មន្ទីរទេសចរណ៍ខេត្តសៀមរាប និងប្រជាពលរដ្ឋក្នុងសហគមន៍ទឹកជប់ខ្នារពោធិ៍ រំពឹងថាតំបន់ព្រៃកោងកាងទឹកសាប ស្ថិតនៅក្នុង ឃុំខ្នារពោធិ៍ ស្រុកសូទ្រនិគម ខេត្តសៀមរាប នឹងក្លាយជា តំបន់ទេសចរណ៍ធម្មជាតិ ដ៏ទាក់ទាញមួយសម្រាប់ខេត្តសៀមរាប ក្រៅពីទេសចរណ៍នៅតាមប្រាសាទ។
លោក ឌឿម ឌន់ ប្រធានសមាគមន៍ទឹកជប់ខ្នារពោធិ៍ បានឱ្យដឹងថា នៅក្នុងសហគមន៍នេះ មានផ្ទៃដីសរុប ១០២២ហិកតា និងសក្តានុពលទេសចរណ៍ជាច្រើន ដូចជា ព្រៃកោងកាងទឹកសាប ទឹកជប់ហូរខួបប្រាំងខួបវស្សា ផ្កាព្រៃរីកស្រស់បំព្រង ចម្ការឬស្សី ដែលរៀបចំយ៉ាងស្រស់ស្អាត រួមជាមួយធនធានធម្មជាតិជាច្រើនប្រភេទផ្សេងទៀត។
លោកបន្តថា បច្ចុប្បន្នសហគមន៍ បានកំពុងតែធ្វើស្ពានសម្រាប់ឱ្យអ្នកទេសចរដើរទស្សនាព្រៃកោងកាង និងផ្កាព្រៃ។ ទន្ទឹមនោះ សហគមន៍ក៏នឹងសាងសង់កន្លែង សម្រាក និងទទួលទានអាហារ និងកំពុងស្នើសុំទៅអាជ្ញាធរឃុំ ដើម្បី រៀបចំការសន្តិសុខ និងសាងសង់ផ្លូវចូលទៅកាន់តំបន់នេះ ឱ្យបានកាន់តែងាយស្រួល ។
លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បានឱ្យដឹងថា មន្ទីរទេសចរណ៍ខេត្ត គាំទ្រចំពោះសកម្មភាព របស់សហគមន៍ទឹកជប់ខ្នារពោធិ៍ ព្រោះថា ការបង្កើតឱ្យមានផលិតផលទេសចរណ៍ថ្មីនេះ គឺជាយុទ្ធសាស្រ្តដ៏សំខាន់ ដែលក្រសួងទេសចរណ៍កំពុងតែជំរុញ ឱ្យអ្នកពាក់ព័ន្ធទាំងអស់បង្កើតឱ្យបានច្រើន ក្នុងគោលដៅទាក់ទាញភ្ញៀវទេសចរឱ្យចូលមកទស្សនាកម្សាន្ត និងស្នាក់នៅកម្ពុជាបានកាន់យូរ។
លោកបានបញ្ជាក់ថា ក្រៅពីប្រាសាទបុរាណ តំបន់ទេសចរណ៍ធម្មជាតិ និងតំបន់ទេសចរណ៍កែឆ្នៃនៅជុំវិញតំបន់ប្រាសាទ គឺជាសក្តានុពលទេសចរណ៍ដ៍សំខាន់មួយដែលអ្នកទេសចរភាគច្រើនបានកំពុងតែមានការចាប់អារម្មណ៍និងពេញនិយម។ ដូចឆ្នេះការរៀបចំតំបន់ព្រៃកោងកាងចំនួន៩០ហិកតា គឺជាផលិតផលទេសចរណ៍ថ្មីមួយប្លែក ដែលនៅក្នុងខេត្តសៀមរាបនេះមិនទាន់មាន។
លោកប្រធានមន្ទីរ បានបញ្ជាក់ថា មន្ទីរទេសចរណ៍ខេត្ត នឹងសហការជាមួយស្ថាប័នពាក់ព័ន្ធទាំងអស់ជំរុញឱ្យការរៀបចំតំបន់នេះ ឱ្យក្លាយជាតំបន់ទេសចរណ៍ដ៍ទាក់ទាញនៅពេលឆាប់ខាងមុខនេះ ជាពិសេសស្របតាមស្តង់ដារសហគមន៏ទេសចរណ៏ជាតិ៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក សេង ផល្លី
