បន្ទាប់ពីបិទបញ្ចប់ សន្និបាតបូកសរុបការងារប្រចាំឆ្នាំ២០១៩ របស់មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានអះអាងដោយមោទនភាពថា សម្រាប់ឆ្នាំ២០២០នេះ ខេត្តសៀមរាបមិនមានបញ្ហាសន្តិសុខស្បៀងនោះទេ ហើយនិងអាចមានលទ្ធភាពនាំចេញអង្ករ ទៅក្រៅប្រទេសផងដែរ។
លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានបង្ហាញរបាយការណ៍ថា ៖ ការងារបង្កបង្កើនផល ទូទាំងខេត្តសៀមរាបក្នុងឆ្នាំ២០១៩កន្លងទៅនេះ ការច្រូតកាត់ប្រមូលផលស្រូវរដូវវស្សា សម្រេចបានលើផ្ទៃដីជាង ១៨ម៉ឺនហិចតា និងព្យាករណ៏លើការប្រមូលផលស្រូវរដូវប្រាំងក្នុងប្រមាណជា ជាង ២ម៉ឺនហិចតាទៀត សារុបក្នុងរង្វង់ប្រមាណជា ជាង២០ម៉ឺនហិចតា ដែលទិន្នផលជាមធ្យម ៣តោនក្នុង១ហិចតា គឺមានបរិមាណផលស្រូវ ជិត ៦៣ម៉ឹនតោន ។
របាយការណ៍នេះ លោក ទា គឹមសុទ្ធ បានលើកបង្ហាញនៅក្នុងឱកាសបិទសន្និបាតបូកសារុបលទ្ធផលការងាររបស់មន្ទីរកសិកម្ម រុក្ខាប្រមាញ់និងនេសាទខេត្តសៀមរាប ប្រចាំឆ្នាំ២០១៩ នាព្រឹកថ្ងៃទី១៧ ខែមករា ឆ្នាំ២០២០នេះ លោកបន្តឲ្យដឹងថា ៖ បើតាមការគណនាព្យាករណ៍ ទៅលើការប្រើប្រាស់ស្រូវ-អង្ករ សម្រាប់ឆ្នាំ២០២០ ឃើញថា ៖ ក្រោយពីការកាត់ចេញសម្រាប់ទុកពូជ ការបាត់បង់ក្នុងពេលប្រមូលផល ប្រើប្រាស់ការចិញ្ចឹមសត្វ តម្រូវការស្បៀងនៃប្រជាពលរដ្ឋក្នុងខេត្តប្រមាណជាង១លាននាក់ និងភ្ញៀវទេសចរផងដែរ នឹងអាចនៅសល់ស្រូវប្រមាណជា ជាង២៨ម៉ឺនតោន ដែលគិតជាអង្ករប្រហែលជា ជាង ១៨ម៉ឺនតោន សម្រាប់ផ្គត់ផ្គង់តាមតម្រូវការផ្សេងៗទៀត និងនាំចេញទៅក្រៅប្រទេសផងដែរ។
ឯកឧត្តម ណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កត់សម្គាល់ថា ខេត្តសៀមរាប ទោះបីឆ្នាំ២០១៩កន្លងទៅ មានជួបប្រទះនូវបាតុភូតធម្មជាតិ ( គ្រោះរាំងស្ងួត និង ទឹកជំនន់ )ក៏ដោយ ប៉ុន្តែខេត្តមួយនេះ នៅតែរក្សាបាន នូវភាពរីកចម្រើននៃវិស័យកសិកម្ម។ សមិទ្ធផលនេះ បានបង្ហាញពីការចាត់វិធានការ និងការចុះជួយអន្តរាគន៍ពីសំណាក់មន្រ្តីជំនាញ និងមន្រ្តីស្ថាប័នពាក់ព័ន្ធ ព្រមទាំងការយកចិត្តទុកដាក់ពីសំណាក់ក្រសួងកសិកម្ម។ លើសពីនោះ គោលនយោបាយរបស់រាជរដ្ឋាភិបាលកម្ពុជា ក្នុងការជួយស្តារនិងសង្គ្រោះស្ថានភាពនៃវិបត្តិគ្រោះមហន្តរាយទាំងនោះ មិនត្រឹមតែបានគិតគូរដល់ចំពោះផលដំណាំប៉ុណ្ណោះទេ តែត្រូវបានគិតគូរដល់ជីវភាពប្រជាកសិករ ក្នុងពេលឆ្លងកាត់គ្រោះធម្មជាតិទាំងនោះផងដែរ ដូចជាការផ្តល់ស្រូវពូជ ស្បៀងអាហារ និងមធ្យោបាយផ្សេងៗទៀត ។
យ៉ាងណាក៏ដោយ លោក ង៉ាន់ ភិរុណ អភិបាលរងខេត្តសៀមរាប មានប្រសាន៍ថា ការព្រួយបារម្ភ វាមិនអាចឃ្លាតឆ្ងាយពីអារម្មណ៍គិតគូររបស់ថ្នាក់ដឹកនាំនោះឡើយ ។ អនុសាសន៍ដ៏ខ្ពង់ខ្ពស់និងមានតម្លៃ នៃសម្តេចតេជោ ប្រមុខនៃរាជរដ្ឋាភិបាលកម្ពុជា ដែលអំពាវនាវឲ្យមានការប្រើប្រាស់និងរក្សាទឹកឲ្យបានសមស្រប ដើម្បីបង្ការហានិភ័យដែលអាចនឹងកើតមានជាយថាហេតុនោះ គឺត្រូវតែជាការចងចាំ និងត្រូវយកទៅអនុវត្តនៅគ្រប់កាលៈទេសៈ ទាំងអស់ ។ អាជ្ញាធរខេត្តសៀមរាប សំណូមពរ ឲ្យមន្ទីរធនធានទឹក មន្ទីរកសិកម្ម និងអាជ្ញាធរមូលដ្ឋាន ក្នុងខេត្តសៀមរាប ត្រូវរួមសហការគ្នា ដោះស្រាយជាមួយគ្នា ដោយបន្តការស្តារ និងអភិវឌ្ឍន៍ប្រព័ន្ធធារាសាស្រ្ត ដើម្បីបញ្ជូនទឹកឲ្យបានទៅដល់ដីស្រែកសិករ និងទាន់ពេលវេលាជាងមុន ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
