សម្ដេច ទៀ បាញ់៖ ប្រទេសជាតិកាន់តែមានការអភិវឌ្ឍ និវត្តជនកាន់តែមិនអាចមើលរំលងបាន

ថ្ងៃទី០៧ ខែមករា ឆ្នាំ២០២០ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានផ្ដាំផ្ញើនូវសេចក្តីនឹករលឹករបស់សម្តេចតេជោ ហ៊ុន សែន ផ្ញើជូននិវត្តជនទាំងអស់នៅទូទាំងខេត្តសៀមរាប ក្នុងឱកាសទិវារំលឹកខួបអនុស្សាវរីយ៍ ៤១ឆ្នាំ ថ្ងៃជ័យជំនះ៧មករា (១៩៧៩-២០២០) ក្នុងបរិវេណសួនច្បារខាងមុខព្រះរាជដំណាក់ ក្រុងសៀមរាប។

ថ្លែងទៅកាន់និវត្តជនជិត១ពាន់នាក់ ដែលមានវត្តមានក្នុងឱកាសនោះ សម្តេចពិជ័យសេនា បានលើកឡើងពីគំរូវីរភាពរបស់អតីតយុទ្ធជន ដែលបានតស៊ូ លះបង់ពេលវេលា ឆ្លងកាត់ការលំបាក រួមចំណែកកសាងប្រទេសជាតិ ដោយចាប់ផ្តើមពីបាតដៃទទេ រហូតទទួលបាននូវពន្លឺនៃការអភិវឌ្ឍ ។ អនុស្សាវរីយ៍ជាច្រើនរាប់មិនអស់ ដែលនិវត្តជនបានបន្សល់ទុកនៅជាប់នឹងសមិទ្ធផលការងារ ដោយឆ្លងកាត់របត់នយោបាយនៃប្រទេសជាតិ ( ដៃម្ខាងការពារ ដៃម្ខាង ស្តារ-កសាងជាតិ ) ដើម្បីនាំនាវាកម្ពុជា ឆ្ពោះទៅរកមោទនភាព និងកិត្តិយសលើឆាកអន្តរជាតិ ។

សម្តេចពិជ័យសេនា បន្ថែមថា ទាំងនេះជាសមទ្ធិផលដ៏ធំធេងរបស់និវត្តជន ដែលបានចូលរួមធ្វើប្រទេសជាតិកាន់តែមានការអភិវឌ្ឍ និងមិនអាចបំភ្លេចពួកគាត់ទាំងនោះបានឡើយ។

ក្នុងនោះ សម្តេចពិជ័យសេនា លើកទឹកចិត្តដល់ក្មេងៗជំនាន់ក្រោយ ធ្វើការស្រាវជ្រាវផ្ទាល់ពីពួកគាត់ ដែលជានិវត្តជន។ ការស្រាវជ្រាវនេះ វានឹងធ្វើឲ្យសច្ចភាពនៃប្រវត្តិសាស្រ្ត ដែលមិនអាចទទួលយកបាន ចំពោះជនអគតិ បំភ្លៃប្រវត្តិសាស្រ្ត អកតញ្ញូ ចំពោះថ្ងៃជ័យជំនះ ៧មករា ១៩៧៩ នោះ ៕

អត្ថបទ និង រូបភាព៖ ងិន គឹមឡេង
កែសម្រួល ៖ សេង ផល្លី