នារសៀលថ្ងៃទី០៧ ខែមករា ឆ្នាំ២០២០ នៅសាលាខេត្តសៀមរាប មានរៀបចំកិច្ចប្រជុំបូកសរុបលទ្ធផលការងារឆ្នាំ២០១៩ របស់ក្រុមការងារថ្នាក់ជាតិ និងក្រុមការងារថ្នាក់កណ្តាល ដើម្បីធ្វើការកំណែទម្រង់ស៊ីជម្រៅ នៃការសម្រេចបានគោលដៅជាយុទ្ធសាស្ត្រ ការអភិវឌ្ឍន៍សេដ្ឋកិច្ចសង្គម ប្រកបដោយចក្ខុវិស័យ ដើមី្បបន្តពង្រឹងនូវយន្តការនានា របស់រាជរដ្ឋាភិបាលកម្ពុជា ឲ្យធានាបាននូវកំណើនការងារ សមធម៌ និង ប្រសិទ្ធភាពពិតប្រាកដនៅកម្ពុជា ក្រោមធិបតីភាព សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិចុះជួយខេត្តសៀមរាប ។
តាមរយៈរបាយការណ៍ របស់ឯកឧត្តម ទៀ សីហា អភិបាល នៃគណ:អភិបាល ខេត្តសៀមរាប ជូនអង្គប្រជុំ ដែលជា សមាជិក សមាជិកាក្រុមការងារថ្នាក់ជាតិ ចុះជួយខេត្តសៀមរាប អភិបាលរងខេត្ត នាយក នាយករង នាយកទីចាត់ការសាលាខេត្ត ប្រធាន អនុប្រធានមន្ទីរ អង្គភាព ស្ថាប័ន កងកម្លាំងប្រដាប់អាវុធ អភិបាល អភិបាលរងក្រុង-ស្រុក និងមន្ត្រីពាក់ព័ន្ធគ្រប់ថ្នាក់ សរុបចំនួន ១៨៤នាក់ ក្នុងឆ្នាំ២០១៩ បញ្ហាប្រឈមនៅសេសសល់ ដែលក្រុមការងារស្នើទៅក្រសួង ស្ថាប័នពាក់ព័ន្ធបន្តដោះស្រាយ មានចំនួន៩សំណូមពរ ក្នុងនោះ៖
– បញ្ហាប្រព័ន្ធធារាសាស្ត្រ៤ករណី នៅស្រុកអង្គធំ ក្រឡាញ់ ជីក្រែង និងសូទ្រនិគម។
– បញ្ចហេដ្ឋារចនាសម្ព័ន្ធ២ករណី នៅស្រុកវ៉ារិន និងស្រុកជីក្រែង។
– បញ្ហាអគារសិក្សា២ករណ៏ នៅស្រុកអង្គរជុំ។
– បញ្ហាវិទ្យុទាក់ទង១ករណី នៅស្រុកក្រឡាញ់។
ឯកឧត្តម អភិបាលខេត្ត បង្ហាញថា តាមរយៈការរៀបចំវេទិកាសាធារណៈរបស់ក្រុមការងារថ្នាក់ជាតិចុះមូលដ្ឋានខេត្តសៀមរាបដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល នៅក្នុងឆ្នាំ២០១៩កន្លងមក រដ្ឋបាលមូលដ្ឋានគ្រប់លំដាប់ថ្នាក់ បានរក្សាសន្តិសុខ សណ្តាប់ធ្នាប់ ការងារ សេដ្ឋកិច្ច សង្គម និងដោះស្រាយបញ្ហានៅតាមវេទិការបានដោយរលូន និងចំបញ្ហា។
ព័ត៌មានជាតិ ថ្មីៗ
