នៅព្រឹកថ្ងៃទី០៥ ខែកុម្ភៈ ឆ្នាំ២០២០នេះ មន្ទីរកិច្ចការនារីខេត្តសៀមរាប សហការជាមួយមន្ទីរអប់រំយុវជន និងកីឡាខេត្ត និង រដ្ឋបាលស្រុកក្រឡាញ់ បានរៀបចំធ្វើវេទិកាពិគ្រោះយោបល់ស្តីពី បញ្ហាប្រឈមនៅក្នុងសង្គម និងផលប៉ះពាល់របស់យុវវ័យ ដល់សិស្សា នុសិស្ស នៅអនុវិទ្យាល័យសំបួរ ក្នុងស្រុកក្រឡាញ់ ដោយមានការចូលរួមពីសំណាក់លោកគ្រូ អ្នកគ្រូ និងសិស្សានុសិស្ស សរុបចំនួន ៤១៨ នាក់ ក្នុងនោះស្រីចំនួន ២៥៣នាក់ ។
ក្នុងគោលបំណងសំខាន់នៃវេទិកានេះ គឺដើម្បីបង្កើនការយល់ដឹងពីការចូលរួមក្នុងការលើកកម្ពស់សីលធម៌សង្គម តាមរយៈការអប់រំ និងកាត់បន្ថយនូវរាល់ទស្សនៈ ឥរិយាបថ និងផ្នត់គំនិតអវិជ្ជមានរបស់យុវវ័យ ពិសេសពិតជាបានឆ្លុះបញ្ចាំងពីទិដ្ឋភាពជាក់ស្តែង នៅក្នុងសង្គមនាពេលបច្ចុប្បន្ន ថាតើយុវវ័យបានរួមចំណែកអ្វីខ្លះ ក្នុងការកសាងជាតិ មាតុភូមិ និងជៀសឲ្យឆ្ងាយពីគ្រឿងញៀន អំពើអមនុស្សធម៌ គ្មានគុណធម៌ គ្មានព្រហ្មវិហារធម៌ ភ្លើតភ្លើន ការសប្បាយហួសលទ្ធភាព ហ៊ានប្រលែងលេង និងល្បែងស្នេហាទំាងខ្លួននៅវ័យសិក្សា។
វេទិកានេះ ក៏បានលើកឡើងពីគោលនយោបាយជាតិស្តីពីការអភិវឌ្ឍយុវជនកម្ពុជា ទទួលស្គាល់ពីបំណងប្រាថ្នា តម្រូវការ និងលក្ខខណ្ឌយុវជន ដោយបានបញ្ជាក់ច្បាស់អំពីចក្ខុវិស័យ គោលបំណង គោលដៅ និងយុទ្ធសាស្រ្តមួយចំនួន ដើម្បីប្រមូលផ្តុំកម្លាំងយុវជនគ្រប់មជ្ឈដ្ឋាន និងកៀរគរធនធាន សំដៅអភិវឌ្ឍយុវជនឲ្យក្លាយទៅជាពលរដ្ឋមានកាយសម្បទាចំណេះដឹង ចំណេះធ្វើ មានគំនិតផ្តួចផ្តើម គំនិតបង្កើតថ្មី និងស្មារតីសហគ្រិនភាព ដែលជាកត្តាកំណត់សក្តានុពលសេដ្ឋកិច្ចសង្គមជាតិទំាងមូល។
លោកស្រី ងិន សារិន អនុប្រធានមន្ទីរកិច្ចការនារីខេត្ត បានលើកឡើងថា វិស័យអប់រំមានតួនាទីយ៉ាងសំខាន់ ក្នុងការរួមចំណែកការអភិវឌ្ឍន៍ដល់កុមារ យុវវ័យ និងមនុស្សពេញវ័យ ដែលត្រូវទទួលបានការអប់រំ និងការសិក្សាពេញមួយជីវិត ឆ្លើយតបទៅនឹងតម្រូវការទីផ្សារការងារ ប្រកបដោយគុណភាពខ្ពស់ ហើយការអប់រំត្រូវផ្តោតលើការសិក្សាជំនាញ និងការផ្តល់ឱកាសដល់សិស្សគ្រប់រូប ក្នុងការទទួលបានចំណេះដឹងមូលដ្ឋាន ដើម្បីឈានទៅការសិក្សាលើជំនាញបច្ចេកទេស និងជំនាញ ឯកទេសផ្សេងៗ ដើម្បីសម្រេចបានការអភិវឌ្ឍដែលផ្តល់អត្ថប្រយោជន៍ពេញលេញ ដល់ស្រទាប់យុវជន ក្នុងការកសាងអនាគតរបស់ខ្លួន ប្រកបដោយគុណភាព ខណៈដែលការអប់រំបានដើរតួនាទីយ៉ាងសំខាន់ក្នុងការអភិវឌ្ឍធនធានមនុស្ស និងជាឆ្អឹងខ្នងនៃការអភិវឌ្ឍសេដ្ឋកិច្ចជាតិ ៕
អត្ថបទ និង រូបថត ៖ មន្ទីរកិច្ចការនារីខេត្តសៀមរាប
កែសម្រួលអត្ថបទ ៖ លោក លីវ សាន្ត
