នៅថ្ងៃទី២៨ ខែមករា ឆ្នាំ២០២០ សហគមន៍នេសាទព្រែកតាឡក មានរៀបចំ ការបោះឆ្នោតជ្រើសរើសគណៈកម្មាធិការសហគមន៍ ដែលតែងតែធ្វើឡើង រៀងរាល់៥ឆ្នាំម្ដង។ ការបោះឆ្នោះនេះ មានការអញ្ជើញជាអធិបតីភាពពី លោក សុខ ណារ៉េត អភិបាលរងស្រុក តំណាង លោកស្រី ម៉ននី រង្សី អភិបាលស្រុកក្រឡាញ់ និងលោក ចាន់ តុង នាយរងខណ្ឌជលផលខេត្តសៀមរាប។
ការបោះឆ្នោតនេះ ប្រារព្ធនៅក្នុងបរិវេណ សាលាបឋមសិក្សាសំបួរ ឃុំសំបួរ ស្រុកក្រឡាញ់ ខេត្តសៀមរាប ដែលមានអ្នកឈរឈ្មោះចំនួន៤៤រូប ក្នុងនោះស្រីចំនួន៥ រូប និងមានអ្នកចូលរួមបោះឆ្នោតសរុប ១១៥ រូប ដែលជាសុទ្ធសឹងជាសមាជិកសហគមន៍នេសាទព្រែកតាឡក ។
តាមរយៈការបោះឆ្នោតនៅថ្ងៃដដែលនេះ លោក រឿន ពេជ្រ ត្រូវបោះឆ្នោតជាប់ជាប្រធានសហគមន៍ ដោយទទួលបានសំឡេងគាំទ្រចំនួន២០ សំឡេង លោក ទួន ព្រេង ជាប់ជាអនុប្រធានទី១ ទទួល ១៩សំឡេង និង លោក ហឿន ផា ជាប់ជាអនុប្រធានទី២ទទួលបាន ១៥ សំឡេង។ ក្នុងនោះដែរ គណៈកម្មការសហគមន៍ ក៏បានបែងចែកបេក្ខជន ដែលទទួលបានសំឡេងគាំទ្រទៅតាមផ្នែកនីមួយៗ ដូចជា លេខាធិការ បេឡាករ ក្រុមផ្សព្វផ្សាយ និងក្រុមល្បាតផងដែរ។
ព័ត៌មានជាតិ ថ្មីៗ
លោកអភិបាលរងស្រុក បានផ្តាំផ្ញើដល់សមាជិកគណៈកម្មការ ដែលត្រូវបានជ្រើសរើស និងចាត់តាំងទាំងអស់ ត្រូវយកចិត្តទុកដាក់អនុវត្តន៍តាមតួនាទី និងភារកិច្ច មានសាមគ្គីផ្ទៃក្នុង រៀបចំការប្រជុំ និងរបាយការណ៍ប្រចាំខែឲ្យបានទៀងទាត់ ដើម្បីបម្រើផលប្រយោជន៍រួមរបស់ប្រជាពលរដ្ឋក្នុងឃុំ ជាពិសេសគឺត្រូវថែរក្សាការពារអភិរក្សព្រៃ បឹង ត្រី ក្នុងតំបន់សហគមន៍អោយមាននិរន្តរភាព និងតម្លាភាព។
សូមជម្រាបថា លក្ខណៈសម្បត្តិ ដើម្បីឈរឈ្មោះ បេក្ខជន បេក្ខនារីត្រូវតែមាន អាយុចាប់១៨ឆ្នាំឡើងទៅ មានសញ្ជាតិខ្មែរពីកំណើត រស់នៅក្នុងភូមិនៃតំបន់សហគមន៍នេសាទ និងជាសមាជិកសហគមន៍នេសាទ។
សូមបញ្ជាក់ផងដែរថា សហគមន៍នេសាទព្រែកតាឡក មានផ្ទៃដីព្រៃលិចទឹក ២,២០៤ហិកតា ស្ថិតនោះក្នុងភូមិសាស្ត្រឃុំសំបួរ ស្រុកក្រឡាញ់ ខេត្តសៀមរាប។
អត្ថបទ និង រូបភាព ៖ រដ្ឋបាលស្រុកក្រឡាញ់
កែសម្រួលអត្ថបទ ៖ លោក សេង ផល្លី