ឯកឧត្តម អភិបាលខេត្ត បញ្ជាក់ថា នៅក្នុងត្រីមាសទី១ ឆ្នាំ២០២០នេះ ក្រុមការងារចុះក្រុង ស្រុកនឹងបន្តជំរុញការដោះស្រាយកាន់តែសកម្ម និងខ្លាំងក្លាបន្ថែមទៀត ចំពោះតម្រូវការរបស់បងប្អូនប្រជាពលរដ្ឋនៅមូលដ្ឋាន ដោយជំរុញ និង ត្រួតពិនិត្យការផ្តល់សេវាសាធារណៈរបស់រដ្ឋបាលក្រុង-ស្រុក ឃុំ-សង្កាត់ ដើម្បីធានាឲ្យការផ្តល់សេវាជូនប្រជាពលរដ្ឋកាន់តែមានគុណភាព តម្លាភាព និងប្រសិទ្ធភាពតាមរយៈច្រកចេញចូលតែមួយនៅថ្នាក់ខេត្ត-ក្រុង-ស្រុក។ លើសពីនោះ អាជ្ញាធរខេត្ត នឹងជំរុញដល់ការអភិវឌ្ឍនៅតាមមូលដ្ឋាន រួមមាន៖
– ខិតខំស្វែងរកកិច្ចសហការជាមួយដៃគូអភិវឌ្ឍ ពិសេសផ្នែកហេដ្ឋារចនាសម្ព័ន្ធ។
– ជំរុញការដោះស្រាយទំនាស់ដីធ្លី តាមយន្តការដែលមានស្រាប់ទាំងថ្នាក់ក្រុង ស្រុក និងខេត្ត។
– អប់រំផ្សព្វផ្សាយ បង្ការ បង្ក្រាបបទល្មើស ពិសេស បទល្មើសគ្រឿងញៀន បទល្មើសធនធានធម្មជាតិ បទល្មើសជលផល ចរាចរណ៍ផ្លូវគោក និងល្បែងស៊ីសងបន្តចុះមូលដ្ឋាន ដែលជាគោលដៅរបស់ខ្លួន ដើម្បីក្តាប់បញ្ហានានានៅក្នុងមូលដ្ឋាន សំដៅធ្វើការដោះស្រាយឲ្យបានសមស្រប និងទាន់ពេលវេលា។ល។
មានប្រសាសន៍បូកសរុបក្នុងកិច្ចប្រជុំនោះ សម្តេចពិជ័យសេនា បានកោតសរសើរ ក្នុងការខិតខំប្រឹងប្រែងយកចិត្តទុកដាក់របស់មន្ត្រីក្រុមការងារថ្នាក់ជាតិ ថ្នាក់ខេត្ត និង ស្រុក ដែលបានអនុវត្តនាពេលកន្លងមក។ សម្ដេចក៏បានក្រើនរំលឹក និងជំរុញ ដល់មន្ត្រីក្រុមការងារគ្រប់ជាន់ថ្នាក់ បន្តសកម្មភាពចុះពង្រឹង ការអភិវឌ្ឍនានាបន្ថែមទៀត នៅតាមមូលដ្ឋានគោលដៅនីមួយៗ និងត្រូវប្រកាន់ឲ្យបានខ្ជាប់ខ្ជួន ពីតួនាទី ភារកិច្ចរបស់ខ្លួន ដែលប្រមុខរាជរដ្ឋាភិបាលប្រគល់ជូន ដើមី្បយកទៅអនុវត្តឲ្យទទួលបានជោគជ័យ និង មានប្រសិទ្ធភាពខ្ពស់ ៕
សម្ដេចពិជ័យសេនា បើកកិច្ចប្រជុំបូកសរុបលទ្ធផលការងារឆ្នាំ២០១៩ របស់ក្រុម
សម្ដេចពិជ័យសេនា បើកកិច្ចប្រជុំបូកសរុបលទ្ធផលការងារឆ្នាំ២០១៩ របស់ក្រុមការងារថ្នាក់ជាតិ និងក្រុមការងារថ្នាក់កណ្តាល នៅខេត្តសៀមរាប#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Wednesday, January 8, 2020
អត្ថបទ និង រូបភាព៖ យូ វង្ស
កែសម្រួល ៖ សេង ផល្លី
