ប្រាសាទបាតជុំ មានអាយុជាង១ពាន់ឆ្នាំ ស្ថិតនៅក្នុងភូមិក្រវ៉ាន់ សង្កាត់អង្គរធំ ក្រុងសៀមរាប គ្រោងនឹងបញ្ចប់ការជួសជុល ក្នុងខែមករា ឆ្នាំ២០២០នេះ។
ប្រាសាទដែលសាងសង់ ក្នុងរាជ្យព្រះបាទរាជេន្ទ្រវរ្ម័នទី២ នាពាក់កណ្ដាលសតវត្សរ៍ទី១០នេះ ក្នុងដំណើរការចាប់ផ្ដើមជួសជុលកាលពីថ្ងៃទី១៧ ខែកក្កដា ឆ្នាំ២០១៩ ស្ថានភាពប្រាសាទមួយនេះ មានសភាពទ្រុឌទ្រោមខ្លាំង ផ្នែកជាច្រើននៃប្រាសាទបានបាក់រលំ ចំណែកឯឥដ្ឋរលុះ ប្រេះ ពុកផុយយ៉ាងធ្ងន់ធ្ងរ នេះបើតាមការរៀបរាប់របស់ កញ្ញា ដយ ពេជ្រជីរ៉ា អ្នកបច្ចេកទេស នៃនាយកដ្ឋានអភិរក្សប្រាសាទ ក្នុងឧទ្យានអង្គរ និងបុរាណវិទ្យាបង្ការ។
អ្នកជំនាញរូបនេះ បង្ហាញឲ្យដឹងថា ចំពោះបច្ចេកទេសជួសជុល ក្រុមការងារជំនាញរបស់អាជ្ញាធរជាតិអប្សរា បានរុះរើឥដ្ឋដែលពុកផុយ និងជួសជុលពង្រឹងឡើងវិញជាផ្នែកៗ នៅទីតាំងខូចខាត។ ទន្ទឹមនោះ ក្រុមការងារ ក៏បានស្វែងរកឥដ្ឋចាស់ៗ ដែលជារបស់ប្រាសាទមកប្រើឡើងវិញ និងបន្ថែមឥដ្ឋថ្មី ស្របតាមកម្រិតខូចខាត នៃសំណង់ និងគោរពតាមទ្រឹស្តី និងការអភិរក្សបេតិកភណ្ឌវប្បធម៌ របស់ ធម្មនុញ្ញអង្គរ និង អាយស៊ីស៊ី អង្គរ។
អត្ថបទ និង រូបភាព ៖ លោក ខេង ឧត្តម
កែសម្រួលអត្ថបទ ៖ លោក សេង ផល្លី
