ការជម្រុញឲ្យមន្រ្តីដែលមានតួនាទី-ភារកិច្ចបំពេញការងាររដ្ឋ បំរើផលប្រយោជន៍ជូនប្រជាពលរដ្ឋ ដើម្បីភាពរីកចម្រើននៃសង្គមជាតិ ត្រូវបានឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប លើកឡើងនៅក្នុងកិច្ចប្រជុំសាមញ្ញលើកទី៨ របស់ក្រុមប្រឹក្សាខេត្តសៀមរាប អាណត្តិទី៣ ហើយអ្វីដែលឯកឧត្តមសង្កត់ធ្ងន់នោះ គឺការលើកយកប្រសាសន៍ដ៏មានតម្លៃនៃសម្តេចតេជោ ហ៊ុន ហ៊ុន ប្រមុខនៃរាជរដ្ឋាភិបាលកម្ពុជា ក្នុងការជម្រុញឲ្យមន្រ្តីរាជការ រួមទាំងថ្នាក់ដឹកនាំផងដែរ ត្រូវចេះប្រើដាវអំណាចការងារ ត្រួសត្រាយ វះកាត់ សម្រេចកិច្ចការឲ្យមានប្រសិទ្ធភាព ។ ការរំលឹកនិងជម្រុញបែបនេះ គឺជាបំណងបង្ការ ការពារ និងចៀសវាង ការដែលទុកឲ្យចំណុចអវិជ្ជមានសេសសល់ដោយមិនមានដំណោះស្រាយ មិនគោរពសមត្ថកិច្ចរបស់ខ្លួន ក្លាយជាទម្លាប់មិនល្អ បង្កផលវិបាកសម្រាប់ការដោះស្រាយមិនចប់នោះ ។
លោក ពៅ ពិសិដ្ឋ អភិបាលរងខេត្តសៀមរាប ដែលបានដឹកនាំមន្រ្តីជំនាញចូលរួមក្នុងកិច្ចប្រជុំនោះ លើកឡើងថា ៖ នៅក្នុងសម័យកាលបច្ចេកវិទ្យាទំនើបនេះ អ្វីៗដែលកើតឡើងក្នុងសង្គម វាមិនមែនជាអាថ៌កំបាំងនោះឡើយ វានឹងកើតឡើងនូវប្រតិកម្មភ្លាមៗពីសំណាក់មហាជន ។ បើជាការរិះគន់នោះក្នុងបំណងដើម្បីស្ថាបនា នោះវាជារឿងដ៏ល្អសម្រាប់ការទទួលយកដើម្បីកែលម្អ តែវានឹងអាចជាការរិះគន់ ក្នុងន័យនយោបាយផ្សេងទៀត នាំឲ្យមានការប៉ះពាល់ ដល់ការដឹកនាំរបស់អាជ្ញាធរខេត្ត ក៏អាចថាបាន ដូច្នេះមន្រ្តីជំនាញទទួលខុសត្រូវគ្រប់បណ្តាស្ថាប័ន-អង្គភាពទាំងអស់ ត្រូវបង្កើនការយកចិត្តទុកដាក់ ចៀសវាងឲ្យបានសម្រាប់ប្រការចុងក្រោយនេះ ដោយការអនុវត្តភារកិច្ចដើម្បីសង្គមជាតិរីកចម្រើន និងដើម្បីមោទនភាពរបស់ថ្នាក់ដឹកនាំ ។
កិច្ចប្រជុំនេះ ធ្វើឡើងនាព្រឹកថ្ងៃទី១៤ ខែមករា ឆ្នាំ២០២០ នៅសាលាខេត្តសៀមរាប ។ របៀបវារៈមានចំនួន៥ជាសំខាន់ ក្នុងនោះជាលទ្ធផលដែលកត់សម្គាល់ គឺការអនុម័តរបស់កិច្ចប្រជុំទៅលើរបៀបវារៈទី៣ និងទី៤ ដែលគណកម្មាធិការពិគ្រោះយោបល់ស្រ្តីនិងកុមារ ស្នើឲ្យពិនិត្យ-ពិភាក្សា លើផែនការសកម្មភាពឆ្នាំ២០២០ ដែលមានគម្រោងជិត ៣០០សកម្មភាព និង ផែនការថវិកាប្រចាំឆ្នាំ២០២០ របស់ខ្លួន មានទំហំទឹកប្រាក់ប្រមាណជិត ៩៤លានរៀល ដែលទទួលបានមកពិការសន្យាគាំទ្រដោយ រដ្ឋបាលខេត្តសៀមរាប ផែនការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ យូនីសែហ្វ និងអង្គការជាដៃគូមួយចំនួនទៀត ដោយសុំបញ្ចូលផែកនការថវិកានេះ ទៅក្នុងកម្មវិធីវិនិយោគ ៣ឆ្នាំរំកិល ( ២០២០-២០២៣ ) ៕
អត្ថបទ និង រូបភាព៖ ងិន គីមឡេង
