នៅក្នុងរដូវប្រាំងនេះ អាងតម្កល់ទឹកសម្រាប់ប្រើប្រាស់ក្នុងតំបន់អង្គរ អាចរក្សាទឹកទុកប្រើប្រាស់បានលើសពីមួយលានម៉ែត្រត្រីគុណ(ម៉ែត្រគូប) ជាមួយនោះ អាជ្ញាធរជាតិអប្សរា ពុំមានការព្រួយបារម្ភទេ ចំពោះបរិមាណទឹក សម្រាប់ទ្រទ្រង់គ្រឹះប្រាង្គប្រាសាទក្នុងឧទ្យានអង្គរ បើតាមប្រសាសន៍ លោក ឡុង កុសល អ្នកនាំពាក្យអាជ្ញាធរជាតិអប្សរា កាលពីថ្ងៃទី១៥ ខែមករា ឆ្នាំ២០២០។
លោកបានបង្ហាញថា អាងតម្កល់ទឹកទាំងនោះ រួមមានកសិន្ធុអង្គរធំ កសិន្ធុអង្គរវត្ត បារាយណ៍ខាងជើង និងបារាយណ៍ទឹកថ្លាខាងលិច។ ជាមួយនោះ នាកន្លងមកអាជ្ញាធរជាតិអប្សរា បានស្ដារ និងប្រើប្រាស់ឡើងវិញ នូវប្រព័ន្ធធារាសាស្ដ្របុរាណបានយ៉ាងល្អ ហើយប្រព័ន្ធទាំងនោះ បានបង្ហាញពីប្រសិទ្ធភាពក្នុងការរំដោះទឹកជំនន់ចេញពីរមណីយដ្ឋានអង្គរ ក៏ដូចជាតំបន់ក្រុងសៀមរាបទាំងមូល។ មិនតែប៉ុណ្ណោះ ការស្ដារឡើងវិញនូវប្រព័ន្ធប្រឡាយតូចៗជាច្រើនទៀត ដែលអាចធានាបាននូវការបញ្ចូលទឹកក្នុងកសិន្ធុប្រាសាទ ក៏ដូចជាបារាយណ៍បុរាណជាដើម បានធ្វើការគ្រប់គ្រងស្ថានភាពទឹកក្នុងតំបន់រមណីយដ្ឋានអង្គរ កាន់តែមានប្រសិទ្ធភាព។ ដោយឡែក ទឹកក្រោមដី ដែលមានក្នុងតំបន់ជុំវិញប្រាសាទធំៗ ក៏មិនមានបញ្ហាចោទឡើយ។
គួរបញ្ជាក់ថា ទឹកគឺមានសារៈសម្រាប់សំខាន់ណាស់នៅក្នុងតំបន់អង្គរ ក្រៅពីសម្រាប់ទ្រទ្រង់ដល់គ្រឹះប្រាសាទ ទឹកដែលនៅហ៊ុព័ន្ធប្រាសាទបុរាណជាពិសេសប្រាសាទនាគព័ន្ធ បានធ្វើឱ្យរុក្ខាជាតិបញ្ចេញពណ៌បៃតងខៀវខ្ចី ស្រស់ស្អាតគួរជាទីគយគន់ដែលបានទាក់ទាញ ភ្ញៀវទេសចរបានយ៉ាងច្រើន។
ព័ត៌មានជាតិ ថ្មីៗ
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
