នៅថ្ងៃទី ១៨ ខែមករា ឆ្នាំ២០២០ នេះ ជាការប្រកួតថ្ងៃទី២ហើយ ក្នុងការប្រកួតបាល់ទាត់ Tiger Street Football 2020 នៅក្រុងសៀមរាប ដែលមាន ១១៩ក្រុម មកពីខេត្តចំនួន៤ រួមមាន សៀមរាបម្ចាស់ផ្ទះ ឧត្តរមានជ័យ ព្រះវិហារ និងកំពង់ធំ។
ការប្រកួតរយៈពេល៣ថ្ងៃ ចាប់ពីថ្ងៃទី១៧រហូតដល់ថ្ងៃ ទី១៩ ខែ មករាឆ្នាំ២០២០ នឹងត្រូវជម្រុះយកតែ ១២ក្រុមប៉ុណ្ណោះ ដើម្បីឡើងទៅមកប្រកួតវគ្គផ្តាច់ព្រ័ត្រ នៅរាជធានីភ្នំពេញ ជាមួយក្រុមដទៃទៀត មកពីបណ្ដាខេត្តទូទាំងប្រទេស នៅថ្ងៃទី ២៩ កុម្ភៈ ដល់១មីនាឆ្នាំ២០២០។
លោក ទុយ វិច្ឆិកា ប្រធានក្រុមបច្ចេកទេស នៃសហព័ន្ធកីឡាបាល់ទាត់កម្ពុជា មានប្រសាសន៍ថា សហព័ន្ធបាល់ទាត់កម្ពុជា ថ្លែងអំណរគុណ ចំពោះក្រុមហ៊ុនស្រាបៀរ Tiger ដែលបានសហការជាមួយសហព័ន្ធបាល់ទាត់កម្ពុជា បង្កើតព្រឹត្តិការណ៍ប្រកួតបាល់ទាត់នេះជារៀងរាល់ឆ្នាំ។ នេះជាឱកាស ដល់ក្រុមបាល់ទាត់នៅកម្ពុជា បានចូលរួមប្រកួតប្រជែង បង្ហាញនូវសមត្ថភាព ទេពកោសល្យ ដែលបានពួកគេមាន និងហាត់រៀនកន្លងមក។
សូមជម្រាបថា សម្រាប់ព្រឹត្តិការណ៍ ប្រកួតបាល់ទាត់ Tiger Street Football 2020 រដូវកាលទី៨ មាន៨មណ្ឌល រួមមានមណ្ឌលខេត្តកំពង់ស្ពឺ មណ្ឌលខេត្តសៀមរាប មណ្ឌលខេត្ដបន្ទាយមានជ័យ មណ្ឌលខេត្តបាត់ដំបង មណ្ឌលខេត្តកំពង់ចាម មណ្ឌលខេត្តព្រះសីហនុ មណ្ឌលខេត្តតាកែវ និងបញ្ចប់នៅរាជធានីភ្នំពេញ។ មណ្ឌលទាំង ៨ នឹងដណ្ដើមជ័យលាភីប្រាក់រង្វាន់សរុបចំនួន ៥ម៉ឺនដុល្លារ ហើយការប្រកួតផ្តាច់ព្រ័ត្រ នៅរាជធានីភ្នំពេញចាប់ពីថ្ងៃទី២៩ ខែកុម្ភៈនិងថ្ងែទី០១ ខែមីនា ឆ្នាំ២០២០ នឹងមានការចូលរួមពី អតីតតារាបាល់ទាត់ពិភពលោក លោក Rio Ferdinand ផងដែរ៕
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
