ពស់ថ្លាន់មួយក្បាលប្រវែងប្រមាណជា៦ម៉ែត្រ និងទម្ងន់ប្រហែល២០គីឡូក្រាម ត្រូវបានចៅសង្កាត់រង រួមជាមួយមន្ត្រីប៉ុស្តិ៍នគរបាលរដ្ឋបាលសង្កាត់សៀមរាប នាំយកទៅប្រលែងនៅបឹងពារាំង ស្ថិតក្នុងសង្កាត់សៀមរាប ក្រុងសៀមរាប កាលរសៀលថ្ងៃទី២២ខែមករាឆ្នាំ២០២០។
លោកចៅសង្កាត់រង បានឲ្យដឹងថា ត្រូវបានគេប្រទះឃើញជាប់មង ដែលទប់ស្ទាក់កាកសំណល់ តាមដងស្ទឹងសៀមរាប កាលពីថ្ងៃទី១៩ ខែមករា ឆ្នាំ២០២០ ក្រោយស្នាក់ការសាលាសង្កាត់ និងបានយកមករក្សាទុក ដើម្បីយកទៅប្រលែងនៅកន្លែងសុវត្ថិភាព។
លោកចៅសង្កាត់រង បានបញ្ជាក់ថា កន្លងមកអាជ្ញាធរក្នុងសង្កាត់សៀមរាប តែងតែណែនាំដល់ប្រជាពលរដ្ឋ ត្រូវចូលរួមថែរក្សាសត្វព្រៃគ្រប់ប្រភេទ ចៀសវាងការសម្លាប់ និងទទួលទាន ដែលនាំឲ្យសត្វទាំងអស់នោះ ឈានទៅដល់ការផុតពូជនាពេលអនាគត។
សូមរំលឹកថា បឹងពារាំង ជាសហគមន៍អភិរក្សជីវចម្រុះ ដែលតំបន់បឹងនេះ មានផ្ទៃដីព្រៃលិចទឹកជាង៣,០០០ហិកតា និងបានទាក់ទាញប្រភេទសត្វស្លាបទឹក១២០ប្រភេទ មករកចំណីនៅទីនេះ។ លើសពីនេះ បឹងពារាំង ក៏ជាតំបន់អេកូទេសចរណ៍ធម្មជាតិ សម្រាប់ភ្ញៀវទេសចរណ៍ជាតិ និងអន្តរជាតិជិះទូកកម្សាន្ត គយគន់ថ្ងៃលិច និងមើលសត្វស្លាប។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
