នៅព្រឹកថ្ងៃទី០៥ ខែមករា ឆ្នាំ២០២០នេះ អាជ្ញាធរខេត្តសៀមរាប ដឹកនាំដោយលោក នាក់ ណេរ៉ុន អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ដោយមានការអញ្ជើញចូលរួមពីសំណាក់លោកនាយករដ្ឋបាលសាលាខេត្ត ថ្នាក់ដឹកនាំខេត្ត មន្ទីរ អង្គភាព និងអាជ្ញាធរមូលដ្ឋាន បានអញ្ជើញចូលរួមជាច្រើននាក់ បានចុះជួបសួរសុខទុក្ខ និងសំណេះសំណាលជាមួយកុមារកំព្រាចំនួន ៣៨នាក់ ក្នុងនោះមានកុមារពិការភាព ៤នាក់នៅក្នុងមជ្ឈមណ្ឌលកុមារកំព្រាខេត្តសៀមរាប ស្ថិតនៅភូមិជ័យ សង្កាត់ទឹកវិល ក្រុងសៀមរាប ខេត្តសៀមរាប ។
លោកអភិបាលរងខេត្តបញ្ជាក់ថា ការជួបសំណេះសំណាល និងសួរសុខទុក្ខដល់ក្មួយៗកុមារា កុមារី នៅក្នុងមជ្ឈមណ្ឌលកុមារកំព្រាខេត្តសៀមរាបនាពេលនេះ គឺដើម្បីបង្ហាញពីភាពស្និទ្ឋស្នាល និងក្តីនឹករលឹកដល់ក្មួយៗដែលរស់នៅទីនេះ ។ ក្នុងនោះក្មយយទាំងអស់ដែលនៅទីនេះ គឺមានការយកចិត្តទុកដាក់ខ្ពស់ពីថ្នាក់ដឹកនាំរាជរដ្ឋាភិបាលគ្រប់លំដាប់ថ្នាក់ ទាំងអង្គការសង្គមស៊ីវិល និងប្រជាពលរដ្ឋគ្រប់មជ្ឈដ្ឋាន ក្នុងគោលបំណងគាំពារ ថែរក្សា ជំរុញការអភិវឌ្ឍលើឲ្យកុមារក្លាយទៅជាយុវជនល្អពលរដ្ឋល្អរបស់សង្គមជាតិក្នុងពេលអនាគត ។
លោកបន្តថា ជាមួយគ្នានោះដែរ អាជ្ញាធរខេត្ត បាននាំយកសម្ភារៈសិក្សាមានសៀវភៅ ប៊ិច ស្បែកជើង ការបូប ព្រមទាំងថវិកាមួយចំនួន និងរៀបចំភេសជ្ជៈនំចំណីម្ហូបអាហារ ជូនដល់កុមារា កុមារី ដែលស្នាក់នៅទីនោះសរុបចំនួន៣៨នាក់ ។ ដែលការងារនេះ គឺមានបំណងចង់ឲ្យក្មួយៗនូវផលតបស្នងតែម្យ៉ាងគត់ គឺចង់ឃើញក្មួយៗខិតខំសិក្សារៀនសូត្រ ប្រព្រឹត្តិតែអំពើល្អចៀសឆ្ងាយពីគ្រឿងញៀន និងកុំសេពគប់អំពើអបាយមុខគ្រប់ប្រភេទដែលសង្គមស្អប់ខ្ពើមជាដើម ។
លោកអភិបាលរង ក៏បានផ្តាំផ្ញើរនឹងលើកទឹកចិត្តដល់កុមារ កុមារី ក្មួយៗ ត្រូវខិតខំរៀនសូត្រ ស្តាប់បង្គាប់លោកគ្រូអ្នកគ្រូ គោរពវិន័យសាលា កុំឱ្យពួកគាត់ខកបំណងដែលពួកគាត់ប្រឹងប្រែងណែនាំអប់រំនិងចិញ្ចឹមបីបាច់ដល់ក្មួយៗ ទាំងអស់។ ពេលនេះក្មួយៗ កុមារា កុមារី គឺជាទំពាំងស្នងឬស្សីនាថ្ងៃអនាគត ដើម្បីក្លាយជាទំពាំងល្អ រឹងមាំនិងមានសមត្ថភាព ក្មួយៗត្រូវខិតខំសិក្សារៀនសូត្រ ខំខ្លួនឯងផងនិងជួយដាស់តឿនជំរុញមិត្តភ័ក្រឱ្យខំរៀនផងទើបល្អប្រសើរ ៕
អត្ថបទ និង រូបភាព៖ ដោយ ស៊ាន សុផាត
កែសម្រួល៖ អ៊ុន ណារាជ្យ
