អ្នកព័ត៌មានជាកញ្ចក់ឆ្លុះបង្ហាញពីតថភាពសង្គម និងជាស្ពានចម្លងសារ ពីអាជ្ញាធរជូនប្រជាពលរដ្ឋ និងពីប្រជាពលរដ្ឋទៅកាន់អាជ្ញាធរវិញ តែក្នុងកាលៈទេសៈណាក៏ដោយ ភ្នាក់ងារយកព័ត៌មានមិនមែនជាអាជ្ញាធរ ឬមន្ត្រីមានសមត្ថកិច្ច ឬតុលាការឡើយ និងចៀសវាងយកតួនាទីជាអ្នកសារព័ត៌មាន បម្រើផលប្រយោជន៍ផ្ទាល់ខ្លួន នេះបើតាមប្រសាសន៍ លោក លីវ សុខុន ប្រធានមន្ទីរព័ត៌មានខេត្តសៀមរាប នៅនៅថ្ងៃទី០៦ ខែកុម្ភៈ ឆ្នាំ២០២០ វគ្គបណ្តុះបណ្តាលការអនុវត្តច្បាប់ ស្តីពី របបសារព័ត៌មាន។
វគ្គបណ្ដុះបណ្ដាលនេះ រៀបចំឡើងដោយ អង្គការជំនួយផ្នែកច្បាប់នៃកម្ពុជា ក្រោមកិច្ចសហការជាមួយសាលាខេត្តសៀមរាប និង មន្ទីរព័ត៌មានខេត្តសៀមរាប ព្រមទាំងមានការចូលរួមពី បណ្តាញអ្នកសារព័ត៌មាន ដែលធ្វើការផ្សាយព័ត៌មានរបស់ខ្លួន នៅលើគេហទំព័រ ហ្វេសប៊ុក និង កាសែតជាដើម ប្រមាណជាង៣០រូប មកពី ២៤ស្ថាប័ន ក្នុងខេត្តសៀមរាប។
លោកប្រធានមន្ទីរព័ត៌មានខេត្ត បន្ថែមថា ៖ ដើម្បីធានាបាននូវប្រសិទ្ធភាពក្នុងកិច្ចប្រតិបត្តិការការងារសារព័ត៌មាន រាជរដ្ឋាភិបាលកម្ពុជា តាមរយៈនៃក្រសួងព័ត៌មាន ដែលមាន មន្ទីរព័ត៌មានតាមបណ្ដារាជធានី-ខេត្តទាំងអស់ជាសេនាធិការ សហការ ជាមួយអង្គការដៃគូនានា យកចិត្តទុកដាក់ខ្ពស់ រៀបចំសិក្ខាសាលា និងវគ្គបណ្តុះបណ្តាល បង្កឱកាសឲ្យមានការជួបជុំគ្នានៃអ្នកសារព័ត៌មាន ប្រមូលមតិយោបល់ សំណូមពរ បទពិសោធន៍សំខាន់ៗ សម្រាប់ដោះស្រាយបញ្ហាប្រឈមនានា ពិសេសសំដៅ អប់រំផ្សព្វផ្សាយ អំពីតួនាទីរបស់អ្នកសារព័ត៌មានប្រកដោយវិជ្ជាជីវៈ។
ព័ត៌មានជាតិ ថ្មីៗ
លោក រុន សារាយ នាយកប្រតិបត្តិរបស់អង្គការជំនួយផ្នែកច្បាប់នៃកម្ពុជា លើកឡើងថា វគ្គបណ្តុះបណ្តាលនេះមានគោលបំណង ផ្តល់ចំណេះដឹងបន្ថែមឲ្យកាន់តែច្បាស់ អំពីសិទ្ធរបស់អ្នកសារព័ត៌មាន និងការប្រកាន់យកនូវក្រមសីលធម៌វិជ្ជាជីវៈរបស់អ្នកសារព័ត៌មានក្នុងខេត្តសៀមរាប។ ទន្ទឹមនឹងការគោរពច្បាប់ និងក្រមសីលធម៌វិជ្ជាជីវៈ អ្នកសារព័ត៌មានត្រូវតែឈរលើគោលគោលការណ៍ ៣ចំណុចបន្ថែមទៀត គឺឯករាជ្យភាព សុច្ចរិចភាព និងទំនួលខុសត្រូវលើការសរសេរផ្សព្វផ្សាយព័ត៌មានរបស់ខ្លួន ដោយការថ្លឹងថ្លែងចៀសវាងការចេញផ្សាយព័ត៌មានមិនពិត ដែលនាំឲ្យជះឥទ្ធិពលមិនល្អដល់សង្គមជាតិ ហើយកាន់តែធ្ងន់នោះ គឺការប៉ះពាល់ដល់ការអភិវឌ្ឍសដ្ឋកិច្ចនិងសន្តិសុខជាតិ ។
មានវត្តមានក្នុងឱកាសនោះ លោក ចឹក គឹមជុន តំណាងឲ្យអាជ្ញាធរខេត្តសៀមរាប ក៏បានសំណូមពរ ដល់អ្នកសារព័ត៌មានទាំងអស់ ចូលរួមប្រយុទ្ធប្រឆាំងនឹងព័ត៌មានក្លែងក្លាយ តាមរយៈការបញ្ចេញព័ត៌មានពិតឆ្លើយតប ឲ្យបានទាន់ពេលវេលា ។ លោក ក៏បានរំលឹកដែរថា ៖ ពាក្យស្លោកមួយឃ្លា ដ៏មានតម្លៃរបស់សម្តេចតេជោ ប្រមុខនៃរាជរដ្ឋាភិបាលកម្ពុជា “កុំបំពានអ្នកដទៃ កុំបំភ្លៃការពិត” គឺមានអត្ថន័យស៊ីជម្រៅបំផុត សម្រាប់អ្នកសារព័តមាន គោរពប្រតិបត្តិ។
សូមជម្រាបថា អង្គការជំនួយផ្នែកច្បាប់នៃកម្ពុជា គឺជាអង្គការក្រៅរដ្ឋាភិបាលក្នុងស្រុក មិនធ្វើនយោបាយ ទទួលជំនួយឧបត្ថម្ភពី Internews ដែលមានស្នាក់ការនៅទីក្រុងឡុង ប្រទេសអង់គ្លេស ដើម្បីអនុវត្តគម្រោងស្តីពីការពង្រឹងសមត្ថភាពដល់អ្នកសារព័ត៌មាន ឲ្យមានការគោរពច្បាប់ និងក្រមសីលធម៌វិជ្ជាជីវៈអ្នកសារព័ត៌មាន ។ គម្រោងនេះ មានរយៈពេល១៨ខែ ចាប់ពីថ្ងៃទី០១ ខែមករា ឆ្នាំ២០១៩ ដល់ថ្ងៃទី៣១ ខែសីហា ឆ្នាំ២០២០ សម្រាប់ខេត្តគោលដៅចំនួន២ គឺសៀមរាប និង បាត់ដំបង ៕
អត្ថបទ និង រូបថត : លោក ងិន គឹមឡេង
កែសម្រួលអត្ថបទ : លោក សេង ផល្លី
