ព្រឹត្តិការណ៍រត់ប្រណាំង បែបទេសចរណ៍ចម្ងាយឆ្ងាយ Angkor Ultra Trail 2020 លើកទី ៥ នៅខេត្តសៀមរាប បានចាប់ផ្ដើមហើយ នៅព្រឹកព្រលឹមថ្ងៃទី១៨ ខែមករា ឆ្នាំ២០២០ ដែលមានអត្តពលិកជាតិ និងអន្តរជាតិ១,២៥៥នាក់បានចូលរួមរត់។
ការរត់ប្រណាំងនេះ មានចំនួន ៥វិញ្ញាសា គឺចម្ងាយ១២៨គីឡូម៉ែត, ចម្ងាយ៦៤គីឡូម៉ែត, ចម្ងាយ៤២គីឡូម៉ែត, ចម្ងាយ៣២គីឡូម៉ែត និងចម្ងាយ១៦គីឡូម៉ែត។ វិញ្ញាសាទាំងអស់នេះ បានចាប់ផ្ដើមចេញដំណើរនៅក្នុងទីតាំងផ្សេងៗគ្នា ក្នុងតំបន់រមណីយដ្ឋានអង្គរ ខេត្តសៀមរាប។
គោលបំណង នៃព្រឹត្តិការណ៍រត់ប្រណាំង បែបទេសចរណ៍ចម្ងាយឆ្ងាយនេះ ទី១ ផ្សព្វផ្សាយឲ្យពិភពលោក ពិសេស ភ្ញៀវទេសចរដែលបានចូលរួមព្រឹត្តិការណ៍នេះ បានដឹងពី ស្ថេរភាព សន្ដិភាព និង ការអភិវឌ្ឍន៍លើគ្រប់វិស័យ ក្នុងប្រទេសកម្ពុជា ក៏ដូចជា ផ្សព្វផ្សាយ និង ចូលរួម ថែរក្សាគោលដៅទេសចរណ៍ប្រវត្តិសាស្ត្រ របស់កម្ពុជា គឺ តំបន់អង្គរ ខេត្តសៀមរាប ។ ទី ២ គឺ ការរួមចំណែក ស្វែងរក មូលនិធិសម្រាប់ ជួយដល់ការងារមនុស្សធម៌ តាមអង្គការ និងមន្ទីរពេទ្យ មួយចំនួន និង ទី ៣ គឺ ការទាក់ទាញ ភ្ញៀវទេសចរ មកកាន់កម្ពុជា កាន់តែច្រើនបន្ថែមទៀត។
ព័ត៌មានជាតិ ថ្មីៗ
ឯកឧត្តម វ៉ាត់ ចំរើន អគ្គលេខាធិការ គណៈកម្មការជាតិអូឡាំពិកកម្ពុជា បង្ហាញថា ព្រឹត្តិការណ៍រត់ប្រណាំង Angkor Ultra Trail 2020 លើកទី ៥នេះ មានជនបរទេសចូលរួមរត់ ៩០៥ នាក់ មកពី ៤៥ ប្រទេស ក្នុងនោះ ជនជាតិបារាំង នៅលំដាប់ទី១ ជនជាតិ អង់គ្លេស នៅលំដាប់ទី២ និង ជនជាតិ ជប៉ុន នៅលំដាប់ទី៣។
ឯកឧត្តម កត់សម្គាល់ថា នៅឆ្នាំនេះ អត្តពលិកជាជនជាតិខ្មែរ មានចំនួន ៣៥០ នាក់ មានការកើនឡើងជាង១០ភាគរយ បើ ធៀបនឹងឆ្នាំមុន(២០១៩)។ ហើយក្នុងនោះ មានជនជាតិខ្មែរ ៣ នាក់ ដែលបានចូលរួមរត់ ចម្ងាយឆ្ងាយ ១២៨គីឡូម៉ែត។
សូមបញ្ជាក់ថា ព្រឹត្តិការណ៍រត់ប្រណាំង Angkor Ultra Trail 2020 លើកទី ៥ ចាប់ផ្ដើម ពី ម៉ោង ៤ ទៀបភ្លឺ ថ្ងៃទី ១៨ មករា នឹងត្រូវបញ្ចប់ នៅវេលា ម៉ោង ៨ ព្រឹក ថ្ងៃទី ១៩ ខែមករានេះ ដែល មានរយៈពេលរត់ ២៨ ម៉ោង ពោលគឺ រត់ ពេញ មួយថ្ងៃ មួយយប់។
គួររំលឹកដែរថា ព្រឹត្តិការណ៍រត់ប្រណាំង Angkor Ultra Trailនេះ ត្រូវបានបង្កើត និងរៀបចំឡើងជាលើកដំបូង នៅលើ ទឹកដី ខេត្តសៀមរាប នាឆ្នាំ ២០១៦។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
