ថ្ងៃទី១៩ ខែមករា ឆ្នាំ២០២០ ប្រជាពលរដ្ឋប្រមាណជាង ៣០០នាក់់ មកពីឃុំពពេល ស្រុកសូទ្រនិគម ខេត្តសៀមរាប ទទួលបានការពិនិត្យសុខភាព និងព្យាបាលជំងឺដោយឥតគិតថ្លៃ ដើម្បីលើកកម្ពស់ការថែរក្សាសុខភាព និងចូលរួមកាត់បន្ថយចំណាយក្នុងការព្យាបាលជំងឺរបស់ប្រជាពលរដ្ឋនៅតាមជនបទ។
នេះជាលើកទី១ហើយ សម្រាប់ឆ្នាំ២០២០ ដែលស្ថានកុងស៊ុលនៃសាធារណរដ្ឋប្រជាមានិតចិនប្រចាំខេត្តសៀមរាប បានរៀបចំឡើងដោយកម្មវិធីពិនិត្យសុខភាពនិងព្យាបាលជំងឺ ជូនប្រជាជនជនបទ ដោយឥតគិតថ្លៃ។ ក្នុងនោះ ក៏មានការចូលរួមសហការពីមន្ទីរសុខាភិបាលខេត្ត និងអាជ្ញាធរស្រុកសូទ្រនិគម និងសភាពាណិជ្ជកម្មចិនប្រចាំកម្ពុជាសាខាខេត្តសៀមរាប ។
ឯកឧត្តម លីវ ស៊ីជាង ( LIV ZHICHEANG ) អគ្គកុងស៊ុលចិនប្រចាំខេត្តសៀមរាប មានប្រសាសន៍ថា សម្រាប់ឆ្នាំ២០២០ វាគឺជាលើកទី១ ប៉ុន្តែគិតមកដល់ពេលនេះ វាជាលើកទី៤ហើយ ដែលស្ថានកុងស៊ុលនៃសាធារណរដ្ឋប្រជាមានិតចិនប្រចាំខេត្តសៀមរាប បានរៀបចំកម្មវិធីពិនិត្យសុខភាព និងព្យាបាលជំងឺដោយឥតគិតថ្លៃ ជូនប្រជាពលរដ្ឋកម្ពុជានៅតាមជនបទនានាក្នុងខេត្តសៀមរាប ។ ឯកឧត្តម សង្ឃឹមថា នាពេលអនាគតរដ្ឋបាលខេត្តសៀមរាប ដែលនឹងជួយគាំទ្រដល់កម្មវិធីនេះ ឲ្យមានដំណើរការឆ្ពោះទៅកាន់មូលដ្ឋានជនបទជាបន្តបន្ទាប់ទៀត ។
កម្មវិធីនេះ មានវត្តមានគ្រូពេទ្យជំនាញស្ម័គ្រចិត្ត មកពីមន្ទីរពេទ្យបង្អែកខេត្តសៀមរាប មន្ទីរពេទ្យអន្តរជាតិរស្មីអង្គរ និងវេជ្ជបណ្ឌិតជំនាញឯកទេស ៤រូបផ្សេងទៀត មកពីខេត្តជ័ងស៊ូ នៃប្រទេសចិន ក្នុងនោះរួមមានវេជ្ជបណ្ឌិតឯកទេសព្យាបាលជំងឺដោយប្រើម្ជុលវិទ្យាសាស្រ្ត ជំនាញព្យាបាលជំងឺទូទៅតាមវេជ្ជសាស្រ្តបូរាណចិន ឯកទេសឆ្អឹង និងសសៃឈាម។ ប្រជាពលរដ្ឋ ដែលបានមកទទួលសេវាពិនិត្យ និងព្យាបាលដោយឥតគិតថ្លៃនាពេលនោះ ភាគច្រើនមានជំងឺសន្លាក់ និងជាមនុស្សវ័យកណ្ដាល និងមនុស្សចាស់។
អត្ថបទ និង រូបថត ៖ ងិន គឹមឡេង
កែសម្រួលអត្ថបទ ៖ លោក សេង ផល្លី
