ព្រឹត្តិការណ៍រត់ចម្ងាយឆ្ងាយ ១២៨គ.ម (Angkor Ultra Trail 2020) លើកទី ៥រយៈពេលពីរថ្ងៃ នៅទឹកដីអង្គរខេត្តសៀមរាប ត្រូវបានបិទបញ្ចប់ និងបានបំពាក់មេដាយជ័យលាភី ជូនកីឡាករ កីឡាការិនី ក្រោមវត្តមានឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាប្រធានគណៈកម្មការជាតិអូឡាំពិកកម្ពុជា (NOCC), ឯកឧត្តម វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការ NOCC រួមទាំងថ្នាក់ដឹកនាំរៀបចំព្រឹត្តិការណ៍ជាច្រើនរូបទៀត ក្នុងឱកាសនោះ ក៏មានការរៀបចំពិធីកាត់នំខួប ៥ឆ្នាំ នៃព្រឹត្តិការណ៍កីឡាទេសចរណ៍បែបផ្សងព្រេងនេះផងដែរ ។
តាមរបាយការណ៍គណ:កម្មការបច្ចេកទេស សម្រាប់វិញ្ញាសារគោល ក្នុងព្រឹត្តិការណ៍ដ៏ធំប្រចាំឆ្នាំនេះ គឺរត់ចម្ងាយ ១២៨គីឡូម៉ែត្រ ដោយលទ្ធផលលេខ១ ផ្នែកបុរសបានទៅកីឡាករបារាំង Guillon Antoine, លេខ២ កីឡាករបារាំង Le Saux Christophe ។ រីឯផ្នែកនារី លេខ១ បានទៅកីឡាការិនីបារាំង Messina Veronipue ខណៈលេខ២ បានទៅកីឡាការិនីហុងកុង Cheng Yin Kwan ។ ដោយឡែកវិញ្ញាសាររត់ ៦៤គីឡូម៉ែត្រផ្នែកបុរស លេខ១ បានទីកីឡាករបារាំង Dercourt Yohan និងលេខ២ បានទៅកីឡាករចក្រភពអង់គ្លេស King Ali រីឯលេខ១ ផ្នែកនារីវិញបានទៅលើកីឡាការិនីបារាំង Corne Katell និងលេខ២ គឺកីឡាការិនីចក្រភពអង់គ្លេស Washington Harri ។ បើតាមរបាយការណ៍បានបញ្ជាក់ដែរថា ក្នុងនោះដែរកម្ពុជាក៏មានកីឡាការិនី ២រូបផងដែរដែលដណ្ដើមបានជ័យលាភី រួមមាន៖ កីឡាការិនី លី ណារី ដែលដណ្ដើមបានលេខ១ ផ្នែកនារី លើវិញ្ញាសាររត់ចម្ងាយ ៤២គីឡូម៉ែត្រ និងម្នាក់ទៀត គឺកីឡាការិនីកូនកាត់ខ្មែរ-បារាំង ឡូរី ទទួលបានលេខ១ ផ្នែកនារី លើវិញ្ញាសាររត់ ៣២គីឡូម៉ែត្រ ។
ឯកឧត្តម វ៉ាត់ ចំរើន បានឲ្យដឹងថា ក្នុងចំណោមអត្តពលិកទាំងអស់ដែលបានចូលរួម ក្នុងព្រឹត្តិការណ៍សម្រាប់ឆ្នាំនេះ គឺមានជនបរទេសជាង ៩០៥នាក់មកពី ៤៥ប្រទេសលើពិភពលោក ។ ក្នុងនោះជនជាតិបារាំងច្រើនជាងគេ តាមពីក្រោយដោយ អង់គ្លេស និងជប៉ុន ។ ក្នុងនោះដែរចំពោះការរត់ចម្ងាយឆ្នាំនេះ កីឡាករកម្ពុជាក៏មានការចូលរួមច្រើនជាងឆ្នាំមុនៗដែរ ដោយមានចំនួន ៣៥០នាក់ ហើយក្នុងនោះមានខ្មែរ ៣នាក់ដែលចូលរួមរត់ចម្ងាយឆ្ងាយ ១២៨គីឡូម៉ែត្រនេះ ដែលនាំឲ្យចំនួន អ្នកចូលរួមកើនប្រមាណជាង ១០% បើធៀបនឹងឆ្នាំមុន ។
ព័ត៌មានជាតិ ថ្មីៗ
ឯកឧត្តម បានបញ្ចាក់បន្ថែមថា ការរៀបចំព្រឹត្តិការណ៍កីឡាបែបទេសចរណ៍នេះដែរ គឺផ្ដោតលើគោលដៅសំខាន់ៗ បី គឺ គោលដៅ ទី១ ផ្សព្វផ្សាយឲ្យបណ្ដាប្រទេសលើពិភពលោកពិសេសភ្ញៀវទេសចរចូលរួមបានដឹងពីស្ថេរភាព សន្ដិភាព និងការអភិវឌ្ឍន៍លើគ្រប់វិស័យក្នុងប្រទេសកម្ពុជាក៏ដូចជាផ្សព្វផ្សាយ និងចូលរួមថែរក្សាគោលដៅទេសចរណ៍ប្រវត្តិសាស្ត្រ របស់កម្ពុជា គឺតំបន់អង្គរខេត្តសៀមរាប ។ ទី២ គឺការរួមចំណែកស្វែងរកមូលនិធិសម្រាប់ជួយដល់ការងារមនុស្សធម៌ តាមអង្គការ និងមន្ទីរពេទ្យមួយចំនួន និងទី៣ គឺការទាក់ទាញភ្ញៀវទេសចរឲ្យកាន់តែច្រើនផងដែរ » ។ ចំពោះព្រឹត្តិការណ៍ Angkor Ultra Trail គឺត្រូវបានរៀបចំឡើងជាលើកដំបូងនាឆ្នាំ២០១៦ នៅលើទឹកដីខេត្តសៀមរាប ហើយការរត់ ប្រណាំងចាប់ផ្ដើមពីម៉ោង ៤ ទៀបភ្លឺ ថ្ងៃទី ១៨ មករា ហើយបញ្ចប់នៅវេលាម៉ោង ៨ ព្រឹកថ្ងៃទី ១៩ មករា ដែលការរត់នេះ មាន រយ:ពេល ២៨ម៉ោង គឺរត់ពេញមួយថ្ងៃ មួយយប់ ៕
អត្ថបទ និង រូបភាព៖ យូ វង្ស
