នៅថ្ងៃទី១៤ ខែមករា ឆ្នាំ២០២០២ លោកជំទាវ វេជ្ជ.បណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី បានដឹកនាំរៀបចំការធ្វើដំណើរទស្សនកិច្ចសិក្សាអំពីការអនុវត្តគម្រោងបង្កើនភាពអង់អាចផ្នែកសេដ្ឋកិច្ចដល់ស្រ្តី នៅសហគមន៍ទេសចរណ៍វប្បធម៌ខ្នារពោធិ៍ ដែលស្ថិតនៅក្នុងឃុំខ្នារពោធិ៍ ស្រុកសូទ្រនិគម និងសហគមន៍ទេសចរណ៍វប្បធម៌កំពង់ភ្លុក ស្ថិតិនៅក្នុងឃុំកំពង់ភ្លុក ស្រុកប្រាសាទបាគង ដើម្បីស្វែងយល់អំពីជីវភាពរស់នៅរបស់សមាជិកក្រុមគោលដៅ និងដំណើរការនៃការអនុវត្តគម្រោងស្តីពី ការបញ្ជ្រាបយេនឌ័រសម្រាប់បង្កើនភាពភាពអង់អាចផ្នែកសេដ្ឋកិច្ចដល់ស្រ្តី ។ ដំណើរទស្សនកិច្ចនេះដែរ ក៏មានការអញ្ជើញចូលរួមអមដំណើរពីបណ្តាលក្រសួងពាក់ព័ន្ធ អាជ្ញាធរខេត្ត ស្រុក ឃុំ ភូមិ និងសហគមន៍ផងដែរ ។
លោកស្រី យូ សុភា អភិបាលរងខេត្តសៀមរាប និងជាប្រធានក្រុមការងារបង្កើនភាពអង់អាចផ្នែកសេដ្ឋកិច្ចដល់ស្រ្តី នៅក្នុងពីរសហគមន៍ខាងលើ បានជម្រាបជូន ដល់លោកជំទាវប្រធានប្រតិភូ និងគណៈប្រតិភូអន្តរក្រសួង អំពីការអនុវត្តគម្រោង ដែលមានការគាំទ្រពីអ្នកជំនាញការអង្គការចាយការជប៉ុន ក្រោមការសម្របសម្រួលពីក្រសួងកិច្ចការនារី ដោយបានបញញជាក់ថាគម្រោងនេះ គឺក្រុមការងារបានធ្វើការគាំទ្រតែលើផ្នែកបច្ចេកទេសជូនដល់សមាជិកសហគមន៍តែប៉ុណ្ណោះ ដែលមានការចូលរួមផ្តល់បច្ចេកទេសពី មន្ទីរកិច្ចការនារី មន្ទីរកសិកម្ម មន្ទីរអភិវឌ្ឍន៍ជនបទ មន្ទីរផែនការ មន្ទីរទេសចរណ៍ មន្ទីរការងារនិងបណ្តុះបណ្តាលវិជ្ជាជីវៈ មន្ទីរឧស្សាហ៍កម្ម និងមន្ទីរពាណិជ្ជកម្ម ។
មានប្រសាសន៍ក្នុងឱកាសនោះដែរ លោកជំទាវ វេជ្ជ.បណ្ឌិត អ៊ឹង កន្ថាផាវី ក៏បានថ្លែងអំណរគុណដល់ក្រុមការងារអន្តរក្រសួង អន្តរមន្ទីរ និងអាជ្ញាធរខេត្ត ស្រុក ឃុំ ភូមិ ពិសេសអង្គការការាចាយការជប៉ុន ដែលបានយកចិត្តទុកដាក់លើបញ្ហារបស់ស្រ្តី ពិសេសការបង្កើតជាសហគមន៍ដែលមានស្រ្តីចូលរួមជាសមាជិកជាច្រើន បង្កើតបានជាសេវាកម្ម សម្រាប់រកប្រាក់ចំណូលក្នុងសហគមន៍ ដែលបានចូលរួមការបន្ថយភាពក្រីក្ររបស់ប្រជាពលរដ្ឋ ហើយទប់ស្កាត់នៅការធ្វើចំណាកស្រុកបានទៀត នេះជាសកម្មភាពដ៏ល្អ គួរឲ្យកោតសសរសើរពិតមែន ។
លោកជំទាវរដ្ឋមន្រ្តី ក៏បានផ្តាំផ្ញើដល់សហគមន៍ទាំងអស់ធ្វើយ៉ាងណារក្សានូវអាជីវកម្ម សិប្បកម្ម ដែលមានស្រាប់នៅក្នុងសហគន៍ ហើយត្រូវបង្កើនគុណភាព សុវត្ថិភាព អនាម័យ ពិសេសជំនាញទន់ ក្នុងការទំនាក់ទំនង ជាមួយភ្ញៀវទេសចរណ៍ជាតិ អន្តរជាតិ សំដៅឲ្យសហគមន៍យើងកាន់តែមានភាពទាក់ទាញ ប្រកបដោយសេវាកម្មល្អ សហគមន៍ស្អាត មានសុខសុវត្ថិភាព និងសន្តិភាព ។
គួរឲ្យដឹងថា ដំណើរទស្សនកិច្ចនេះដែរ គណៈប្រភូ បានទៅទស្សនាផ្ទះស្នាក់នៅក្នុងសហគមន៍ខ្នារពោធិ៍ ទស្សនាប្រាសាទបន្ទាយអំពិល និងទស្សនាសហគមន៍អភិរក្សព្រៃឈើ និងសត្វដំរី ដែលស្ថិតិក្នុងឃុំខ្នារពោធិ៍ ស្រុកសូត្រនិគម និងពេលរសៀល ទស្សនាន្លែងអភិរក្សត្រីមេពូជជ្រោយឆ្នាំ របស់សហគមន៍នេសាទកំពង់ភ្លុក និងទស្សនាថ្ងៃលិចនៅបឹងទន្លេសាប នៅសហគមន៍កំពង់ភ្លុក ស្រុកប្រាសាទបាគងផងដែរ ៕
អត្តបទនិងរូបភាព៖រដ្ឋបាលខេត្តសៀមរាប