លោកវរៈសេនីយ៍ឯក ជី បេងជន អធិការនគរបាលស្រុកក្រឡាញ់ បានឲ្យដឹងថា នៅវេលាម៉ោង១៣ និង១០នាទីថ្ងៃទី០៥ ខែមករា ឆ្នាំ២០២០នេះ មានករណីគ្រោះថ្នាក់ចរាចរណ៍មួយបានកើតឡើង រវាងរថយន្តឡង់គ្រីស័រ និងរថយន្តតាក់ស៊ី ម៉ាកសាំយ៉ុង នៅលើកំណាត់ផ្លូវជាតិលេខ៦ ក្នុងភូមិសាស្ត្រភូមិត្រពាំងច្រាំង ឃុំក្រឡាញ់ ស្រុកក្រឡាញ់ ខេត្តសៀមរាប ។ បណ្តាលឲ្យស្លាប់មនុស្សម្នាក់ និង រងរបួសធ្ងន់ស្រាល ១៣នាក់ ។
លោកអធិការនគរបាល បញ្ជាក់ថា ក្នុងករណីគ្រោះថ្នាក់ចរាចរណ៍នេះ គឺបង្កឡើងដោយរថយន្ត ឡង់គ្រីស័រ ពណ៌ស្លែ ពាក់ស្លាកលេខ ភ្នំពេញ ២B ២២៧៨ បើកបរដោយជនមិនស្គាល់អត្តសញ្ញាណ ដែលបានបើកបរមកពីទិសខាងកើតទៅលិច បានរ៉េចង្កូតទៅខាងឆ្វេង ចូលទៅគន្លង ផ្លូវម្ខាងទៀត បានទៅបុករថយន្តតាក់ស៊ី ម៉ាក សាំយ៉ុង ពណ៌លឿង ពាក់ស្លាកលេខ សៀមរាប ២C ៦៧៨៥ ដែលបើកបរ ដោយឈ្មោះ ហឿម ស្រួច ភេទប្រុស អាយុ ៣២ឆ្នាំ រស់នៅភូមិក្រសាទុំ ឃុំដំដែក ស្រុកសូទ្រនិគម ខេត្តសៀមរាប បាន បើកបរពីទិសខាងលិចទៅកើត ឆ្ពោះមកកាន់ក្រុងសៀមរាប ដែលមានផ្ទុកអ្នកដំណើរ ចំនួន ១៤នាក់ទៀតផង ។
លោកអធិការស្រុកបានបន្តទៀតថា ក្នុងករណីគ្រោះថ្នាក់ចរាចរណ៍នេះ បានបណ្ដាលឲ្យស្លាប់មនុស្ស ០១នាក់ ឈ្មោះ ស្អាត សួរ ភេទស្រី និងក្នុងនោះបានរបួសធ្ងន់មនុស្ស ០៧នាក់ ស្រី ០៤នាក់ របួសមនុស្សស្រាល ០៦នាក់ ស្រី ០៤នាក់ ។ ហើយក្នុងករណីនេះដែរ បណ្តាលមកពីអ្នកបើកបររថយន្តម៉ាក ឡង់គ្រីស័រ បើកមានល្បឿនលឿន បើកបរគ្មានការប្រុង ប្រយ័ត្ន ។
ព័ត៌មានជាតិ ថ្មីៗ
ក្រោយកើតហេតុ វត្ថុតាងសមត្ថកិច្ចបានយកមករក្សាទុកនៅអធិការដ្ឋាននគរបាលស្រុកដើម្បីចាត់ការតាមនិតិវិធី ចំណែកជនរងគ្រោះត្រូវបានសមត្ថកិច្ច បានបញ្ជូនទៅសង្គ្រោះនៅមន្ទីរពេទ្យបង្អែកស្រុក នៅក្នុងហេតុការណ៍នេះដែរ ក៏មានវត្តមានលោកស្រី ម៉ម មុន្នីរងី្ស អភិបាលស្រុកក្រឡាញ់ និង លោកប្រធានក្រុមប្រឹក្សាស្រុក បានអញ្ជើញចុះទៅសួរសុខទុក្ខដល់ជនរងគ្រោះនៅក្នុងមន្ទីរពេទ្យ ក្រោមការយកចិត្តទុកដាក់ខ្ពស់របស់អាជ្ញាធរមូល ដ្ឋាន រួមទាំងសហភាពសហព័ន្ធយុវជនកម្ពុជាស្រុកផងដែរ ៕
អត្ថបទ និង រូបភាព៖ ម៉ី សុខារិទ្ធ
កែសម្រួល៖ អ៊ុន ណារាជ្យ
