កាលពីថ្ងៃទី១២ ខែកុម្ភៈ ឆ្នាំ២០២០ម្សិលមិញនេះ មន្ទីរកិច្ចការនារីខេត្តសៀមរាប បានសហការជាមួយមន្ទីរអប់រំយុវជន និងកីឡាខេត្ត រៀបចំបើកវេទិកាពិគ្រោះយោបល់ស្តីពី បញ្ហាប្រឈមនៅក្នុងសង្គម និងផលប៉ះពាល់របស់យុវវ័យ ដល់សិស្សានុសិស្ស ក្នុងគោលបំណងៈ ដើម្បីបង្កើនការយល់ដឹងពីការចូលរួមក្នុងការលើកកម្ពស់សីលធម៌សង្គម តាមរយៈការអប់រំ និងកាត់បន្ថយនូវរាល់ទស្សនៈ ឥរិយាបថ និងផ្នត់គំនិតអវិជ្ជមានរបស់យុវវ័យ ។ កម្មវិធីនេះបានរៀបចំឡើង នៅអនុវិទ្យាល័យ កែវព័ណ័ និងអនុវិទ្យាល័យដូស្វា ស្រុកពួក ខេត្តសៀមរាប ដោយមានការអញ្ជើញចូលរួមពីសំណាក់ លោកស្រី សំ សុយិន ប្រធានការិយាល័យរដ្ឋ រួមជាមួយបុគ្គលិក និងមន្ត្រីរាជការនៃមន្ទីរកិច្ចការនារីខេត្ត លោកនាយកសាលា អ្នកគ្រូ លោកគ្រូ និងសិស្សានុសិស្ស សរុបចំនួន ៤១២នាក់ផងដែរ ។
បើតាមលោកស្រី សំ សុយិន បានលើកឡើងថា វិស័យអប់រំមានតួនាទីយ៉ាងសំខាន់ ក្នុងការអភិវឌ្ឍន៍ធនធានមនុស្ស និងជាឆ្អឹងខ្នងនៃការអភិវឌ្ឍសេដ្ឋកិច្ចជាតិ ។ ការអប់រំមានគ្រប់រូបភាព ទាំងក្នុងប្រព័ន្ធ ក្រៅប្រព័ន្ធ និងមិនផ្លូវការ ជាមធ្យោបាយសក្កិសិទ្ធក្នុងការធានាអោយការសិក្សាមានគុណភាពប្រកបដោយសមធម៌ បរិយាប័ន្ន និងការលើកកម្ពស់ឱកាសសិក្សាពេញមួយជីវិតសម្រាប់ទាំងអស់គ្នា ។
លោកស្រីបន្តថា វេទិការនេះដែរ វាគឺជាការឆ្លុះបញ្ចាំងឲ្យឃើញពីទិដ្ឋភាពជាក់ស្តែង នៅក្នុងសង្គមនាពេលបច្ចុប្បន្ន ថាតើយុវវ័យ និងយុវជន បានរួមចំណែកអ្វីខ្លះក្នុងការកសាងជាតិមាតុភូមិ និងជៀសឲ្យឆ្ងាយពីគ្រឿងញៀន អំពើអមនុស្សធម៌ គ្មានគុណធម៌ គ្មានព្រំវិហារធម៌ ភ្លើតភ្លើន ការសប្បាយហួសលទ្ធភាព ហ៊ានប្រលែងលេង និងល្បែងស្នេហាទំាងខ្លួននៅវ័យសិក្សា ។ ជាពិសេស ការសិក្សាពេញមួយជីវិតបានក្លាយជាប្រធានបទដ៏សំខាន់សំដៅដល់ការធានាសិទ្ធ សេរីភាព និងសុភមង្គល បុគ្គល គ្រួសារ និងសង្គម ដើម្បីឆ្លើយតប នឹងទីផ្សារការងារក្នុងបរិបទថ្មី ៕
ព័ត៌មានជាតិ ថ្មីៗ
អត្តបទនិងរូបភាព៖រដ្ឋបាលខេត្តសៀមរាប
កែសម្រួល៖ អ៊ុន ណារាជ្យ
