បន្ទាប់ពីការបដិបត្តិព្រះធម៌ធ្វើធុតង្គ (ដើរឆ្ពោះទៅរកការំលត់ទុក) នៅក្នុងបរិវេណវត្តព្រះវិហារ៧ល្វែង នៃទីក្រុងអង្គរធំ ខេត្តសៀមរាប អស់រយ:ពេល ០៥ ថ្ងៃកន្លងមក គឺចាប់ពីថ្ងៃទី១៣ ដល់ថ្ងៃទី១៧ ខែមករា ឆ្នាំ២០២០ កម្មវិធីនេះ ត្រូវបានប្រកាសបិទជាផ្លូវការ នាព្រឹកថ្ងៃទី១៧ ខែមករា ឆ្នាំ២០២០ ក្រោមព្រះអធិបតិភាពដ៏ឧត្តុង្គឧត្តមសម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជា ណាចក្រកម្ពុជា និងជា ព្រះប្រធានគណៈសង្ឃនាយក នៃគណៈ ធម្មយុត្តិកនិកាយ នៃព្រះរាជាណាក្រកម្ពុជា ។
សម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី មានសង្ឃដីកាថា៖ ព្រះពុទ្ធសាសនា មានតួនាទីយ៉ាងសំខាន់បំផុត សម្រាប់ការគោរពប្រតិបត្តិតាមផ្លូវជំនឿដែលមានគុណ ធម្មយុត្ត និងគណៈមហានិកាយ ទាំងពីរនេះ ជាតំណាងព្រះពុទ្ធសាសនាថេរវាទនៅកម្ពុជា ហើយការប្រព្រឹត្តបំពេញបដិបត្តិព្រះធម៌ -ធ្វើធុតង្គ “ដើរឆ្ពោះទៅរកការរំលត់ទុក្ខ “ រយៈពេល ០៥នេះ គឺជាការដុសខាត់ទៅលើផ្លូវចិត្តរបស់មនុស្សឱ្យមានការអត់ធ្មត់ខ្ពង់ខ្ពស់ចេះយោគយល់អាធ្យាស្រ័យគ្នា ជាភារតភាព ក្នុងការរស់នៅជាសុខសប្បាយជាមហាគ្រួសារខ្មែរ និងសាកលលោក ។
សម្តេចព្រះមហាសង្ឃរាជ មានសង្ឃដីកាទៀតថា ធុរៈក្នុងព្រះពុទ្ធសាសនាមានពីរយ៉ាងគឺ៖ គន្ធធុរ១ និងវិបស្សនាធុរ១ ហើយធុតង្គវត្ត គឺជាផ្នែកមួយ វិបស្សនាធុរមាន ១៣ប្រការ ហើយក្នុងចំណោម ធុតង្គទាំង១៣ ប្រការនេះ ភិក្ខុដែលពេញចិត្ត បដិបត្តិធុតង្គ អាចជ្រើសរើសប្រការណាមួយក៏បាន ឬក៏បដិបត្តិធុតង្គទាំង១៣ក៏បាន ដែលប្រការនេះតាមការចូលចិត្តគឺ មិនដាច់ខាតត្រូវបដិបត្តិ ដូចជាព្រះវិន័យ ដែលភិក្ខុត្រូវបដិបត្តិយ៉ាងដាច់ខាតគ្រប់សិក្ខាបទឡើយ។
សម្តេចព្រះមហាសង្ឃរាជ បួរ គ្រី មានសង្ឃដីកាបន្ថែមទៀតថា សូមអរគុណចំពោះសន្តិភាព ព្រោះថាមានសន្តិភាពទើបមានការអភិវឌ្ឍ ទាំងពុទ្ធចក្រ និងអាណាចក្រ មានសន្តិភាពទើបមានការអភិវឌ្ឍទាំងផ្លូវសម្ភារ ទាំងផ្លូវចិត្តវិញ្ញាណ មានសន្តិភាព ទើបយើងអាចនាំគ្នាមកជួបជុំប្រព្រឹត្តបំពេញបដិបត្តិព្រះធម៌-ធ្វើធុតង្គ ដូចនៅក្នុងឱកាសពេលនេះ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
