ជំនួបសន្ទនាអំពីការធ្វើអាជីវកម្មប្រចាំខែលើកទី១ ឆ្នាំ២០២០ របស់សមាគមក្លឹបទេសចរណ៍សៀមរាប (STC) បានធ្វើឡើងនារាត្រីថ្ងៃទី៣១ ខែមករា ស្របពេលដែលពិភពលោក ជួបវិបត្តិករណីមានជម្ងឺឆ្លងរាតត្បាត បង្កដោយវិរុសថ្មី កូរូណា ដូច្នេះហើយនៅក្នុងជំនួបសន្ទនាលើកនេះ ត្រូវបានផ្តោតទៅលើប្រធានបទសំខាន់ គឺការទប់ស្កាត់ព័ត៌មានមិនពិត ដែលជះឥទ្ធិពលមិនល្អដល់វិស័យទេសចរណ៍ ហើយរួមគ្នាជួយផ្សព្វផ្សាយបន្ត អំពីសក្តានុពលទេសចរណ៍នៅកម្ពុជា ជាពិសេសគឺស្ថានភាពពិត ដែលកម្ពុជា បាននិងកំពុងខិតខំប្រឹងប្រែង គ្រប់គ្រងស្ថានការណ៍វីរុសថ្មីនេះ ដោយប្រុងប្រយ័ត្នបំផុត ដែលមកទល់នឹងពេលនេះ ពុំមានប្រជាពលរដ្ឋកម្ពុជាណាម្នាក់ ទទួលរងការចម្លងវីរុសថ្មី នេះឡើយ ។ នេះបើតាមការលើកឡើងរបស់លោក ហ្វីលីប កៅ ប្រធានសមាគមក្លឹបទេសចរណ៍សៀមរាប (STC) នៅក្នុងរាត្រីជួបជុំសន្ទនានោះ ។
លោកបញ្ជាក់ឲ្យដឹងថា នាបណ្តាឆ្នាំកន្លងមក ជំនួបសន្ទនាប្រចាំខែរបស់សមាជិក STC មានគោលបំណងរួម គឺជួបជុំជាមួយប្រតិបត្តិករទេសចរណ៍ ដើម្បីផ្លាស់ប្តូរយោបល់គ្នា ចែករំលែកអំពីវឌ្ឍនភាពអាជីវកម្មលើវិស័យទេសចរណ៍ និងទទួលយកនូវការរិះគន់ស្ថាបនា នៅក្នុងចំណោមសមាជិក STC ដើម្បីធ្វើឲ្យមានការអភិវឌ្ឍមួយដែលSTC ប្រាថ្នាចង់បាន នោះគឺនិរន្តរភាពនៃកំណើនភ្ញៀវទេសចរណ៍ នៅតំបន់សៀមរាប-អង្គរ ។ ទោះយ៉ាងណាក៏ដោយ ថ្វីត្បិតតែប៉ុន្មានខែមុនព្រឹត្តិការណ៍វីរុសថ្មីនេះកើតឡើង ចំនួនភ្ញៀវទេសចរនៅខេត្តសៀមរាបមានការធ្លាក់ចុះរួចមកហើយ តែអ្វីដែលជាបញ្ហារំសើបនេះកើតឡើង STC មិនមានការធ្លាក់ទឹកចិត្តនោះឡើយ ហើយការជួបជុំគ្នាលើកនេះ វាជាការផ្លាស់ប្តូរយោបល់ រិះរកវិធីសាស្រ្តថ្មីបន្ថែមទៀត ដើម្បីដោះស្រាយបញ្ហាប្រឈមទាំងនោះ ដោយការព្យាយាមមិនរាថយនោះឡើយ ។ ថ្វីត្បិតតែខាងទីផ្សារចិនបានបិទជើងហោះហើររបស់ខ្លួន តែនៅមានទីផ្សារទេសចរណ៍ដទៃទៀត ដែលអាចនឹងផ្តល់ក្តីសង្ឃឹមសម្រាប់កម្ពុជា ។
លោក ហ្វីលីប កៅ និយាយថា ៖ សេចក្តីប្រកាសព័ត៌មានផ្លូវការរបស់ក្រសួងសុខាភិបាល ស្តីពីលទ្ធផលតាមដានការវិវត្តស្ថានការណ៍វារ៉ុសថ្មី គឺជាមូលដ្ឋានដ៏កក់ក្តៅ សម្រាប់ការផ្សព្វផ្សាយទៅកាន់ទីផ្សារដៃគូនៅក្រៅប្រទេស ដើម្បីផ្តល់ទំនុកចិត្តអំពីសុវត្តិភាពកម្ពុជា ។
នៅក្នុងរាត្រីជំនួបសន្ទនានោះដែរ លោក ព្យែរ អង់ដ្រេ ប្រធានសមាគមសភាពាណិជ្ជកម្មនៃសាធារណរដ្ឋបារាំង ប្រចាំនៅខេត្តសៀមរាប ដែលលោកក៏ជានាយកប្រតិបត្តិរបស់ក្រុមហ៊ុន សិប្បករអង្គរ ហើយក្នុងនាមជាប្រតិបត្តិករទេសចរណ៍ផងដែរនោះ លោកថា ៖ វាមិនគួរប្រើអារម្មណ៍ភ័យតក់ស្លុតជាមួយវីរុសថ្មី កូរូណា នោះទេ បើប្រៀបធៀបទៅនឹងការសម្លាប់មនុស្សដោយការរាតត្បាតនៃជម្ងឺផ្សេងៗកាចសាហាវ ដែលកើតមានឡើងនៅលើពិភពលោកកន្លងមកនោះ ។ យើងគួរបញ្ឈប់ការផ្សព្វផ្សាយព័ត៌មានដែលបង្ករឲ្យមានការភ័យខ្លាចទៀតទៅ យើងគួរតែផ្សព្វផ្សាយអំពីអាជីវកម្មរបស់យើងវាប្រសើរជាង ៕
អត្ថបទ និង រូបភាព៖ ងិន គីមឡេង, យូ វង្ស
