ព្រៃហគមន៍ចង្ក្រានរយ មានទីតាំងឃុំស្វាយស ស្រុកវ៉ារិន ខេត្តសៀមរាប ជាតំបន់ទេសចរណ៍ធម្មជាតិ ជម្រកសត្វព្រៃ ទឹកធ្លាក់ និងប្រព័ន្ធជីវចម្រុះ ជាច្រើនប្រភេទទៀត ដែលគ្របដណ្ដប់នៅលើផ្ទៃដីចំនួន៩ពាន់ហិកតា។
នៅក្នុងបទសម្ភាន៍ កាលពីថ្ងៃទី១២ខែកុម្ភៈ ឆ្នាំ២០២០នេះ អ្នកស្រី ឈឿន សុឌី ប្រធានសហគមន៍ព្រៃឈើចង្ក្រានរយ បង្ហាញថា នៅលើភ្នំចង្ក្រានរយមានតំបន់ទេសចរណ៍អេកូធម្មជាតិជាង ៤០កន្លែង។ ភាពទាក់ទាញនៃតំបន់នេះ អ្នកទេសចរអាចបោះតង់ស្នាក់នៅ ក្នុងព្រៃសហគមន៍ប្រកបដោយសុវត្ថិភាព ហែលទឹកលេងនៅរដូវវស្សា ទស្សនាសត្វព្រៃ និងសត្វមេអំបៅ រួមជាមួយការធ្វើដំណើរដោយថ្មើរជើង ទៅគយគន់សមុទ្រឈើ ល្អាងប្រជៀវ និង នាំគ្នាជិះគោយន្ដ ឬជិះកង់កំសាន្ត ទស្សនាថ្មជារូបចង្ក្រាន រាប់ពាន់នៅលើភ្នំ។
លោក ឆឹង ស៊ុវី រិយ៉ា អ្នកសម្របសម្រួលគោលនយោបាយ និងបណ្ដាញ នៃអង្គការកម្មវិធីផ្លាស់ប្ដូរបទពិសោធន៍អនុផលព្រៃឈើ បានឲ្យដឹងផងដែរថា សហគមន៍ព្រៃឈើចង្ក្រានរយ ជាផ្នែកមួយដ៏មានសារសំខាន់ ក្នុងការជួយកាត់បន្ថយការប្រែប្រួលអាកាសធាតុ។ នៅទីនេះមានទាំងព្រៃស្រោងនិងព្រៃរបោះ ដែលគ្របដណ្ដប់ដោយព្រៃឈើប្រមាណជិត១ម៉ឺនហិកតា។ យុទ្ធសាស្ត្របង្កើតព្រៃសហគមន៍នេះ ជាតំបន់ទេសចរណ៍ គឺដើម្បីឲ្យប្រជាពលរដ្ឋ ក្នុងមូលដ្ឋានជួយអភិរក្ស ការពារព្រៃឈើនៅទីនេះ ពីជនល្មើសជិតឆ្ងាយ ព្រោះប្រជាពលរដ្ឋបានយល់ថា ចំណូលបានពីវិស័យទេសចរណ៍ មានភាពយូរអង្វែង ជាងការកាប់បំផ្លាញព្រៃឈើ។
ព័ត៌មានជាតិ ថ្មីៗ
អត្ថបទ និង រូបភាព៖ បូ សាវី
កែសម្រួល៖ សេង ផល្លី
