ក្រុមនិស្សិត និងសាស្ដ្រាចារ្យស្ម័គ្រចិត្ដ មកពីសាកលវិទ្យាល័យកេម៉្យុង (Keimyung University) នៃសាធារណរដ្ឋកូរ៉េ (កូរ៉េខាងត្បូង)បានប្រគល់អគារបណ្ណាល័យ រួមនិងសមទ្ធិផលមួយចំនួន ជូនដល់ សិស្សនៃសាលាបឋមសិក្សាយាង ស្ថិតនៅឃុំយាង ស្រុកពួក ខេត្ដសៀមរាប នៅថ្ងៃទី០២ ខែមករា ឆ្នាំ២០២០។
លោក លី សង់យ៉ុង សាស្ដ្រាចារ្យមកពីសាកលវិទ្យាល័យកេម៉្យុង និងជាអ្នកដឹកនាំនិស្សិតស្ម័គ្រចិត្ដបាននិយាយថា ក្រុមនិស្សិត និងសាស្ដ្រាចារ្យស្ម័គ្រចិត្ដ បានរៃអង្គាសថវិកា និងស្នាក់នៅក្នុងសាលារៀនរយៈពេល៨យប់ ដើម្បីសាងសង់បណ្ណាល័យមួយ រោងដាក់កង់ តារាងបាល់ទះ ព្រមទាំងព្រមទាំងលាបថ្នាំ និងរចនារូបភាពផ្សេងៗនៅលើជញ្ជាំងសាលារៀន ដោយកម្លាំងពលកម្ម របស់ពួកគេផ្ទាល់។
លោកសាស្ដ្រាចារ្យ បានបង្ហាញថា ក្នុងមួយឆ្នាំក្រុមនិស្សិត និងសាស្ដ្រាចារ្យស្ម័គ្រចិត្ដរបស់ពួកលោក ចុះមកកាន់ខេត្តសៀមរាបចំនួន២ដង ដើម្បីចូលរួមជួយលើកកម្ពស់វិស័យអប់រំនៅតាមជនបទ ក្នុងខេត្ដមួយនេះ។ គិតមកដល់ពេលនេះ ក្រុមរបស់លោកបានចុះជួយដល់សាលាជាង១០កន្លែងហើយ ដោយសាលារៀននិមួយៗចំណាយទឹកប្រាក់៩ពាន់ដុល្លា ព្រមទាំងបានផ្ដល់ជាសម្ភារៈកីឡាផងដែរ។ ជាមួយគ្នានោះដែរ លោកមានគម្រោងផ្ដល់អាហាររូបករណ៍ ដល់និស្សិតខ្មែរទៅសិក្សានៅសាកលវិទ្យាល័យកេម្យ៉ាប្រទេសកូរ៉េ ខណៈដែលបច្ចុប្បន្ននេះ ក៏មាននិស្សិតខ្មែរកំពុងសិក្សានៅទីនោះផងដែរ។
លោក ហ៊ាន បញ្ញា តំណាងប្រធានការិយាល័យអប់រំយុវជន និងកីឡា ស្រុកពួកខេត្ដសៀមរាប បង្ហាញថា សាលាបឋមសិក្សាយាង ធ្លាប់ជាអតីតកន្លែងឃុំឃាំង មនុស្សកាលពីសម័យប៉ុលពត។ ដោយឡែក បន្ទាប់ពីប្រទេសមានសុខសន្តិភាព សាលារៀនមួយនេះ បានក្លាយទៅជាកន្លែងផ្ដល់នូវចំណេះវិជ្ជាដល់កូនខ្មែរទូទៅសារជាថ្មី។ ទន្ទឹមនោះ បណ្ណាល័យ ដែលជាការឧបត្ថម្ភរបស់ក្រុមនិស្សិត និងសាស្ដ្រាចារ្យស្ម័គ្រចិត្ដ របស់សាធារណរដ្ឋកូរ៉េនេះនាពេលនេះ វាមានសារៈសំខាន់ណាស់ សម្រាប់ជាកន្លែងផ្ទុកឯកសារជំនួយដល់ការសិក្សា និងអានកំសាន្តរបស់សិស្សានុសិស្ស។
បណ្ណាល័យនៅក្នុងសាលាបឋមសិក្សាយាងនេះ មានសារៈសំខាន់ណាស់ សម្រាប់ជាកន្លែងផ្ទុកឯកសារជំនួយដល់សិស្សានុសិស្សតូចៗសិក្សា និងអានកំសាន្តបន្ថែម ដែលវាបាន។ លោកក៏បាន អំពាវនាវដល់និស្សិតកូរ៉េ បន្ដជួយដល់វិស័យអប់រំនៅសាលាបឋមសិក្សានេះបន្ថែមទៀត ដើម្បីបន្ដអភិវឌ្ឍន៍សាលានេះក្លាយជាសាលាកុមារមេត្រី៕
អត្ថបទ និង រូបភាព៖ បូ សាវី
កែសម្រួលអត្ថបទ៖ សេង ផល្លី
