បើតាមសមត្ថកិច្ចស្រុកប្រាសាទបាគង បានឲ្យដឹងថា យ៉ាងហោចណាស់មនុស្សម្នាក់បានស្លាប់ និង៥នាក់ទៀតបានរងរបួសធ្ងន់ស្រាល ក្នុងហេតុការណ៍គ្រោះថ្នាក់ចរាចរណ៍កាលពីវេលាម៉ោង១៧ និង៣០នាទីថ្ងៃទី៤ ខែមករា ឆ្នាំ២០២០នេះ នៅត្រង់ចំណុចផ្លូវបំបែកហៃវេ ភូមិរលួសលិច ឃុំរលួស ស្រុកប្រាសាទបាគង ខេត្តសៀមរាប លើផ្លូវជាតិលេខ៦ រវាងម៉ូតូសណ្ដោងរ៉ឺម៉ក និង រថយន្តធុនធំ ក្នុងទិសដៅផ្ទុយគ្នា ។
សមត្ថកិច្ច បានឲ្យដឹងទៀតថា ម៉ូតូសណ្ដោងរ៉ឺម៉ក ម៉ាវេវ ពណ៌ក្រហម គ្មានផ្លាកលេខបើកបរ ដោយឈ្មោះ វ៉ាន់ វាសនា ភេទប្រុស អាយុ៣២ឆ្នាំសញ្ជាតិខ្មែរដែលមានទីលំនៅភូមិបឹង ឃុំឬស្សីលក ស្រុកជីក្រែង ខេត្ដសៀមរាប បើកបរ ពីទិសខាងលិចទៅកើត ទៅបុកនិងរថយន្ដ ម៉ាកហ៊ីយិនដាយ ពណ៌សពាក់ផ្លាកលេខ កណ្ដាល ៣A ០៥៤៨ បើកបរដោយជនមិនស្គាល់អត្ដសញ្ញាណ ដែលបើកបរពីទិសខាងជើងទៅទិសខាងត្បូងឈប់នៅខាងជើងផ្លូវជាតិលេខ៦ ។
ក្នុងករណីគ្រោះថ្នកា់ចរាចរណ៍នេះ បណ្ដាលឲ្យអ្នកបើកម៉ូតូសណ្ដោងរ៉ឺម៉កបានស្លាប់ និងអ្នករួមដំណើរនៅលើរ៉ឺម៉កចំនួន៧នាក់បានរងរបួសធ្ងន់ស្រាល ។ ក្រោយពេលកើតហេតុអ្នកបើកបររថយន្ដបានចុះរត់គេចខ្លួនបាត់ ចំណែករថយន្តនឹងម៉ូតូសមត្ថកិច្ចយកមករក្សាទុកនៅអធិការនគបាលស្រុកដើម្បីដោះស្រាយ ហើយសាកសពត្រូវបានប្រគល់អោយក្រុមគ្រួសារយកទៅធ្វើបុណ្យតាមប្រពៃណី រីឯអ្នករបួសបញ្ចូនទៅមន្ទីរពេទ្យខេត្តសៀមរាប ៕
ព័ត៌មានជាតិ ថ្មីៗ
អត្ថបទ និង រូបភាព៖ ខេង ឧត្តម
កែសម្រួល ៖ អ៊ុន ណារាជ្យ
