ក្នុងឱកាសបិទសន្និបាតបូកសរុបការងារឆ្នាំ២០១៩របស់មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប នាព្រឹកថ្ងៃទី១៧ ខែមករា ឆ្នាំ២០២០នេះ ឯកឧត្តម ណៅ ធួក រដ្ឋលេខាធិការ និងជាតំណាងដ៏ខ្ពង់ខ្ពស់ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ក្នុងឆ្នាំ២០១៩នេះ វិស័យកសិកម្មនៅខេត្តសៀមរាបពិតជាមានការរីកចម្រើនប្រកបដោយមោទនភាព ប៉ុន្តែក៏នៅមានបញ្ហាប្រឈមសំខាន់ៗមួយចំនួនទៀតដែលត្រូវដោះស្រាយ ដូច្នេះដើម្បីយកធ្វើជាមូលដ្ឋានអនុវត្តបន្តឲ្យកាន់តែប្រសិទ្ធភាពជាងនេះថែមទៀតនោះ សូមឲ្យថ្នាក់ដឹកនាំ និងមន្រ្តីនៃមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប ព្រមទាំងបណ្តាដៃគូពាក់ព័ន្ធនានា ពិនិត្យនិងពិចារណានូវបញ្ហាមួយចំនួនរួមមាន ៖
ទី១. ត្រូវលើកម្ពស់ការស្រាវជ្រាវ និងផ្សព្វផ្សាយកសិកម្មបន្ថែមទៀត ក្នុងទិសដៅបង្កើនបរិមាណ និងគុណភាពផលិតផលកសិកម្ម តាមរយៈការប្រើប្រាស់បច្ចេកវិទ្យា បច្ចេកទេស ក្នុងបរិការនៃការប្រែប្រួលអាកាសធាតុ ឆ្លើយតបទៅនឹងតម្រូវការទីផ្សារក្នុងស្រុក ,
ទី២. ត្រូវយកចិត្តទុកដាក់អភិវឌ្ឍន៍ប្រព័ន្ធធារាសាស្រ្ត គឺជាមធ្យោបាយចាំបាច់បំផុត ក្នុងការធ្វើកសិកម្ម ខណៈប្រព័ន្ធធារាសាស្រ្តរបស់យើងនៅមិនទាន់គ្របដណ្តប់ លើផ្ទៃដីដាំដុះឲ្យបានទូលាយ ,
ទី៣, ត្រូវជួយណែនាំដល់កសិករក្នុងការរៀបចំដីស្រែឱ្យបានត្រឹមត្រូវតាមបច្ចេកទេស ,
ទី៤. ត្រូវបន្តលើកកម្ពស់ការតាមដានចរន្តសត្វ អនាម័យសត្វ និងភូតគាមអនាម័យ ដោយយកចិត្តទុកដាក់ទៅលើយន្តការក្របខណ្ឌគតិយុត្ត និងបច្ចេកវិទ្យា ព្រមទាំងពង្រីកនិងពង្រឹងសមត្ថកិច្ចត្រួតពិនិត្យអនាម័យសាច់តាមទីសត្តឃាតដ្ឋាន ដើម្បីសុវត្ថិភាពសុខភាពសាធារណៈ ,
ទី៥. បង្កើនការការពារនិងអភិរក្សធនធានជលផល ជំរុញការអភិវឌ្ឈវារីវប្បកម្ម ដោយលើកទឹកចិត្តកសិករ ក្នុងការចិញ្ចឹមត្រីតាមស្រះ ក្នុងបែរ ក្នុងតង់ និងក្នុងស្រែ តាមស្ថានភាពជាក់ស្តែងនិង ពង្រឹងដល់យន្តការ ការពារ និងទប់ស្កាត់បទល្មើសជលផលគ្រប់ប្រភេទ ក្នុងដែនសមត្ថកិច្ច ការពារជម្រកត្រីពងកូន និងបឹងអភិរក្សត្រីមេពូជ
និងទី៦. ជំរុញការដាំនិងស្តារព្រៃឈើឡើងវិញ ដើម្បីបង្កើនគម្របព្រៃឡើងវិញ ព្រមទាំងពង្រឹងការទប់ស្កាត់ និងបង្រាបបទល្មើសព្រៃឈើ សត្វព្រៃ ឲ្យមានប្រសិទ្ធភាពខ្ពស់ ជំរុញបង្កើនបរិមាណបណ្ដុះនិងដាំកូនឈើ និងពង្រឹងការការពារក្នុងកម្រិតខ្ពស់ ទាន់ពេលវេលានូវភ្លើងឆេះព្រៃ ។
មានប្រសាសន៍ក្នុងឱកាសនោះដែរ លោក ង៉ាន់ ភិរុណ អភិបាលរងខេត្ត និងជាតំណាងដ៍ខ្ពង់ខ្ពស់ឯកឧត្តម ទៀ សីហា អភិបាលខេត្តសៀមរាប បានណែនាំដល់ថ្នាក់ដឹកនាំ និងមន្រ្តីរាជការនៃមន្ទីរកសិកម្មខេត្តសៀមរាប ឱ្យខិតខំដោះស្រាយបញ្ហាប្រឈមដែលនៅសេសសល់ក្នុងឆ្នាំ២០១៩ និងអនុវត្តឲ្យមានប្រសិទ្ឋភាពនូវទិសដៅបន្តឆ្នាំ២០២០ ដែលអង្គសន្និបាតបានដាក់ចេញ ពិសេសជំរុញកំណើនផលិតកម្មកសិកម្មគ្រប់ប្រភេទ ដោយលើកកម្ពស់ការស្រាវជ្រាវ និងការផ្សព្វផ្សាយបច្ចេកទេសកសិកម្ម ដើម្បីបង្កើនទិន្នផលកសិកម្ម ជំរុញកំណើនផលិតកម្មសត្វគ្រប់ប្រភេទ ដោយលើកកម្ពស់ការស្រាវជ្រាវ និងការផ្សព្វផ្សាយបច្ចេកទេសចិញ្ចឹម រួមបញ្ចូលទាំងការកែលម្អសមត្ថភាពក្នុងការបង្ការជំងឺសត្វ និងជំងឺឆ្លងពីសត្វ ដែលនាំឱ្យធានាបាននូវការផ្គត់ផ្គង់សត្វ និងសាច់ប្រកបដោយអនាម័យ និងសុវត្ថិភាព ព្រមទាំងខិតខំពង្រឹងការគ្រប់គ្រង និងអនុវត្តច្បាប់ស្តីពីព្រៃឈើ និងសត្វព្រៃ តាមរយៈការគ្រប់គ្រងព្រៃឈើ និងអភិវឌ្ឍន៍សហគមន៍ព្រៃឈើ និងចម្ការឈើដាំ ពង្រឹងការគ្រប់គ្រង និងអនុវត្តច្បាប់ធនធានជលផល ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
