ស្ថានទូតជប៉ុន សម្តែងនូវការអបអរសាទរ និងរៀបចំពិធីប្រគល់ គ្រឿងឥស្សរិយយសលំដាប់ព្រះអាទិត្យ-កាំរស្មីមាស ( The Order of the Rising Sun. Gold Rays With Neck Ribbon ) សម្រាប់សរទរដូវឆ្នាំ២០១៩ ចំពោះឯកឧត្តមឧកញ៉ាបណ្ឌិត សៀង ណាំ សមាជិកសភាជាតិ នៃព្រះរាជាណាចក្រកម្ពុជា ប្រចាំមណ្ឌលសៀមរាប ។ គ្រឿងឥស្សរិយយសនេះ គឺមានតម្លៃនៃការទទួលស្គាល់ថា ៖ ឯកឧត្តមឧកញ៉ា បណ្ឌិត សៀង ណាំ បានបំពេញបេសកកម្មរបស់ខ្លួន ចូលរួមវិភាគទានយ៉ាងសំខាន់និងធំធេងបំផុត ក្នុងការពង្រឹងទំនាក់ទំនងទ្វេភាគី និងរឹតចំណងមិត្តភាពរវាងប្រទេសជប៉ុន និងព្រះរាជាណាចក្រកម្ពុជា ។
ពិធីនេះបានរៀបចំឡើង នៅសណ្ឋាគាសូហ្វីតែល ភូគីត្រា ខេត្តសៀមរាប រាត្រីថ្ងៃទី១៣ ខែមករា ឆ្នាំ២០២០ ។ នៅក្នុងពិធីនោះរួមមានវត្តមានឯកឧត្តម Mitani Masahiro ឯកអគ្គរាជទូតជប៉ុន ប្រចាំនៅកម្ពុជា ឯកឧត្តម Nakane kazuyuki សមាជិកសភាជប៉ុន និងសហការី ។ ឯកឧត្តម ហ៊ុន ម៉ានី សមាជិកសភា ប្រធានគណកម្មការទី៧ នៃរដ្ឋសភាជាតិនៃកម្ពុជា ក្រុមប្រឹក្សានិងគណអភិបាលខេត្ត មន្រ្តីសំខាន់ៗជុំវិញខេត្ត គណអភិបាលនិងក្រុមប្រឹក្សាក្រុង-ស្រុកទាំង១២ រួមទាំងអាជីវករ ពាណិជ្ជករមួយចំនួនទៀត ក៏មានវត្តមានចូលរួមអបអរសាទរផងដែរ ។
នៅក្នុងសេចក្តីថ្លែងសន្ទរកថារបស់ ឯកឧត្តម មីកាមិ ម៉ាសាហ៊ីរ៉ូ ឯកអគ្គរាជទូតជប៉ុន ប្រចាំនៅកម្ពុជា បានបង្ហាញអំពីសកម្មភាពនិងស្នាដៃរបស់ឯកឧត្តមឧកញ៉ាបណ្ឌិត សៀង ណាំ ក្នុងការរួមចំណែកជាមួយរាជរដ្ឋាភិបាលកម្ពុជា ពង្រឹងទំនាក់ទំនងមិត្តភាពរវាងជប៉ុន និងកម្ពុជា ។ សន្ទរកថានោះ បានវាយតម្លៃថា ឯកឧត្តម សៀង ណាំ មានជំហរគាំទ្រនិងបង្កើតទំនាក់ទំនងល្អបំផុតជាមួយសភា រដ្ឋាភិបាល វិនិយោគិន ប្រជាជនជប៉ុន និងសប្បុរសជនជប៉ុន ។
ឯកឧត្តម សៀង ណាំ បានបង្ហាញនូវរំភើប ដឹងគុណក្រៃលែង ចំពោះព្រះហឬទ័យប្រោសប្រទាននៃព្រះចៅអធិរាជជប៉ុន ។ នៅក្នុងចំណាប់អារម្មណ៍របស់ឯកឧត្តម បានវាយតម្លៃថា ៖ នេះគឺជាមហាកិត្តិយសដ៏ថ្លៃថ្លាបំផុត ដែលមិនត្រឹមតែសម្រាប់ឯកឧត្តមផ្ទាល់និងក្រុមគ្រួសារប៉ុណ្ណោះទេ តែជាការផ្តល់កត្តិយសជូនដល់ប្រជារាស្រ្តកម្ពុជាទាំងមូល ជាពិសេសសម្រាប់សភាជាតិ និងរាជរដ្ឋាភិបាលកម្ពុជាផងដែរ ។ ជូនពរសូមឲ្យចំណងសាមគ្គីភាព មិត្តភាព និងកិច្ចសហប្រតិបត្តិការ រវាងប្រទេស និងប្រជាជនទាំងពីរ ( កម្ពុជា-ជប៉ុន ) កាន់តែរឹងមាំ រីកចម្រើន និងស្ថិតស្ថេរយូរអង្វែង តទៅ ។
