អ្នកជំនាញការរបស់អង្គការសុខភាពពិភពលោក បញ្ជាក់ថា ការប្រើម៉ាសគឺសម្រាប់តែអ្នកដែលមានជំងឺ ឬអាការៈក្អក ឬកណ្ដាស់ តែប៉ុណ្ណោះ មិនតម្រូវឲ្យប្រជាពលរដ្ឋកម្ពុជាទូទាំងប្រទេសពាក់វានោះឡើយ នេះបើតាមប្រសាសន៍មន្ត្រីជាន់ខ្ពស់ក្រសួងសុខាភិបាលកម្ពុជា កាលពីល្ងាចថ្ងៃទី២៧ ខែមករា ឆ្នាំ២០២០ ក្នុងសន្និសីទកាសែតជុំវិញករណីការរកឃើញដំបូង ករណីណូវែលកូរ៉ូណា នៅខេត្តព្រះសីហនុ នៅទីស្ដីការក្រសួងសុខាភិបាល។
នៅក្នុងឱកាសនោះ លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បញ្ជាក់ថា ករណីចាំបាច់ដែល ដើម្បីការពារខ្លួនពីការឆ្លងជំងឺរលាកសួតប្រភេទថ្មី ឬ ណូវែលកូរ៉ូណា គឺប្រជាពលរដ្ឋកម្ពុជាទូទៅ ត្រូវលាងដៃ នឹងទឹកស្អាត និងសាប៊ូឲ្យបានញឹកញាប់ នៅឲ្យឆ្ងាយពីអ្នកជំងឺ ឬអ្នកមានអាការៈក្អក ឬកណ្ដាស់ ក្នុងចម្ងាយលើសពីមួយម៉ែត្រ ដើម្បីចៀសវាងតំណក់ទឹកមាត់របស់អ្នកជំងឺ ប៉ះលើដងខ្លួនអ្នកនៅក្បែរ។
លោកជំទាវ បញ្ជាក់ថា ក្នុងករណីយើងសង្ស័យថា អ្នកនៅក្បែរ ឬអ្នកដំណើរដែលនៅជិតយើង មានជំងឺនេះ យើងអាចប្រើប្រាស់ម៉ាស សម្រាប់សុវត្តិភាពផ្ទាល់ខ្លួន ប៉ុន្តែមិនមែនជាការតម្រូវឲ្យពាក់ទេ។ កត្តាចាំបាច់ យើងត្រូវនៅឲ្យឆ្ងាយពីអ្នកជំងឺនោះ និងលាងសម្អាត ធ្វើអនាម័យខ្លួន នឹងទឹកស្អាត និងសាប៊ូ ឲ្យបានញឹកញាប់។
ព័ត៌មានជាតិ ថ្មីៗ
មួយវិញទៀត លោកជំទាវ ណែនាំដល់ប្រជាពលរដ្ឋកម្ពុជា ដើម្បីសុវត្ថិភាពផ្ទាល់ខ្លួន ត្រូវយល់ដឹង និងគួរចៀសវាងធ្វើដំណើរទៅទីតាំងកើតមានជំងឺរលាកសួតប្រភេទថ្មី ឬ ណូវែលកូរ៉ូណានេះ និង បរិភោគចំណីអាហារ ដែលបានចម្អិនឆ្អិនល្អ។
សូមបញ្ជាក់ថា ក្នុងករណីសង្ស័យថាមានកើត ជំងឺរលាកសួតប្រភេទថ្មី ឬ ណូវែលកូរ៉ូណា នៅក្នុងមូលដ្ឋាន សូមរាយការណ៍ទៅកាន់អាជ្ញាធរ ឬ ទាក់ទងមកលេខទូរស័ព្ទ ១១៥ ដោយឥតគិតថ្លៃ ពីគ្រប់ប្រព័ន្ធទូរស័ព្ទ។
