នាព្រឹកថ្ងៃទី២៩ ខែមករា ឆ្នាំ២០២០នេះ បន្ទាប់ពីបានដឹកនាំប្រតិភូខេត្តសៀមរាប អញ្ជើញទៅគោរពវិញ្ញាណក្ខន្ធសពឯកឧត្ដមនាយឧត្តមសេនីយ៍ ខូរ ឈា អនុរដ្ឋលេខាធិការក្រសួងការពារជាតិ នៅគេហដ្ឋានសពស្ថិតក្នុងខេត្តបន្ទាយមានជ័យរួចមក លោក នាក់ ណេរ៉ុន អភិបាលរងខេត្ត និងជាតំណាងដ៏ខ្ពង់ខ្ពស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានបន្តដឹកនាំប្រតិភូរួមមានឯកឧត្តម លោកជំទាវ លោក លោកស្រី ជាសមាជិកក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាព និង មន្ត្រីអ្នកមុខអ្នកការក្នុងខេត្ត ចុះពិនិត្យគម្រោងស្តារស្រះទឹក និង គម្រោងជួសជុលផ្លូវក្រាសក្រួសក្រហម នៅក្នុងស្រុកស្រីស្នំ ដែលបានប្រកាសពិធីបើកការដ្ឋានអនុវត្តគម្រោងមូលនិធិស្រុកឆ្នាំ២០១៩ សរុបចំនួន០៣ គម្រោង ដែលស្ថិតនៅក្នុងភូមិជ្រោយនាងងួន ឃុំជ្រោយនាងងួន កាលពីថ្ងៃទី២៨ ខែមករា ឆ្នាំ២០២០ម្សិលមិញនេះ ដែលអមដំណើរដោយលោក ហ៊ន់ ឫទ្ធិ អភិបាលស្រុកស្រីស្នំ , សមាជិកក្រុមប្រឹក្សាស្រុក និង មន្ត្រីអ្នកមុខអ្នកការក្នុងស្រុកស្រីស្នំជាច្រើនរូបទៀត ។
លោក ហ៊ន់ ឫទ្ធិ អភិបាលស្រុក និងជាប្រធានគណៈកម្មាធិការគ្រប់គ្រងគម្រោងស្រុកស្រីស្នំ បានឲ្យដឹងថា គម្រោងទាំង០៣ ដែលបានបើកការដ្ឋានអនុវត្តនោះ រួមមាន ៖ ១- គម្រោងស្តារស្រះទឹកត្រពាំងធំ ដែលមានបណ្តោយប្រវែង១៤០ម៉ែត្រ និង ទទឹងប្រវែង ១១៥ម៉ែត្រ មានជម្រៅប្រវែង០៣ម៉ែត្រ ដែលត្រូវចំណាយថវិកាសរុបចំនួន ២១៦លានរៀល , ២- គម្រោងជួសជុលផ្លូវក្រាសក្រួសក្រហមមួយខ្សែ ប្រវែង៥៦០ម៉ែត្រ ចាប់ពីផ្លូវជាតិលេខ៦៨ ជិតស្ពានត្រពាំងធំ កាត់ខាងជើងវត្តជ្រោយនាងងួន ទៅទល់នឹងផ្លូវអាងជ្រោយនាងងួន ដោយចំណាយថវិកាសរុបចំនួន ១០៧.៥០០.០០០ រៀល និង ៣- គម្រោងជួសជុលផ្លូវក្រាលក្រួសក្រហមប្រវែង ១.២០០ ម៉ែត្រ ចាប់ពីផ្លូវជាតិលេខ៦៨ ត្រង់ផ្លូវចូលវិទ្យាល័យ២៨មករា ទៅ ដល់ខាងក្រោយផ្សារជ្រោយនាងងួន ដោយចំណាយថវិកាសរុបចំនួន ៧៩លានរៀល ។
លោក ហ៊ន់ ឫទ្ធិ មានប្រសាសន៍បន្ថែមថា ចំពោះគម្រោងស្តារស្រះទឹកត្រពាំងធំនេះ គឺគម្រោងមួយដែលផ្ដួចផ្ដើមឡើងដោយលោក នាក់ ណេរ៉ុន អភិបាលរងខេត្ត នៅក្នុងអំឡុងពេលដែលលោកកាន់តួនាទីជាអភិបាលស្រុកស្រីស្នំ ហើយត្រូវបានអនុវត្តគម្រោងមូលនិធិស្រុកឆ្នាំ២០១៩នេះ ដែលអាចបម្រើតាមសេចក្ដីត្រូវការរបស់ប្រជាពលរដ្ឋក្នុងឃុំទាំងមូល ។
ព័ត៌មានជាតិ ថ្មីៗ
លោកអភិបាលស្រុកស្រីស្នំ មានប្រសាសន៍បន្ថែមទៀតថា ជាមួយគ្នានេះដែរ លោក នាក់ ណេរ៉ុន អភិបាលរងខេត្ត និង ប្រតិភូអមដំណើរ ក៏បានចុះទៅពិនិត្យទីតាំងដែលគ្រោងដាក់រូបសំណាកស្រីស្នំ ដែលជាគម្រោងមួយផ្ដួចផ្ដើមឡើងដោយលោក នាក់ ណេរ៉ុន នៅក្នុងអំឡុងពេលដែលលោកកាន់តួនាទីជាអភិបាលស្រុកស្រីស្នំដែរ រួមទាំងការរៀបចំជាសួនឧទ្យាន ដែលនឹងក្លាយទៅជារមណីយដ្ឋានមួយ សម្រាប់ការគោរពប្រតិបត្តិ និង ការកំសាន្តសប្បាយរបស់ប្រជាពលរដ្ឋទាំងនៅក្នុងស្រុក និង ក្រៅស្រុក ហើយថវិកាសម្រាប់ការកសាងរូបសំណាកនេះ គឺបានមកពីការចូលរួមរបស់សប្បុរសជន ខណៈ បច្ចុប្បន្នកំពុងរៀបចំឯកសារស្នើសុំការសាង់សង់ពីអាជ្ញាធរខេត្តសៀមរាប ៕
អត្ថបទ ៖ រដ្ឋបាលស្រុកស្រីស្នំ
រូបថត ៖មន្ទីរព័ត៌មានខេត្តសៀមរាប
កែសម្រួលអត្ថបទ ៖ លោក លីវ សាន្ត
