អគ្គកុងស៊ុលចិនប្រចាំខេត្តសៀមរាប រំពឹងថា អាកាសយានដ្ឋានអន្តរជាតិសៀមរាបអង្គរថ្មី ស្ថិតក្នុងភូមិសាស្រ្ត ស្រុកសូទ្រនិគម ខេត្តសៀមរាប នឹងលេចចេញជារូបរាងនៅ៣ឆ្នាំខាងមុខ នេះបើតាមប្រសាសន៍ឯកឧត្តមនាថ្ងៃទី១៩ ខែមករា ឆ្នាំ២០២០ នៅក្នុងការដ្ឋានសាងសង់អាកាសយានដ្ឋានអន្តរជាតិសៀមរាបអង្គរ-ថ្មី។
ឯកឧត្តម លីវ ស៊ីជាង ( LIV ZHICHEANG ) អគ្គកុងស៊ុលចិនប្រចាំខេត្តសៀមរាប មានប្រសាសន៍ថា ៦១ឆ្នាំ បន្ទាប់ពីប្រទេសចិននិងកម្ពុជា បង្កើតបានទំនាក់ទំនងការទូតជាមួយគ្នាដ៏ល្អរៀងដរាបមក ប្រទេសទាំង២ ( ចិន-កម្ពុជា ) បានស្ថាបនាជាស្ថាពរ នូវភាពជាដៃគូយុទ្ធសាស្រ្ត សហប្រតិបត្តិការគ្រប់ជ្រុងជ្រោយ ហើយថ្មីៗនេះ ប្រទេសទាំង២ បានចុះហត្ថលេខាជាមួយគ្នា លើផែនការសកម្មភាពជោគវាសនារួមគ្នា ( ចិន-កម្ពុជា ) ។ ជាច្រើនឆ្នាំកន្លងមកនេះ ប្រទេសទាំង២ គាំទ្រគ្នា ជួយយកអាសារគ្នាជាបងប្អូនល្អ ជាដៃគូ និងជាមិត្តភក្តិដ៏ស្មោះត្រង់ ។
ឯកឧត្តម សង្ឃឹមថា អាកាសយានដ្ឋានអន្តរជាតិថ្មីនេះ មិនត្រឹមតែបានបន្ថែមនូវសក្តានុពលឲ្យខេត្តសៀមរាប ដើម្បីស្រូបទាញយកកំណើនទេសចរណ៍ប៉ុណ្ណោះទេ តែវានឹងជួយអភិវឌ្ឍសេដ្ឋកិច្ចសង្គម ផ្តល់ឱកាសការងារជូនប្រជាពលរដ្ឋ និងការប្រែប្រួលថ្មីជាវិជ្ជមាន ទៅដល់ជីវភាពរស់នៅប្រចាំថ្ងៃរបស់ប្រជាសហគមន៍ក្នុងតំបន់នេះ ផងដែរ ។
សូមរំលឹកថា អាកាសយានដ្ឋានអន្តរជាតិសៀមរាបអង្គរថ្មី គ្រោងវិនិយោគក្នុងទំហំទឹកប្រាក់៩០០លានដុល្លារ ដោយក្រុមហ៊ុនចិន។ អាកាសយានដ្ឋានអន្តរជាតិថ្មីនេះ នឹងប្រើពេលសាងសង់ ពី៣ឆ្នាំទៅ៥ឆ្នាំ នៅលើផ្ទៃដី១,៧០០ហិចតា។ ក្នុងនោះផ្ទៃដីសម្រាប់ធ្វើការសាងសង់ព្រលានយន្តហោះ មាន៧០០ហិចតា និងផ្ទៃដីនៃតំបន់សេដ្ឋកិច្ចពិសេស ចំនួន១,០០០ហិចតា។
រូបថត ៖ មន្ត្រីមន្ទីរព័ត៌មាន
អត្ថបទ ៖ លោក សេង ផល្លី
