គិតត្រឹមថ្ងៃទី១៣ ខែកុម្ភៈ ឆ្នាំ២០២០ មានរយៈពេល៤ថ្ងៃ ដែលរដ្ឋបាលខេត្តសៀមរាប បានប្រកាសការដាក់ឲ្យដំណើរការរចនាសម្ព័ន្ធថ្មីនៃរដ្ឋបាលក្រុងស្រុកទាំង១២ របស់ខ្លួនរួចរាល់ជាស្ថាពរ។ នៅថ្ងៃបញ្ចប់នេះដែរ ឯកឧត្តម ទៀ សីហា អភិបាលខេត្តសៀមរាប បានអញ្ជើញជាអធិបតីទៅដល់ស្រុកក្រឡាញ់ និងស្រុកស្រីស្នំ ជាស្រុកគោលដៅចុងក្រោយ ដែលត្រូវបានប្រកាសដាក់ឱ្យដំណើរការរចនាសម្ព័ន្ធថ្មី នៃរដ្ឋបាលក្រុងស្រុក ។
ចំពោះស្រុកក្រឡាញ់ មន្ត្រីដែលបានធ្វើសមាហរណកម្ម និងការរៀបចំដាក់បញ្ចូលទៅក្នុងរចនាសម្ព័ន្ធថ្មីនៃរដ្ឋបាល មានចំនួនសរុប ៤៧នាក់ និងរដ្ឋបាលស្រុកស្រីស្នំសរុបមានចំនួន ២៩នាក់។
ឯកឧត្តម ទៀ សីហា បានលើកឡើងថា ការរៀបចំ និងការអនុវត្តកំណែទម្រង់វិមជ្ឈការ និងវិសហមជ្ឈការ នៅតាមប្រទេសនីមួយៗ មានលក្ខណៈផ្សេងៗគ្នា អាស្រ័យទៅតាមកត្តាភូមិសាស្ត្រ ប្រជាសាស្ត្រ ស្ថានភាពនយោបាយ សេដ្ឋកិច្ច សង្គមកិច្ច វប្បធម៌ និងប្រពៃណីនៃប្រទេសនីមួយៗ។ ដោយឡែក ការអនុវត្តគោលនយោបាយវិមជ្ឈការ និងវិសហមជ្ឈការ នៅកម្ពុជា មានគោលបំណងសំខាន់ៗចំនួន៣ ៖ ទី១៖ ពង្រឹង និងពង្រីកលទ្ធិប្រជាធិបតេយ្យ សេរី ពហុបក្ស ឲ្យចាក់គ្រឹះរហូតដល់មូលដ្ឋានតាមរយៈការបោះឆ្នោតបង្កើតក្រុមប្រឹក្សារាជធានី ខេត្ត ក្រុង ស្រុក ខណ្ឌ ឃុំ សង្កាត់ ដែលជាតំណាងរបស់ប្រជាពលរដ្ឋឋ។ ទី២៖ លើកកម្ពស់គុណភាព ប្រសិទ្ធភាពនៃការផ្តល់សេវាសាធារណៈ និងការអភិវឌ្ឍមូលដ្ឋាន តាមរយៈ ការផ្លាស់ប្តូរប្រព័ន្ធ និងរចនាសម្ព័ន្ធគ្រប់គ្រងរដ្ឋបាលនៅថ្នាក់មូលដ្ឋាន សំដៅផ្ទេរសិទ្ធិអំណាច មុខងារ និងធនធានទៅឲ្យរដ្ឋបាលថ្នាក់ក្រោមជាតិ ដើម្បីឲ្យមានការទទួលខុសត្រូវច្បាស់លាស់ក្នុងការផ្តល់សេវាសាធារណៈ និងការអភិវឌ្ឍមូលដ្ឋាន ឆ្លើយតបទៅនឹងតម្រូវការ និងដោះស្រាយនូវបញ្ហាប្រឈមនានា របស់ប្រជាពលរដ្ឋនៅតាមមូលដ្ឋានរបស់ខ្លួន ។ ទី៣៖ លើកកម្ពស់ការចូលរួម និងភាពជាម្ចាស់របស់ប្រជាពលរដ្ឋ នៅមូលដ្ឋាន ក្នុងការធ្វើសេចក្តីសម្រេចពាក់ព័ន្ធនឹងការគ្រប់គ្រង ដឹកនាំ និងអភិវឌ្ឍមូលដ្ឋានរបស់ខ្លួន សំដៅចូលរួមកាត់បន្ថយភាពក្រីក្រ និងលើកកម្ពស់គុណភាពជីវិតរបស់ប្រជាពលរដ្ឋ។
ព័ត៌មានជាតិ ថ្មីៗ
ទន្ទឹមនោះដែរ ឯកឧត្តមអភិបាលខេត្ត ក៏បានផ្ដល់អនុសាសន៍ មួយចំនួនសម្រាប់ជាប្រទីប ដើម្បីធានាដល់ការគ្រប់គ្រងរចនាសម្ព័ន្ធថ្មីរបស់រដ្ឋបាលស្រុកទាំងពីរនេះ ប្រកបដោយភាពមានរលូន រួមមាន ការចាត់ចែងអនុវត្តការងារ ឲ្យស្របទៅតាម នីតិវិធីរដ្ឋបាល និងនីតិវិធីហិរញ្ញវត្ថុ រហូតដល់មានការណែនាំថ្មីពីក្រសួង ស្ថាប័នពាក់ព័ន្ធនានា, រៀបចំទីតាំងបំពេញការងារ ដើម្បីងាយស្រួលក្នុងទំនាក់ទំនងការងារ, ចរាចរលិខិតស្នាមផ្លូវការ ស្របតាមរចនាសម្ព័ន្ធថ្មីនៃរដ្ឋបាលស្រុក, គ្រប់គ្រងបុគ្គលិករបស់ការិយាល័យជំនាញនៃក្រសួង ស្ថាប័ននានា មកជាបុគ្គលិករដ្ឋបាលថ្នាក់ក្រោមជាតិ របស់ក្រសួងមហាផ្ទៃ, គ្រប់គ្រងកិច្ចការ ឯកសារ និងទ្រព្យសម្បត្តិ ត្រូវបន្តគ្រប់គ្រង ដែល ធ្លាប់គ្រប់គ្រង និងប្រើប្រាស់ដោយការិយាល័យជំនាញនៃក្រសួង ស្ថាប័ន ខណៈធនធានហិរញ្ញវត្ថុ និងទ្រព្យសម្បត្តិ មុខងារទាំងនោះ នៅមិនទាន់បានផ្ទេរឱ្យបានស្របជាមួយមុខងារនៅឡើយ។ បន្ថែមពីនោះ ឯកឧត្តម អភិបាលខេត្ត ក៏បានលើកពីការ ពង្រឹងសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ការរៀបចំកិច្ចប្រជុំក្រុមប្រឹក្សា និងការគាំទ្រដល់រដ្ឋបាលឃុំផងដែរ។
អត្ថបទ៖ សេង ផល្លី
រូបភាព៖ មន្ត្រីមន្ទីរព័ត៌មានខេត្ត