ព័ត៌មានជាតិ ថ្មីៗ
ឯកឧត្តម ហ៊ុន ម៉ានី មានប្រសាសន៍ថា ៖ ក្នុងបរិយាកាសនេះ គឺជាការឆ្លុះបញ្ចាំងអំពីទំនាក់ទំនងទ្វេភាគីរវាងកម្ពុជា-ជប៉ុន ចាប់តាំងពីឆ្នាំ១៩៥៣ មកដល់បច្ចុប្បន្ននេះ ដោយបានឆ្លងកាត់តំណាក់កាលទាំងការលំបាកនិងសន្តិភាព ។ យ៉ាងណាក៏ដោយ អ្វីដែលបានកត់សម្គាល់ គឺរដ្ឋាភិបាលនៃប្រទេសទាំង២ បានបន្តថែរក្សាទំនាក់ទំនងល្អជាមួយគ្នា រហូតមកដល់ឆ្នាំ២០២០នេះ ទំនាក់ទំនងផ្លូវការ បានឈានចូលដល់កម្រឹតដៃគូ ជាយុទ្ធសាស្រ្ត ហើយដែលការវិវត្តចុងក្រោយនេះ គឺមិនអាចកាត់ផ្តាច់បានពីកត្តាទំនាក់ទំនងល្អ រវាងប្រមុខដឹកនាំនៃប្រទេសទាំង២ នោះឡើយ ។សមិទ្ធផលរបស់ឯកឧត្តម សៀង ណាំ ក្នុងថ្ងៃនេះ បានបង្ហាញអំពីភាពនៃគំរូល្អ និងជាភាពតំណាងនៃប្រពៃណីរបស់គណបក្សប្រជាជនកម្ពុជា ក្នុងតួនាទីជាអ្នកបំរើជាតិ និងប្រជាជន ។
ស្ថានទូតជប៉ុន បានឲ្យដឹងថា ៖ គ្រឿងឥស្សរិយយសលំដាប់ព្រះអាទិត្យ-កាំរស្មីមាស ( The Order of the Rising Sun. Gold Rays With Neck Ribbon ) សម្រាប់សរទរដូវឆ្នាំ២០១៩នេះ គឺត្រូវបានប្រគល់ជូនដល់ឥស្សរជនជាន់ខ្ពស់ ដែលជាប្រមុខរដ្ឋ អតីតប្រមុខរដ្ឋ រដ្ឋសភា ព្រឹទ្ធសភា មេទ័ព រដ្ឋមន្រ្តី អនុមន្ត្រី ថ្នាក់ដឹកនាំអង្គការសង្គមស៊ីវិល និងវិស័យឯកជន សរុប ១៣៦នាក់ នៅលើពិភពលោក ។
បើតាមយោងតាមឯកសារបង្ហាញដោយស្ថានទូតជប៉ុន គ្រឿងឥស្សរិយយសលំដាប់ព្រះអាទិត្យ នៃប្រទេសជប៉ុន បង្កើតឡើងនៅក្នុងឆ្នាំ១៨៧៥ ដោយព្រះចៅអធិរាជ ម៉ីជិ (Meiji) ជប៉ុន ។ ដែលដំបូងឡើយ គឺជាគ្រឿងឥស្សរិយយសសម្រាប់តែឥស្សរជនជប៉ុនប៉ុណ្ណោះ ដែលមានការទទួលស្គាល់ពីរដ្ឋាភិបាលជប៉ុន ដោយអនុក្រិត្យនៃក្រុមប្រឹក្សារដ្ឋជប៉ុន នាថ្ងៃទី១០ ខែមេសា ឆ្នាំ១៨៧៥ ។ ចំណែកឯនិមិត្តសញ្ញា គឺមានលក្ខណៈពិសេសរបស់ពន្លឺកាំរស្មីនៃព្រះអាទិត្យរះ ប្រកបដោយថាមពល និងមានអនុភាព ៕
អត្ថបទ និង រូបភាព៖ ងិន គីមឡេង
