ថ្ងៃទី១៤ ខែមករា ឆ្នាំ២០២០ ក្នុងពិធីជួបជុំលើកទី៤ ជាមួយអ្នកសារព័ត៌មាន សម្តេចតេជោនាយករដ្ឋមន្ត្រី បានបង្ហាញពាក្យពាក្យស្លោកថា «អ្នកសារព័ត៌មានកុំបំពានសិទ្ធិអ្នកដទៃ កុំបំភ្លៃការពិត» ។ សម្តេចតេជោចាត់ទុកថា ពាក្យស្លោកនេះ គឺជាមន្តអាគមន៍ ឬក៏ជាកន្សែងយ័ន្ត សម្រាប់អ្នកសារព័ត៌មានការពារខ្លួន ចៀសវាងការកើតឡើងនូវកំហុសឆ្គង ។ ជាមួយនេះ សម្តេចតេជោ ក៏បានបញ្ចេញអានុសាសន៍មួយចំនួនផងដែរ ដែលត្រូវអនុវត្តបន្ត ៖អ្នកសារព័ត៌មានទាំងអស់ ត្រូវចូលរួមថែរក្សាសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សង្គម ( ទាំងអស់គ្នាដើម្បីសន្តិភាព សន្តិភាពដើម្បីីយើងទាំងអស់គ្នា )។ ក៏ដើម្បីផលប្រយោជន៍ជាតិផងដែរ អ្នកសារព័ត៌មាន ត្រូវរួមចំណែក ក្នុងការរក្សាស្ថិរភាពម៉ាក្រូសេដ្ឋកិច្ច ។ ព័ត៏មានមិនពិត វាបង្កឲ្យមានផលប៉ះពាល់យ៉ាងខ្លាំងដល់វិស័យនេះ ។
ស្ថាប័នជាតិ និងថ្នាក់ក្រោមជាតិត្រូវមានអ្នកនាំពាក្យច្បាស់លាស់ ក្នុងការឆ្លើយឆ្លងជាមួយអ្នកសារព័ត៌មាន ។ មន្រ្តីរាជរដ្ឋាភិបាល មិនត្រូវខ្លាចអ្នកសារព័ត៌មាននោះទេ ហើយកុំចាត់ទុកអ្នកសារព័ត៌មានជាសត្រូវ តែត្រូវចាត់ទុកអ្នកសារព័ត៌ជាដៃគូរមិនអាចខ្វះបាន សម្រាប់ស្ថាប័ន-អង្គភាពរបស់ខ្លួន។ អភិបាលខេត្ត ឬក៏រដ្ឋមន្រ្តី ក៏ត្រូវបង្ហាញមុខ បកស្រាយបំភ្លឺ ឆ្លើយឆ្លងផ្ទាល់ ជាមួយអ្នកសារព័ត៌មាន ក្នុងករណី ឬពេលវេលា ចាំបាច់ ។
អ្នកសារព័ត៌មាន ត្រូវតែជាស្ពានចម្លង ពាំនាំព័ត៌មានពីរាជរដ្ឋាភិបាលទៅសហគមន៍ប្រជាពលរដ្ឋ នាំយព័ត៌មានពីសហគន៍ប្រជាពលរដ្ឋមកកាន់រារដ្ឋាភិបាល និងត្រូវចូលរួមជួយរិះគន់ដើម្បីស្ថាបនា ។ អ្នកនាំពាក្យតាមក្រសួង-ស្ថាប័នរដ្ឋ ត្រូវផ្តល់ព័ត៌មាន ឲ្យអ្នកសារព័ត៌មានរហ័សទាន់ហេតុការណ៍ ដើម្បីផ្សព្វផ្សាយ ជូនប្រជាពលរដ្ឋបានដឹងជ្រួតជ្រាប។
អ្នកសារព័ត៌មានទាំងអស់ មានតួនាទី និងមិនអាចខ្វះបានទេ ក្នុងការចូលរួមផ្សព្វផ្សាយ ប្រឆាំងរាល់អំពើអសកម្មនានាក្នុងសង្គម ប្រឆាំងអំពើពុករលួយ-អយុត្តិធម៌ និង គ្រឿងញៀន ដើម្បីឆ្លុះបញ្ចាំងឲ្យឃើញថា កម្ពុជាត្រូវការសង្គមមួយដ៏ស្អាតស្អំ ។ ក៏ជាការចាំបាច់បំផុត អ្នកសារព័ត៌មានត្រូវតែប្រើប្រាស់ឆន្ទ:ក្នុងតួនាទីប្រយុទ្ធប្រឆាំងព័ត៌មានក្លែងក្លាយ និងតបត បន្សាបព័ត៏មានមិនពិត ដោយការបញ្ចេញប្រតិកម្មរហ័ស ឆ្លើយតបវិញភ្លាមៗ នូវព័ត៌មានពិត ឆ្លើយតប ។
ត្រូវខិតខំសម្រេចឲ្យបាន ការអភិវឌ្ឍ ផ្ទេរការផ្សាយពីប្រព័ន្ធ អាណាឡុក (Analog system) ទៅកាន់ប្រព័ន្ឋឌីជីថល(Digital system) នៅក្នុងឆ្នាំ២០២៣ ។សម្តេចតេជោបានមានប្រសាសន៍បញ្ជាក់ថា ច្បាប់ស្តីពីសិទ្ធិទទួលបានព័ត៌មាន ត្រូវចេញអោយបានក្នុងឆ្នាំ២០២០នេះ ខណៈដែលសិទ្ធិនេះត្រូវបានរដ្ឋមន្ត្រីក្រសួងព័ត៌មាន បានស្នើជាយូរឆ្នាំមកហើយនោះ ។
ក៏ជាកត្តាដ៏សំខាន់ចាំបាច់ គឺការបណ្តុះបណ្តាលធនធានមនុស្សបន្ថែមទៀត ក្នុងវិស័យព័ត៌មាន។ មានការប្រើប្រាស់ឧបករណ៍-សម្ភារ:ទំនើប ការប្រើប្រាស់មនុស្ស ក៏ត្រូវតែជាធនធានមានសមត្ថភាព ដើរទាន់បច្ចេកវិទ្យាទាំងនោះ ជាមួយនឹងការខិតខំផលិតព័ត៌មានអោយបានលឿនរហ័ស និងជឿទុកចិត្តបាន ៕
