នាព្រឹកថ្ងៃព្រហស្បតិ៍ ទី១៦ ខែមករា ឆ្នាំ២០២០ ឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកសិក្ខាសាលាផ្សព្វផ្សាយ គោលនយោបាយជាតិ ស្តីពី វិទ្យាសាស្រ្ត បច្ចេកវិទ្យា និងនវានុវត្តន៍ ឆ្នាំ២០២០-២០៣០ ដោយមានការអញ្ជើញចូលរួមពីឯកឧត្តម វ៉ា ថន អភិបាល នៃគណៈអភិបាលខេត្តក្រចេះ ឯកឧត្តម លោកជំទាវ លោក លោកស្រី តំណាងរដ្ឋបាល មន្ទីរនិងអង្គភាពជំនាញជុំវិញខេត្ត គ្រឹះស្ថានស្រាវជ្រាវ និងសហគ្រាសអាជីវកម្មទាំងអស់ចូលរួម ។ សិក្ខាសាលាផ្សព្វផ្សាយនេះ ធ្វើឡើងរយៈពេល០២ ថ្ងៃ ចាប់ពីថ្ងៃទី១៦ ដល់ ១៧ ខែមករា ឆ្នាំ២០២០។
ឯកឧត្តមកិត្តិសេដ្ឋាបណ្ឌិត ឆាយ ថន បានលើកឡើងថា វិទ្យាសាស្រ្ត បច្ចេកវិទ្យា និងនវានុវត្តន៍ គឺជាកម្លាំងជំរុញការអភិវឌ្ឍ និងជាធាតុផ្សំគន្លឹះ ដើម្បីបង្កើតឡើងនូវគ្រប់ផលិតផលឲ្យកាន់តែប្រសើរ វិធីសាស្រ្តដែលលើកកម្ពស់ផលិតភាព និងសេវាកម្មដែលធ្វើឲ្យមានការពេញចិត្តពីប្រជាជននៅគ្រប់មជ្ឈដ្ឋាន។ ផ្អែកលើបរិការណ៍នៅក្នុងតំបន់និងសកលលោក រាជរដ្ឋាភិបាលកម្ពុជាមានទិសដៅអភិវឌ្ឍប្រទេសឱ្យកាន់តែប្រសើរ ប្រកបដោយបរិយាបន្ននិងចីរភាព ផ្ដល់ឱ្យប្រជាជននូវសេចក្ដីសុខ រក្សាបាននូវឯករាជ្យភាព បូរណភាពដែនដី និងប្រទេសជាតិមានសន្តិសុខនិងសុវត្ថិភាពសង្គមល្អ។ សម្រាប់ទិសដៅនេះ រាជរដ្ឋាភិបាល បានដាក់ចេញនូវចក្ខុវិស័យកម្ពុជា ឆ្នាំ២០៥០សំដៅធ្វើឲ្យកម្ពុជាបានក្លាយជាប្រទេស ដែលមានចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលខ្ពស់នៅឆ្នាំ២០៥០។
ឯកឧត្តមកិត្តិសេដ្ឋាបណ្ឌិត បានបញ្ជាក់ថា រាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃ និងប្រកបដោយវិចារណញ្ញាណដ៏ឧត្តុង្គឧត្តមរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានសម្រេចដាក់ឲ្យប្រើប្រាស់ជាផ្លូវការនូវគោលនយោបាយជាតិ ស្តីពី វិទ្យាសាស្ត្រ បច្ចេកវិទ្យា និងនវានុវត្តន៍ ឆ្នាំ២០២០-២០៣០ ជាលើកដំបូងរបស់កម្ពុជា ដែលជាការចង្អុលទិសដ៏ខ្ពង់ខ្ពស់បំផុតរបស់ប្រមុខរាជរដ្ឋាភិបាល សម្រាប់ការខិតខំរួមគ្នាអនុវត្តក្នុងក្របខ័ណ្ឌជាតិ និងសម្រាប់ការស្វះស្វែងរកកិច្ចសហប្រតិបត្តិការអន្តរជាតិ។
ព័ត៌មានជាតិ ថ្មីៗ
