កាលពីល្ងាចថ្ងៃទី០២ ខែកុម្ភៈ ឆ្នាំ២០២០ សមត្ថកិច្ចនគរបាលក្រុងសៀមរាប បានបញ្ជូនយុវជន៦នាក់ ពាក់ព័ន្ធនឹងករណី មនុស្សឃាតដោយចេតនា ដែលបណ្ដាលឲ្យមនុស្សម្នាក់ស្លាប់ ទៅកាន់តុលាការខេត្ដសៀមរាប ដើម្បីចាត់ការតាមនីតិវិធី។
តាមរបាយការណ៍របស់សមត្ថកិច្ច កាលពីវេលាម៉ោង១២និង៣០នាទី ឈានចូលថ្ងៃទី២៥ ខែមករា ឆ្នាំ២០២០ ជនសង្ស័យទាំង៦នាក់នេះ បានឈ្លោះប្រកែកគ្នា ជាមួយជនរងគ្រោះ ឈ្មោះ ហេង វិឆាយ ភេទប្រុស អាយុ២០ឆ្នាំ មុខរបរ កម្មករទិញ -លក់អេតចាយ រួមនិងបក្ខពួកចំនួន៣នាក់ទៀត នៅក្នុងក្លឺបកំសាន្ត កាឡាក់ស៊ី ស្ថិតនៅភូមិសាលាកន្សែង សង្កាត់ស្វាយដង្គុំ ក្រុងសៀមរាប។ បន្ទាប់ពីមក នៅវេលម៉ោង ២:៣០នាទីរំលងអាធ្រាតថ្ងៃដដែល បក្ខពួកជនរងគ្រោះ បានចេញពីក្លឹបកំសាន្ត ដល់ចំណុចខាងក្រោយសណ្ឋាគារសូហ្វីតែល ស្ថិតនៅភូមិសាលាកន្សែង សង្កាត់ស្វាយដង្គុំ ក្រុងសៀមរាប ក៏មានមនុស្សមួយក្រុម ជិះម៉ូតូប្រហែល៦គ្រឿង បានប្រើកាំបិតខ្វែវមួយដើម កាប់ទៅលើជនរងគ្រោះឈ្មោះ ហេង វិឆាយ បណ្ដាលឲ្យស្លាប់ បន្ទាប់ពីបញ្ជូនទៅសង្គ្រោះនៅមន្ទីរពេទ្យបង្អែកខេត្តសៀមរាប។
តាមការឲ្យដឹងពី លោក ណុប សារ៉ាក់ អធិការនគរបាលក្រុងសៀមរាប ក្រោយមានការសហការជាមួយស្នងការនគបាលខេត្ដសៀមរាប ក្រុមសមត្ថកិច្ចជំនាញ បានធ្វើការស៊ើបអង្កេត និងស្រាវជ្រាវ រយៈពេល០៧ថ្ងៃ ចាប់ពីថ្ងៃទី២៦ ខែមករា ដល់ថ្ងៃទី០២ ខែកុម្ភៈ ឆ្នាំ២០២០ និងកំណត់មុខសញ្ញា រហូតដល់ការឃាត់ខ្លួនជនសង្ស័យទាំង៦នាក់នេះ ជាបន្តបន្ទាប់។
ព័ត៌មានជាតិ ថ្មីៗ
អត្ថបទ និង រូបថត ៖ លោក បូ សាវី និងលោក ខេង ឧត្តម
កែសម្រួលអត្ថបទ ៖ លោក សេង ផល្លី
