នៅព្រឹកថ្ងៃទី១៨ ខែមករា ឆ្នាំ២០២០ នៅសាលាពុទ្ធិកវិទ្យាល័យរាជបូព៌ សង្កាត់សាលាកំរើក ក្រុងសៀមរាប ខេត្តសៀមរាប មានរៀបចំការប្រឡងយកវិញ្ញាបនបត្រពុទ្ធិកបឋមសិក្សា ឆ្នាំសិក្សា ព.ស.២៥៦៣ គ.ស.២០១៩-២០២០ ក្រោមអធិបតីភាព និងបើកវិញ្ញាសាដោយ ព្រះធម្មសិរី អាភាករោ ជុំ គឹមឡេង ព្រះរាជាគណៈថ្នាក់កិត្តិយស និងជាព្រះសុមង្គលសិលាចារ្យ ព្រះមេគណខេត្ត និងលោក វណ្ណ ប៊ុនណា ប្រធានមន្ទីរធម្មការ និងសាសនាខេត្ត លោកឈុន ជ នាយកពុទ្ធិកមជ្ឈមណ្ឌលគរុកោសល្យ តំណាងសម្តេចព្រះអគ្គាធិការដ្ឋានពុទ្ធិកសិក្សាជាតិ តំណាងក្រសួងធម្មការ និងសាសនា ។
នៅក្នុងឱកាសនោះ លោក វណ្ណ ប៊ុនណា បានផ្តាំផ្ញើ និងពិតប្រគេន-ណែនាំដល់បេក្ខសមណៈសិស្ស-សិស្ស ប្រឡងចំនួន១៨២អង្គ/នាក់ ដែលបាននិមន្ត-អញ្ជើញ មកពីតាមបណ្តាក្រុង-ស្រុក ទូទាំងខេត្តសៀមរាប ត្រូវខិតខំយកព្រះទ័យ-យកចិត្តទុកដាក់ឲ្យបានខ្ពស់ នៅក្នុងពេលប្រឡង ហើយត្រូវបញ្ចេញឲ្យអស់ពីសមត្ថភាព ចំណេះដឹងរបស់ខ្លួន ដែលបានសិក្សាកន្លងមក។ លើសពីនោះត្រូវគោរពតាមបទបញ្ជាផ្ទៃក្នុងនៃការប្រឡង ត្រូវស្តាប់នូវការណែនាំរបស់គណៈមេប្រយោគ និងអនុរក្ស ឲ្យបានខ្ជាប់ខ្ជួន ចៀសវាងលួចចម្លងពីគ្នា បង្កបញ្ហានៅក្នុងមណ្ឌលប្រឡង ក្នុងថ្នាក់ប្រឡង អំឡុងពេលប្រឡង។ ចំពោះការល្មើសបម្រាមទាំងនេះ បេក្ខសមណៈសិស្ស-សិស្ស នឹងត្រូវធ្លាក់ដោយស្វ័យប្រវត្តិ ។
អត្ថបទ និង រូបថត ៖ សាលាខេត្ត
កែសម្រួលអត្ថបទ ៖ លោក សេង ផល្លី
