សហរដ្ឋអាមេរិកបានឱ្យដឹងថា ក្រុមអ្នកជំនាញរបស់ខ្លួនកំពុងចាប់ផ្ដើមអភិវឌ្ឍ «វ៉ាក់សាំងប្រឆាំងវីរុសកូរ៉ូណាថ្មី» ដែលមានប្រភពដើមមកពីទីក្រុងវូហាន (Wuhan) ប្រទេសចិន ហើយក៏បានជំរុញឱ្យទីក្រុងប៉េកាំងបង្កើនកិច្ចសហប្រតិបត្តិការ ជាមួយអាជ្ញាធរសុខាភិបាលអន្តរជាតិផងដែរ។ នេះបើតាមការចេញផ្សាយដោយ សារព័ត៌មាន CNA នៅព្រឹកថ្ងៃពុធ ទី២៩ ខែមករា ឆ្នាំ២០២០។
ថ្លែងប្រាប់អ្នកសារព័ត៌មានកាលពីថ្ងៃអង្គារសប្ដាហ៍នេះ (ម៉ោងនៅវ៉ាស៊ីនតោន) មន្ត្រីមកពីវិទ្យាស្ថានជាតិសុខាភិបាលអាមេរិក (NIH) លោក អាន់ថូនី ហ្វូស៊ី (Anthony Fauci) បានគូសបញ្ជាក់ថា «យើងបានចាប់ផ្ដើមការអភិវឌ្ឍវ៉ាក់សាំង នៅឯវិទ្យាស្ថាន NIH ជាមួយក្រុមងាររបស់យើង ដោយដំណើរការនេះនឹងត្រូវធ្វើឡើងទៅតាមតំណាក់កាល។ តំណាក់កាលទីមួយនឹងមានរយៈពេល ០៣ខែ ហើយក្រោយមកគឺ ០៣ខែទៀតសម្រាប់ការប្រមូលទិន្នន័យ មុននឹងចាប់ផ្ដើមតំណាក់កាលទីមួយ»។
គួរបញ្ជាក់ថា អាជ្ញាធរសុខាភិបាលរបស់ចិន បានប្រកាសឲ្យដឹងនៅព្រឹកថ្ងៃពុធនេះថា ចំនួនមនុស្សស្លាប់ដោយសារវីរុសផ្លូវដង្ហើម កូរ៉ូណាថ្មី (Coronavirus) បានកើនឡើងដល់ ១៣២នាក់ហើយ ខណៈមនុស្សជាង ៦,០០០នាក់ទៀតឆ្លងទាំងនៅចិន និងទូទាំងពិភពលោក។
