នោថ្ងៃទី១៥ ខែមករា ឆ្នាំ២០២០នេះ ឯកឧត្តម ង៉ាន់ ភិរុណ អភិបាលរងខេត្ត តំណាងឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានដឹកនាំកិច្ចប្រជុំស្តីពីការពិនិត្យសេចក្តីព្រាងកម្មវិធីវិយោគបីឆ្នាំរំកិល ២០២០-២០២២ របស់រដ្ឋបាលខេត្តសៀមរាប ដោយមានការអញ្ជើញចូលរួមពីសំណាក់លោកជំទាវ លោក លោកស្រី សមាជិក សមាជិកាក្រុមការងារកសាងផែនការអភិវឌ្ឍរយៈពេលប្រាំឆ្នាំ និងកម្មវិធីវិនិយោគបីឆ្នាំរំកិលរបស់រដ្ឋបាលខេត្ត មន្រ្តីជំនាញ និងតំណាងអង្គការសង្គមស៊ីវិលពាក់ព័ន្ធនានា ។
ឯកឧត្តម ង៉ាន់ ភិរុណ មានប្រសាសន៍ថា កិច្ចប្រជុំក្នុងឱកាសនេះ គឺមានគោលបំណង ដើម្បីផ្សព្វផ្សាយជូនលោក លោកស្រី ដែលជាថ្នាក់ដឹកនាំខេត្ត ថ្នាក់ដឹកនាំមន្ទីរ អង្គភាពជុំវិញខេត្ត ថ្នាក់ដឹកនាំក្រុង ស្រុក ទីចាត់ការ អង្គភាពចំណុះសាលាខេត្ត តំណាងដៃគូអភិវឌ្ឍន៍ និងអង្គការសង្គមស៊ីវិលពាក់ព័ន្ធនានា ដើម្បីបានជ្រាបអំពីគោលការណ៍បែបបទ និងនីតិវីធី នៃការរៀបចំកម្មវិធីវិនិយោគ៣ឆ្នាំរំកិលរបស់រដ្ឋបាលខេត្ត ។ ជាពិសេស ដើម្បីពិនិត្យមើលនូវរាល់គម្រោង និងសកម្មភាព ដែលបានលើកឡើងសម្រាប់អនុវត្តក្នុងឆ្នាំ២០២០នេះ ដោយធ្វើការពិនិត្យ និងផ្ទៀងផ្ទាត់សកម្មភាព ដែលគាំទ្រដោយមន្ទីរ អង្គភាពជំនាញជាមួយនឹងសកម្មភាពផ្សេងៗ ដែលគាំទ្រដោយរដ្ឋបាលខេត្ត និងសកម្មភាពរបស់រដ្ឋបាលក្រុង ស្រុក ព្រមទាំងផ្ទៀងផ្ទាត់សកម្មភាពទាំងនេះជាមួយរដ្ឋបាលឃុំ សង្កាត់ ជៀសវាងការលើកគម្រោងសម្រាប់អនុវត្តមានការជាន់គ្នា លើទីតាំងតែមួយនៅក្នុងគម្រោងផ្នែកហេដ្ឋារចនាសម្ព័ន្ធ ។
ក្នុងនោះដែរ ឯកឧត្តមអភិបាលរងខេត្ត ក៏បានស្នើសុំឲ្យសមាជិក សមាជិកា នៃកិច្ចប្រជុំទាំងអស់ ត្រូវបង្កើនការយកចិត្តទុកដាក់ និងចូលរួមលើដំណើរការកសាងកម្មវិធីវិនិយោគបីឆ្នាំរំកិលរបស់រដ្ឋបាលខេត្ត ឱ្យមានលក្ខណៈកាន់តែប្រសើរឡើងថែមទៀត ដើម្បីធ្វើឲ្យការកសាងកម្មវិធីវិនិយោគនេះ មានភាពកាន់តែសុក្រឹត្យទៅនឹងតម្រូវការរបស់ប្រជាពលរដ្ឋនៅមូលដ្ឋាន ។ ក្នុងនោះអង្គភាពជំនាញជុំវិញខេត្ត រដ្ឋបាលក្រុង ស្រុកទាំងអស់ ត្រូវរៀបចំធ្វើបច្ចុប្បន្នភាពរបាយការណ៍ឡើងវិញឲ្យបានឆាប់រហ័ស ដើម្បីដាក់ឆ្លងក្នុងកិច្ចប្រជុំគណៈអភិបាលខេត្ត រួចហើយស្នើសុំការអនុម័តពីក្រុមប្រឹក្សាខេត្ត ។
អត្តបទនិងរូបភាព៖រដ្ឋបាលខេត្តសៀមរាប
