កម្រាលផ្លូវ និងចិញ្ចើមផ្លូវ ស្ថាបនាពីដុំបេតុងជម្រាបទឹកពិសេស មានប្រវែង១០៧ម៉ែត្រ និងទទឹង២០ម៉ែត្រ ដែលជាគម្រោងសាកល្បងការពារទឹកជំនន់ទឹកភ្លៀងក្នុង ក្រុងសៀមរាប ស្ថិតនៅតាមបណ្ដោយផ្លូវ ២ធ្នូ មុខមន្ទីរពេទ្យបង្អែកខេត្តសៀមរាប ក្នុងតំបន់ផាប់ស្ទ្រីត ត្រូវបានសម្ពោធដាក់ឱ្យប្រើប្រាស់ជាផ្លូវការហើយ នារសៀលថ្ងៃទី១០ ខែកុម្ភៈ ឆ្នាំ២០២០ ក្រោមអធិបតីភាពឯកឧត្តម ទៀ សីហា អភិបាលខេត្តសៀមរាប។
គម្រោងសាកល្បងនេះដែរ រដ្ឋបាលខេត្តសៀមរាប គ្រោងនឹងបន្តសាងសង់ បន្ថែមទៀតនៅក្នុងតំបន់ផាប់ស្ទ្រីតដដែល ក្នុងទឹកប្រាក់៣០០លានរៀល ខណៈគម្រោងដែលបានដាក់សម្ពោធឲ្យប្រើប្រាស់ជាផ្លូវការនាពេលនេះ ចំណាយអស់ថវិកាសរុប ១៩៥,០០០ដុល្លារ គាំទ្រថវិកាពីរបស់ទីភ្នាក់ងារសហប្រតិបត្តិការអន្តរជាតិជប៉ុន ដែលហៅកាត់ថា JICA។
លោក ស៊ូកាណូ យូឈី (Sugano Yuichi) ប្រធានអង្គការJICA ប្រចាំនៅកម្ពុជា មានប្រសាសន៍ថា ក្នុងគម្រោងភាពជាដៃគូឯកជនរបស់JICA ពួកយើងមានគោលបំណង ដោះស្រាយបញ្ហាសង្គម និងសេដ្ឋកិច្ចនៅក្នុងប្រទេស កំពុងអភិវឌ្ឍ ទៅលើវិស័យផ្សេងៗ ជាមួយនឹងក្រុមហ៊ុនឯកជនជំនាញ របស់ប្រទេសជប៉ុន។ កាលពីខែវិច្ឆិកា ឆ្នាំ២០១៨JICA មើលឃើញពីការបង្កើតបណ្តាញទីក្រុងឆ្លាតអាស៊ាន តាមរយៈកិច្ចសហប្រតិបត្តិការថ្មីនេះ និងជួយដោះស្រាយបញ្ហាប្រឈមក្នុងក្រុងសៀមរាប និងឈានទៅពង្រីកវិសាលភាពនៅតាមដងផ្លូវនានាបន្ថែមទៀតនាពេលខាងមុខ។
ព័ត៌មានជាតិ ថ្មីៗ
ថ្លែងក្នុងឱកាសនោះ ឯកឧត្តម ទៀ សីហា បានថ្លែងអំណរគុណ ចំពោះក្រុមហ៊ុន អ៊ុមុរ៉ា (OMURA CERATEC Co.LTD) របស់ជប៉ុន ដែលបានមកបណ្ដាក់ទុននៅកម្ពុជា និងជឿទុកចិត្ត លើការដឹកនាំរបស់រាជរដ្ឋាភិបាលកម្ពុជា ដែលមានសម្ដេចតេជោ ជាប្រមុខ។ ជាមួយនោះ ក្នុងនីតិកាលទី៦ ក្នុងឆ្នាំ២០១៩នេះ ក្រោមការឧបត្ថម្ភគាំទ្រពីសម្តេចនាយករដ្ឋមន្រ្តី សម្តេចពិជ័យសេនា ឧបនាយករដ្ឋមន្រ្តីក្រសួងការពារជាតិ និងជាប្រធានក្រុមការងារថ្នាក់ជាតិ ចុះមូលដ្ឋានខេត្តសៀមរាប និងកិច្ចសហការពីឯកឧត្តម លោកជំទាវ ក្រុមប្រឹក្សា គណៈអភិបាលខេត្ត ព្រមទាំងមន្ទីរ-អង្គភាព រដ្ឋបាលក្រុង-ស្រុក និងអាជ្ញាធរមូលដ្ឋាន រដ្ឋបាលខេត្តសៀមរាប បានខិតខំដោះស្រាយបញ្ហាប្រឈមជាច្រើន រហូតទទួលបាននូវសមិទ្ធផលធំៗជាច្រើន។
ឯកឧត្តមអភិបាលខេត្ត សង្ឃឹមថា អង្គការ JICA និងក្រុមហ៊ុនរបស់ប្រទេសជប៉ុន នឹងបន្តនូវការគាំទ្រ និងវិនិយោគបន្ថែមទៀត ដើម្បីចូលរួម ដល់កិច្ចអភិវឌ្ឍន៍នៅកម្ពុជា ក៏ដូចជាខេត្តសៀមរាបផងដែរ។
សូមជម្រាបថា កម្រាល និងចិញ្ចើមផ្លូវដោយប្រើកម្រាលបេតុងជម្រាបទឹកពិសេសនេះ ប្រើប្រាស់រយៈពេល៤ខែ ដើម្បីសាងសង់ គឺចាប់ពីខែកុម្ភៈ ដល់ខែឧសភា ឆ្នាំ២០១៩។ ក្នុងនោះ គម្រោងនេះ បានកែសម្រួលគ្រឺះឡើងវិញ និងរៀបចំក្រាលកម្រាលបេតុងប្រភេទជម្រាបទឹក ដោយបែងចែកជា៣ប្រភេទ គឺ ប្រភេទដុំបេតុងលើទ្រូងផ្លូវ ប្រភេទដុំបេតុងលើផ្លូវថ្មើជើង និងកែលំអបណ្តាញលូទឹកភ្លៀង។
អត្ថបទ និង រូបភាព៖ លោក យូ វង្ស
កែសម្រួល៖ លោក សេង ផល្លី
