(មិចស៊ីកូ)៖ រដ្ឋមន្ត្រីការបរទេសមិចស៊ីកូលោក ម៉ាសេឡូ អេប្រាដ (Marcelo Ebrard) បានប្រាប់ឱ្យដឹងនៅថ្ងៃពុធសប្តាហ៍នេះថា ចំនួនជនអន្តោប្រវេសន៍ ដែលឆ្លងកាត់ព្រំដែនអាមេរិក-មិចស៊ីកូក្នុងរយៈពេល ០៩ខែកន្លងមកនេះ បានធ្លាក់ចុះរហូតដល់ ៧៤.៥% បន្ទាប់ពីមាន កិច្ចព្រមព្រៀងទ្វេភាគី ដើម្បីទប់ស្កាត់លំហូរជនអន្តោប្រវេសន៍រវាងប្រទេសទាំងពីរ។ នេះបើតាមការចេញផ្សាយ ដោយទីភ្នាក់ងារព័ត៌មានចិនស៊ីនហួរ នៅព្រឹកថ្ងៃព្រហស្បតិ៍ ទី១៣ ខែកុម្ភៈ ឆ្នាំ២០២០។
កាលពីខែឧសភា ឆ្នាំ២០១៩ កន្លងទៅ ដោយសារតែចំនួនជនអន្តោប្រវេសន៍ ដែលបានឆ្លង ព្រំដែនបានឈានទៅដល់ចំនួនខ្ពស់បំផុត ពុំធ្លាប់មានពីមុនមកនោះ ប្រធានាធិបតី សហរដ្ឋ អាមេរិកលោក ដូណាល់ ត្រាំ បានស្នើឱ្យឲ្យរដ្ឋាភិបាលមិចស៊ីកូ ចាត់វិធានការគ្រប់គ្រង ឲ្យបាន តឹងរ៉ឹងបំផុត ដើម្បីធានា និងពង្រឹងសន្តិសុខ នៅតាមព្រំដែនរបស់ខ្លួន ជាពិសេសជាមួយបណ្តា ប្រទេសអាមេរិកកណ្តាល។
ជុំវិញបញ្ហានេះដែររដ្ឋមន្ត្រីការបរទេសមិចស៊ីកូបានថ្លែងថា «គោលដៅនៃវិធានការទាំងនេះ គឺដើម្បីកាត់បន្ថយហានិភ័យខ្ពស់ ដែលអាចនឹងប្រឈមចំពោះអ្នកដែលចង់ចំណាកស្រុក»។ លោកក៏បានបន្ថែមទៀតថា ដើម្បីធានាសន្តិសុខជូនប្រជាជន រដ្ឋាភិបាលមិចស៊ីកូបានដឹកនាំ កម្មវិធីពហុជាតិ ដើម្បីជំរុញការវិនិយោគនៅតំបន់អាមេរិកកណ្តាល និងបានបង្កើតគណៈកម្មាធិកា រពិសេសមួយ ដើម្បីជួយជនចំណាកស្រុក ឱ្យមានការងារធ្វើបណ្តោះអាសន្ន។
គួរជម្រាបថា កាលពីខែមករា ដើមឆ្នាំ២០២០ ចំនួនជនអន្តោប្រវេសន៍ដែលឆ្លង កាត់ព្រំដែន ប្រទេសទាំងពីរ មានត្រឹមតែ ៣៦.៦៧៩នាក់ប៉ុណ្ណោះ ដែលនេះជាតួលេខដែល បានធ្លាក់ចុះ ទាបបំផុត បើប្រៀបធៀបនឹងចំនួនជនអន្តោប្រវេសន៍កាលពីខែឧសភា ឆ្នាំ២០១៩ កន្លងទៅ ដែលមានចំនួនរហូតដល់ ១៤៤,១១៦នាក់ ត្រូវបានកត់ត្រាដោយអាជ្ញាធរមិចស៊ីកូ។