ឯកឧត្តមកិត្តិសេដ្ឋាបណ្ឌិត ឆាយ ថន បានមានប្រសាសន៍ថា គោលនយោបាយជាតិនេះ មានគោលបំណងពង្រឹងមូលដ្ឋានគ្រឹះ និងកែលម្អបរិយាកាស នៃ វិទ្យាសាស្ត្រ បច្ចេកវិទ្យា និងនវានុវត្ដន៍ និងកសាងប្រព័ន្ធអេកូនវានុវត្តន៍ ដើម្បីអភិវឌ្ឍប្រកបដោយចីរភាព និងលើកកម្ពស់គុណភាពជីវភាពប្រជាជនឲ្យកាន់តែប្រសើរនៅគ្រប់កម្រិតនិងគ្រប់វិស័យ។ ក្នុងនោះដើម្បីធ្វើឲ្យសម្រេចបាននូវគោលបំណងនេះ ស្របតាមចក្ខុវិស័យកម្ពុជាឆ្នាំ២០៥០ ការអភិវឌ្ឍវិទ្យាសាស្រ្ត បច្ចេកវិទ្យា និងនវានុវត្តន៍ ត្រូវសម្រេចគោលដៅសំខាន់ៗ ចំនួនប្រាំគឺ៖ ទី១-កសាងនិងពង្រឹងធនធានមនុស្សបានគ្រប់គ្រាន់ ទាំងបរិមាណ គុណភាព និងសមាសភាព មានសីលធម៌វិជ្ជាជីវៈ និងសមភាពយេនឌ័រ ទី២-ផ្ដល់លទ្ធភាពឲ្យធនធានមនុស្សឆ្នើម ខាង វិទ្យាសាស្ត្រ បច្ចេកវិទ្យា និងនវានុវត្ដន៍បំពេញភារកិច្ចឈានមុខ និងមានយន្តការសម្រាំង និងលើកទឹកចិត្ត ដើម្បីឲ្យធនធានមនុស្សខាងវិទ្យាសាស្ត្រ បច្ចេកវិទ្យា និងនវានុវត្ដន៍ជាតិ ពេញសមត្ថភាព ទី៣-ផ្តល់លទ្ធភាពដល់សកម្មភាពស្រាវជ្រាវ និងអភិវឌ្ឍជាតិប្រកបដោយប្រសិទ្ធភាព និងស័ក្តិសិទ្ធភាព ដោយផ្ដោតលើការសម្របបច្ចេកវិទ្យា ដែលទទួលបានទៅនឹងស្ថានភាព ជាក់ស្តែងក្នុងស្រុក ជាមួយគ្នានោះ បង្កើនសមត្ថភាពស្រូបយកបច្ចេកវិទ្យាអន្តរជាតិ ទី៤-កសាងនិងពង្រឹងប្រព័ន្ធអេកូនវានុវត្តន៍ ប្រកបដោយជវភាព មានសមត្ថភាពសំយោគបច្ចេកវិទ្យា និងវិស្វកម្មឲ្យបានជាស្នាដៃជាតិ មានកម្រិតនវានុវត្តន៍កាន់តែប្រសើរ សំដៅលើកស្ទួយឧស្សាហកម្ម និងធុរកិច្ចជាអាទិភាពជាតិបម្រើឲ្យការប្រើប្រាស់ក្នុងស្រុក និងការនាំចេញកាន់តែប្រសើរឡើង និង ទី៥-បណ្ដុះឱ្យមានវប្បធម៌វិទ្យាសាស្ត្រ បច្ចេកវិទ្យា និងនវានុវត្ដន៍នៅក្នុងសង្គមប្រកបដោយ បរិយាបន្ន មានជំនឿទំនុកចិត្តជាសាធារណៈលើផលិតផល និងសេវាដែលប្រើបច្ចេកវិទ្យាជាតិ ទទួលបាននូវការពេញចិត្តទៅលើលទ្ធផលនៃការខិតខំ និងវិនិយោគលើការអភិវឌ្ឍវិទ្យាសាស្ត្រ បច្ចេកវិទ្យា និងនវានុវត្ដន៍របស់ខ្លួនក៏ដូចជាទៅលើការកែទម្រង់អភិបាលកិច្ចផ្នែកវិទ្យាសាស្ត្របច្ចេកវិទ្យា និងនវានុវត្ដន៍ ។
ឯកឧត្តមកិត្តិសេដ្ឋាបណ្ឌិត បានបន្តថា អគ្គលេខាធិការដ្ឋាននៃក្រុមប្រឹក្សាជាតិ វិទ្យាសាស្រ្តនិងបច្ចេកវិទ្យាមានភារកិច្ចសម្របសម្រួល ហើយក្រសួង ស្ថាប័នពាក់ព័ន្ធ មានភារកិច្ចសហការរៀបចំផែនការសកម្មភាពលម្អិតក្នុងដែនសមត្ថកិច្ចរបស់ខ្លួន មានប្រភពធនធាន មានពេលវេលា(រយៈពេលខ្លី មធ្យម និងវែង) និងឈរលើមូលដ្ឋាននៃការប្ដេជ្ញាចិត្តអនុវត្តយ៉ាងម៉ឺងម៉ាត់។ ជាមួយគ្នានេះ យើងសង្ឃឹមយ៉ាងមុតមាំថា ដៃគូអភិវឌ្ឍន៍នឹងបង្កើនការគាំទ្រដល់កិច្ចការដ៏មានសារៈសំខាន់នេះ ធ្វើឱ្យកម្ពុជាសម្រេចបាននូវការអនុវត្តរបៀបវារៈអភិវឌ្ឍជាតិរបស់ខ្លួនផង និងចូលរួមចំណែកសម្រេចបាននូវការអនុវត្ត របៀបវារៈអភិវឌ្ឍសកល ដូចជាគោលដៅអភិវឌ្ឍន៍ប្រកបដោយចីរភាពផងដែរ ៕
