នៅខែមករា ដើមឆ្នាំ២០២០នេះ ដោយសារជំងឺរលាកសួតប្រភេទថ្មី បង្កដោយវីរុសកូរ៉ូណា បណ្ដាលឲ្យវិស័យទេសចរណ៍ក្នុងខេត្តសៀមរាប មានការធ្លាក់ចុះ ជាពិសេសទេសចរចិនបានថយចុះប្រមាណ ៣៥ភាគរយបើធៀបនឹងរយៈពេលដូចគ្នា នេះបើតាមការលើកឡើងរបស់ឯកឧត្តម ទៀ សីហា អភិបាលខេត្តសៀមរាប នារសៀល ថ្ងៃទី១០ ខែកុម្ភ: ឆ្នាំ២០២០ នៅសាលាខេត្តសៀមរាប ក្នុងកិច្ចប្រជុំការងារទេចរណ៍ ជាមួយផ្នែកឯកជនក្នុងវិស័យទេសចរណ៍។
ឯកឧត្តមអភិបាលខេត្ត បន្ថែមថា ជើងហោះហើរ ពីប្រទេសនានាលើសកលលោក ត្រូវបានរឹតបណ្តឹង ជាពិសេសការហោះហើរក្នុងប្រទេសចិន។ ការសម្រេចចិត្តនេះ បានជះផលប៉ះពាល់ជាអវិជ្ជមាន ជាច្រើនដល់ ចលនាសេដ្ឋកិច្ច ហើយ ក្នុងនោះ ក៏ប៉ះពាល់ដល់វិស័យទេសចរណ៍ជាសកលផងដែរ។
ឯកឧត្តម បញ្ជាក់ថា បញ្ហាជំងឺផ្លូវដង្ហើមប្រភេទថ្មីនេះ ក៏ជាការព្រួយបារម្ភរបស់រដ្ឋបាលខេត្តផងដែរ ដើម្បីទប់ស្កាត់ បង្ការ និងការពារប្រជាពលរដ្ឋ និងភ្ញៀវទេសចរ ដែលកំពុងស្នាក់នៅ និងមានគម្រោងមកទស្សនាខេត្តសៀមរាប ចៀងផុតពីការឆ្លងនៃមេរោគនេះ។ ជាមួយនោះ រដ្ឋបាលខេត្ត បានរៀបចំឲ្យមានក្រុមការងារមន្ត្រីសុខាភិបាលខេត្តប្រចាំការជាប្រចាំនៅអាកាសយានដ្ឋានអន្តរជាតិសៀមរាប ឬហៅថា មន្ត្រីចត្តាឡីស័ក ដើម្បីធ្វើការត្រួតពិនិត្យ ស្វែងរកអ្នកដំណើរ ដែលសង្ស័យថា មានកើតជំងឺផ្លូវដង្ហើមប្រភេទថ្មីនេះ ក្នុងគោលបំណងធ្វើឲ្យខេត្តសៀមរាប នៅតែជាគោលដៅទេសចរណ៍ប្រកបដោយសុខសុវត្ថិភាព។
ឯកឧត្តម ទៀ សីហា ក៏បានលើកឡើងផងដែរថា អាជ្ញាធរខេត្តសៀមរាប នៅតែបន្តជំរុញ និងយកចិត្តទុកដាក់លើការកែលំអរសោភណ្ឌភាពក្រុង ឲ្យបានកាន់តែល្អប្រសើរ តាមរយៈការកសាងហេដ្ឋារចនាសម្ព័ន្ធក្នុង ការផ្គត់ផ្គង់អគ្គីសនី ប្រព័ន្ធទឹកស្អាត ប្រព័ន្ធបំភ្លឺសាធារណៈ ការងារពង្រឹងសន្តិសុខសុវត្តិភាពសាធារណៈ ក្នុងខេត្ត ឲ្យស្របតាមយុទ្ធនាការចលនាប្រឡងប្រណាំង “ទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ”។ ពិសេសផ្តោត សំខាន់ទៅលើយុទ្ធសាស្រ្ត របស់ក្រសួងទេសចរណ៍ ជំរុញការបង្កើតឲ្យមានផលិតផលថ្មី ប្រកបដោយការច្នៃប្រឌិត ស្របតាមនិន្នាការនៃការអភិវឌ្ឍវិស័យទេសចរណ៍នាពេលបច្ចុប្បន្ន និងទៅថ្ងៃអនាគត ដោយកំណត់ឲ្យបាននូវគោលដៅជាយុទ្ធសាស្រ្តសម្រាប់់ជំរុញ និងពង្រឹងការគ្រប់គ្រង និងអភិវឌ្ឍគោលដៅទេសចរណ៍សៀមរាប-អង្គរ ដោយគិតគូរទៅលើការពង្រឹងគុណភាពសេវាកម្មទេសចរណ៍ បង្កើនប្រសិទ្ធភាពការងារ សំដៅធ្វើយ៉ាងណាឲ្យគ្រប់ផលិតផលទេសចរណ៍ និងសេវាកម្មទេសចរណ៍មានគុណភាពស្របតាមទស្សនទាន “សេវាមួយ ស្តង់ដាមួយ” ។
អត្ថបទ និង រូបភាព៖ លោក យូ វង្ស និង លោក ងិន គឹមឡេង
កែសម្រួល៖ លោក សេង ផល្លី
