វីរុសប្រភេទថ្មី ដូចទៅនឹងវីរុស ដែលបង្កឲ្យមានជំងឹសារស៍ កាលពីឆ្នាំ២០០៣នោះ ត្រូវបានរកឃើញជាថ្មីម្ដងទៀត នៅក្នុងប្រទេសចិន ថ្ងៃទី០៧ ខែមករា ឆ្នាំ២០២០ នេះបើតាមគេហទំហ្វេសប៊ុក នាយកដ្ឋានប្រយុទ្ធនឹងជំងឺឆ្លង (CDC) របស់ក្រសួងសុខាភិបាលកម្ពុជា កាលពីថ្ងៃទី១៦ ខែមករា ឆ្នាំ២០២០។
នាយកដ្ឋានប្រយុទ្ធនឹងជំងឺឆ្លង បានធ្វើបច្ចុប្បន្នភាព អំពីវីរុសប្រភេទថ្មីនេះ ថា គេបានរកឃើញមនុស្ស ដែលបានឆ្លងមេរោគជំងឺសារស៍ប្រភេទថ្មីនេះ ចំនួន៤៣ករណី ក្នុងនោះ ប្រជាជនក្នុងប្រទេសចិន ៤១ករណី ប្រជាជនជប៉ុន ១ករណី ដែលទើបត្រឡប់ពីប្រទេសចិន និងអ្នកទេសចរចិន ១ករណី នៅក្នុងប្រទេសថៃ។
នាយកដ្ឋានដដែល បានបញ្ជាក់ថា មកទល់ពេលនេះ ពុំទាន់មានករណីមេរោគជំងឺសារស៍ប្រភេទថ្មីនេះ មកដល់កម្ពុជាឡើយ។ ហើយជំងឺប្រភេទថ្មីនេះ មានប្រភពតែនៅក្នុងទីក្រុងអូហាន ប្រទេសចិនតែមួយប៉ុណ្ណោះ។
ប្រសិនបើអ្នកធ្វើដំណើរទៅកាន់ទីតាំងនៃប្រភពជំងឺខាងលើ នាយកដ្ឋានប្រយុទ្ធនឹងជំងឺឆ្លង បានណែនាំឲ្យពួកគេសង្កេតពីសុខភាពរបស់ខ្លួនដូចជា៖
– គ្រុនក្ដៅលើសពី ៣៨អង្សាសេ ក្អក ករណីធ្ងន់ធ្ងរ ហត់ ឬពិបាកដកដង្ហើម។
– អំឡុងពេល ១៤ថ្ងៃ បើមានអាការខាងបែបនេះ សូមស្វែងរកការព្យាបាលនៅមន្ទីរពេទ្យនៅជិតបំផុត និងប្រាប់ពីប្រវត្តិនៃការធ្វើដំណើរ ទៅកាន់ប្រទេសចិន។
សូមរំលឹកថា ជំងឺរលាកផ្លូវដង្ហើមធ្ងន់ធ្ងរ ដែលហៅថា ជំងឺសារស៍(SARS) បានផ្ទុះឡើងនៅឆ្នាំ២០០៣ មានប្រភពពីប្រទេសចិន បានសម្លាប់មនុស្ស ៧៧៤នាក់។ នៅឆ្នាំ២០១២ ជំងឺរលាកផ្លូវដង្ហើមធ្ងន់ធ្ងរម្យ៉ាងទៀត ហៅថា មើស(MERS) ត្រូវបានរកឃើញនៅអារ៉ាប៊ី សាអូឌី ដែលវាបានសម្លាប់ចំនួន៨៥១នាក់ នៅទូទាំងពិភពលោក។ សូមបញ្ជាក់ថា សារស៍ មើស និងជំងឺប្រភេទថ្មី ដែលទើបរកឃើញនៅឆ្នាំ២០២០នេះ មានសម្ព័ន្ធតែមួយទៅនឹង វីរុសកូរ៉ូណា។
អត្ថបទ៖ សេង ផល្លី
ប្រភព៖ នាយកដ្ឋានប្រយុទ្ធនឹងជំងឺឆ្លង CDC
