេសចរណ៍នៅខេត្តសៀមរាប ព្រមទាំងការផ្អាកធ្វើអាជីវកម្មរបស់សណ្ឋាគារ និងផ្ទះសំណាក់ មួយចំនួននៅក្នុងខេត្តសៀមរាប រួមនិងសំណូមពរកំណត់ទីចំណតម៉ូតូរ៉ឺម៉ក់កង់បីឲ្យបានត្រឹមត្រូវ លុបបំបាត់ការលក់ដូរលើចញ្ជើមផ្លូវ និងរំដោះផ្លូវថ្មើរជើង សម្រាប់ភ្ញៀរដើរកម្សាន្តក្នុងក្រុងមកវិញ។
ព័ត៌មានជាតិ ថ្មីៗ
មានប្រសាសន៍នោះ ឯកឧត្តម ទៀ សីហា បានបញ្ជាក់ថា បញ្ហាដែលបានលើកឡើងមកនេះ គឺត្រូវបានសាធារណជនមួយចំនួនធ្វើការវាយប្រហារមកលើរដ្ឋបាលខេត្ត តាមប្រព័ន្ធព័ត៌មានសង្គម តែបញ្ហាទាំងនោះ មួយចំនួន ត្រូវបានអាជ្ញាធរខេត្ត កំពុងដោះស្រាយតាមរយៈការអនុវត្តទៅតាមគម្រោងប្រចាំឆ្នាំរបស់ខេត្ត។
ឯកឧត្តមអភិបាលខេត្ត បានលើកឡើងថា ខេត្តសៀមរាប ខុសពីបណ្ដាខេត្តដទៃ ដោយសារខេត្តមួយនេះ មានការគ្រប់គ្រងដោយអាជ្ញាធរចំនួន៣ រួមមាន អាជ្ញាធរជាតិអប្សរា គ្រប់គ្រងលើដែនដីជាតំបន់ប្រាង្គប្រាសាទ និង បុរាណដ្ឋាន អាជ្ញាធរបឹងទន្លេសាបគ្រប់គ្រងលើតំបន់បឹងទន្លេសាប និងផ្ទៃដីសេសសល់គ្រប់គ្រងដោយអាជ្ញាធរខេត្ត។
សម្រាប់តំបន់ដែលជាដែនសមត្ថកិច្ចគ្រប់គ្រងរបស់រដ្ឋបាលខេត្ត ឯកឧត្តមអភិបាលខេត្ត បានលើកនូវផែនការមេ នឹងផ្តោតជាសំខាន់លើការអភិវឌ្ឍខេត្តសៀមរាប ជាពិសេសក្រុងសៀមរាបជាទីក្រុងទេសចរណ៍ ជាទីក្រុងបេតិកភណ្ឌ និង ជាទីក្រុងដែលគិតគូរពីបរិស្ថាន (Eco-City) ដែលត្រូវធ្វើសមាហរណកម្មទាំងលើទិដ្ឋភាពសេដ្ឋកិច្ច សង្គម វប្បធម៌ បរិស្ថាន និងស្ថាបត្យកម្ម ការធ្វើសមាហរណកម្មជាមួយផែនការគ្រប់គ្រងតំបន់អង្គរ (TMP)របស់អាជ្ញាធរជាតិអប្សរាផងដែរ ។
សូមជម្រាបថា តាមរយៈបទបង្ហាញរបស់លោកប្រធានមន្ទីរទេសចណ៍ខេត្តសៀមរាបក្នុងកិច្ចប្រជុំនោះ បានបញ្ជាក់ថាស្ថានភាពភ្ញៀវទេសចរណ៍ ដែលបានចូលមកទស្សនាកម្សាន្តនៅខេត្តសៀមរាបក្នុងឆ្នាំ២០១៩ ទាំងផ្លូវគោក ផ្លូវអាកាស និង ផ្លូវទឹក មានចំនួន ៤លាន២៦២ពាន់៣០៦នាក់ ក្នុងនោះភ្ញៀវទេសចរណ៍ជាតិ មានចំនួន ២លាន៥៦ពាន់៦០៩នាក់ និង ភ្ញៀវទេសចរណ៍អន្តរជាតិ ២លាន២០៥ពាន់៦៧៩នាក់ ប្រៀបធៀបទៅនឹងឆ្នាំ ២០១៨ មានការថយចុះ២០ភាគរយ ។
អត្ថបទ និង រូបភាព៖ ម៉ី សុខារិទ្ធ
កែសម្រួលអត្ថបទ៖ សេង ផល្លី
