នៅព្រឹកថ្ងៃទី២៩ ខែមករា ឆ្នាំ២០២០នេះ លោក នាក់ ណេរ៉ុន អភិបាល រងខេត្ត និងជាតំណាងដ៏ខ្ពង់ខ្ពស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប និង ឯកឧត្តម ធា ស៊ីវត្ថា សមាជិកក្រុមប្រឹក្សាខេត្តនិងជាតំណាងដ៏ខ្ពង់ខ្ពស់ឯកឧត្ដម អ៊ឹង ហឿន ប្រធានក្រុមប្រឹក្សាខេត្តសៀមរាប បានដឹកនាំប្រតិភូខេត្តសៀមរាប រួមមានឯកឧត្តម លោកជំទាវ លោក លោកស្រី ជាសមាជិកក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាព និង មន្ត្រីអ្នកមុខអ្នកការក្នុងខេត្ត និង អភិបាលរងស្រុកក្រឡាញ់ សរុបចំនួន ២៦រូប ចូលរួមគោរពវិញ្ញាណក្ខ័ន្ធ និង ចូលរួមរំលែកទុក្ខក្រុមគ្រួសារនៃសពឯកឧត្ដមនាយឧត្តមសេនីយ៍ ខូរ ឈា អនុរដ្ឋលេខាធិការក្រសួងការពារជាតិ ដែលបានទទួលមរណភាពកាលពីថ្ងៃទី២៥ ខែមករា ឆ្នាំ២០២០ វេលាម៉ោង២២ ក្នុងជន្មាយុ៧០ឆ្នាំ ដោយរោគាពាធ ហើយសពត្រូវបានតំកល់ទុកធ្វើទក្ខិណានុប្បទាន ទៅតាមប្រពៃណីសាសនានៅគេហដ្ឋានសព ស្ថិតនៅផ្លូវលេខ៥៦ ភូមិទី២ សង្កាត់កំពង់ស្វាយ ក្រុងសេរីសោភ័ណ ខេត្តបន្ទាយមានជ័យ ។
ក្នុងការចូលរួមរំលែកទុក្ខនោះដែរ លោក នាក់ ណេរ៉ុន និង ឯកឧត្តម ធា ស៊ីវត្ថា និង ប្រតិភូ បានសម្តែងនូវការសោកស្តាយយ៉ាងខ្លាំង នៃការបាត់បង់មន្ត្រីថ្នាក់ដឹកនាំមួយរូបដ៏ឆ្នើមក្នុងជួរកងកម្លាំងប្រដាប់អាវុធ ដែលពោពេញទៅដោយបទពិសោធន៍ បច្ចេក ទេស ក្នុងការដឹកនាំ និង បំពេញភារកិច្ច ជូនជាតិមាតុភូមិកន្លង មក ព្រមទាំងបានចូលរួមក្នុងកិច្ចការកសាង និង អភិវឌ្ឍន៍នូវ សមទ្ធិផលនានារបស់ប្រទេសជាតិ ។
គណៈប្រតិភូបានធ្វើការបូជាទៀនធូប ដើមី្បឧទ្ទិសជូនដល់ដួងវិញ្ញាណក្ខន្តសពឯកឧត្ដមនាយឧត្តមសេនីយ៍ ខូរ ឈា សូមឲ្យឯកឧត្ដមបានទៅកាន់សុគតិភពថ្មី ព្រមទាំងបែរងាកក្រោយឲ្យពរជ័យដល់ក្រុមគ្រួសារ បងប្អូន កូនចៅ និង ថ្នាក់ដឹកនាំគ្រប់ជាន់ថ្នាក់ ក្នុងជួរកងកម្លាំងប្រដាប់អាវុធ មន្ត្រីរាជការ ឲ្យទទួលនូវសេចក្តីសុខ និង ឲ្យស្គាល់នូវតែសុខសន្តិភាព សុភមង្គល និង ការអភិវឌ្ឍន៍ប្រទេសជាតិលើគ្រប់វិស័យ ៕
អត្ថបទ ៖ លោក លីវ សាន្ត
រូបថត ៖ មន្ទីរព័ត៌មានខេត្តសៀមរាប
