ក្រោយពីបានពិនិត្យវាយតម្លៃឃើញថា ភាគច្រើនលើសលុបនៃអាជីវកម្មបូមខ្សាច់នៅទូទាំងស្រុកបន្ទាយស្រី មិនបានអនុលោមទៅតាមច្បាប់កំណត់ រដ្ឋបាលស្រុកបន្ទាយស្រី ដោយមានការឯកភាពពីមន្ទីររ៉ែនិងថាមពលខេត្តសៀមរាប បានសម្រេចផ្អាកការដ្ឋានបូមខ្សាច់និងបកខ្សាច់យ៉ាងហោចណាស់១៦កន្លែង ដែលមានទីតាំងនៅក្នុងស្រុកបន្ទាយស្រី ចាប់ពីថ្ងៃទី១៣ ខែមករា ឆ្នាំ២០២០នេះ។
លោក ឃឹម ហ្វីណង់ អភិបាលស្រុកបន្ទាយស្រីបានប្រាប់ យើងតាមទូរស័ព្ទដៃនៅព្រឹកថ្ងៃទី១៤ ខែមករា ឆ្នាំ២០២០នេះថាចំណាត់ការនេះ គឺជាវិធានការចាំបាច់ដើម្បីការពារប្រយោជន៍រួម ធ្វើអោយមានរបៀបរៀបរយឡើងវិញនៃសណ្តាប់ធ្នាប់សាធារណៈ និងធានាមិនអោយមានផលប៉ះពាល់ដល់សហគមន៍ និងប្រជាពលរដ្ឋ ក៏ដូចជា ដើម្បីបង្កើនប្រសិទ្ធភាពនៃការគ្រប់គ្រងអាជីវកម្មបូមខ្សាច់នៅក្នុងស្រុកបន្ទាយស្រីទាំងមូល។
ក្រោយការត្រួតពិនិត្យវាយតម្លៃយ៉ាងម៉ត់ចត់ពីសំណាក់មន្ទីរជំនាញ រដ្ឋបាលខេត្ត និងរដ្ឋបាលស្រុក យើងបានរកឃើញថា ៖ ការដ្ឋានមួយចំនួនមិនមានច្បាប់អនុញ្ញាត មួយចំនួនអនុវត្តខុសពីទីតាំង និងទំហំដែលច្បាប់អនុញ្ញាត មួយចំនួនទៀតមិនគោរពតាមបទដ្ឋានបច្ចេកទេសត្រឹមត្រូវ ដោយបិទបំពានយកអូរប្រឡាយដោយខុសច្បាប់ និងចាក់បញ្ចូលទឹកកខ្វក់ចូលទៅក្នុងប្រព័ន្ធប្រើប្រាស់ទឹករួមរបស់ប្រជាពលរដ្ឋមានផលប៉ះពាល់ដល់សហគមន៍ និង ការធ្វើកសិកម្មប្រជាពលរដ្ឋ ហើយក៏ដូចជាប៉ះពាល់ទៅលើហេដ្ឋារចនាសម្ព័ន្ធផ្លូវថ្នល់អូរប្រលាយ និងបានបំផ្លាញប្រព័ន្ធជីវចម្រុះនានាផងដែរ។
លោកអភិបាលស្រុកបានបន្តទៀតថា ការផាកពិន័យ តម្រូវអោយម្ចាស់អាជីវកម្មដែលខុសច្បាប់ ត្រូវរៀបចំទីតាំងដែលត្រូវបានរំលោភបំពានអោយដូចដើមវិញ និងធានាអោយបានថាមិនមានទឹកកខ្វក់ហូរចូលប៉ះពាល់ទៅដល់ទឹកប្រើប្រាស់របស់ប្រជាពលរដ្ឋទៀត
គួរបញ្ជាក់ផងដែរ ៖ ម្ចាស់អាជីវកម្មបូមខ្សាច់រឺបកខ្សាច់ទាំងអស់នៅក្នុងស្រុកបន្ទាយស្រីទាំងមូលត្រូវបញ្ឈប់សកម្មភាពរបស់ខ្លួនទាំងស្រុងចាប់ពីថ្ងៃទី១៣ ខែមករានេះតទៅទោះជាមានអាជ្ញាបណ្ណហើយក៏ដោយ និងត្រូវទំនាក់ទំនងមករដ្ឋបាលស្រុកបន្ទាយស្រី ដើម្បីពិនិត្យ និងសម្របសម្រួលស្នើសុំអាជ្ញាបណ្ណឡើងវិញ ប្រសិនបើចង់បន្តសកម្មភាពរបស់ខ្លួន។ ចាប់ពីថ្ងៃនេះតទៅ រាល់ការដ្ឋានអាជីវកម្មបូមខ្សាច់ទាំងអស់នៅក្នុងស្រុកបន្ទាយស្រីនឹងតម្រូវអោយមានការលើកផ្លាកសញ្ញាបញ្ជាក់ពីការទទួលបានអាជ្ញាបណ្ណថ្មីរបស់ខ្លួននៅមុខការដ្ឋាន រណ្តៅខ្សាច់នីមួយៗ បើមិនដូច្នេះទេ រដ្ឋបាលស្រុកនឹងមិនអនុញ្ញាតអោយប្រតិបត្តិការអាជីវកម្មរបស់ខ្លួនឡើយ។
អត្ថបទ និង រូបភាព៖ គឿនវេត
កែសម្រូល ហាំ ម៉េងហួត
